ओलीले ११ बजे बालुवाटारमा डाके स्थायी कमिटी बैठक- समाचार - कान्तिपुर समाचार

ओलीले ११ बजे बालुवाटारमा डाके स्थायी कमिटी बैठक

४ बजे सिंहदरबारमा दाहाल-नेपाल समूहको पनि संसदीय दल बैठक  बस्दै
इकान्तिपुर डेस्क

काठमाडौँ — प्रधानमन्त्री तथा नेकपा अध्यक्ष केपी शर्मा ओलीले आफ्नो समूहको स्थायी कमिटी बैठक बोलाएका छन् । सर्वोच्च अदालतले मंगलबार प्रतिनिधिसभा पुन:स्थापनाका पक्षमा पैसला गरेपछि ओलीले बुधबार बिहान ११ बजे बालुवाटारमा स्थायी कमिटी बैठक बोलाएका हुन् ।

बैठकमा आगामी रणनीतिबारे छलफल हुने बताइएको छ । सर्वोच्चको फैसलापछि प्रधानमन्त्री ओली आफैले कुनै प्रतिक्रिया दिएका छैनन् । तर मंगलबार साँझ उनका प्रेस सल्लाहकार सूर्य थापाले प्रधानमन्त्रीले तत्काल राजीनामा नदिने बताएका थिए । प्रधानमन्त्रीले प्रतिनिसभाको सामना गरेर नै फैसला कार्यान्वयन गर्ने प्रेस सल्लाहकार थापाले प्रतिक्रिया दिएका थिए । संसद् पुन:स्थापना गर्ने सर्वोच्च अदालतको फैसलालाई विवादास्पद भन्दै थापाले यसका दुष्प्रभावहरु देखिँदै जाने र राजनीतिक समस्याहरु हल हुन नसक्ने र अस्थिरता अझ बढ्ने पनि बताएका थिए ।

यसैबीच पुष्पकमल दाहाल-माधवकुमार नेपाल पक्षले पनि बुधबार अपरान्ह ४ बजे सिंहदरबारमा संसदीय दलको बैठक बोलाएको छ । दाहाल-नेपाल पक्षकी सांसद रेखा शर्माले समसामयिक विषयमा छलफल गर्नका लागि बैठक बोलाइएको जानकारी दिइन् । उनले भनिन्, '४ बजे सिंहदरबारमा बैठक बस्नेछ र समसामयिक विषयमा छलफल गर्नेगरी बैठक बोलाइएको हो । नेकपाका सबै सांसदहरूलाई बैठकमा उपस्थित हुन भनिएको छ ।'

दाहाल-नेपाल समूहले यसअघि नै पुस ९ गते ओलीलाई हटाएर संसदीय दलको नेतामा दाहाललाई निर्वाचित गरेको थियो ।

संविधान र लोकतन्त्रको रक्षाका पक्षमा सर्वोच्च अदालतबाट भएको ऐतिहासिक फैसलाको खुसियालीमा दाहाल-नेपाल समूहले बुधबार बिहान सबै जिल्ला सदरमुकाममा कार्यक्रम आयोजना गरेको थियो । उक्त समूहले बुधबार मध्याह्न १२ बजे काठमाडौंको शान्ति वाटिकामा पनि कार्यक्रम आयोजना गर्ने जनाएको छ ।

प्रकाशित : फाल्गुन १२, २०७७ ०९:३४
प्रतिक्रिया
पठाउनुहोस्

पूर्वप्रधानमन्त्री भट्टराईको रोग पहिचान हुन थप केही दिन लाग्ने

सुरेशराज न्यौपाने

नयाँदिल्ली — पूर्वप्रधानमन्त्री तथा जसपा संघीय परिषद् अध्यक्ष बाबुराम भट्टराईको रोग पहिचानका लागि थप केही दिन लाग्ने भएको छ । उनको दिल्लीको वसन्तकुञ्जस्थित यकृत एवं पित्त विज्ञान संस्थानमा उपचार चलिरहेको छ ।

भट्टराईको पेटमा आमाशय र सानो आन्द्राको बीच भागमा पलाएको न्युरो–इन्डोक्राइन ट्युमर (एनईटी) अर्थात् मासुको डल्लो क्यान्सर हो वा होइन यकिन गर्नका लागि मंगलबारदेखि परीक्षण सुरु गरिएको हो । यसकै लागि उनी मंगलबार बिहानै अस्पताल भर्ना भएका हुन् ।

उनको उपचारमा अस्पतालका वरिष्ठ चिकित्सक डा. विक्रम भाटिया संलग्न छन् । भट्टराई पत्नी हिसिला यमीका अनुसार थप परीक्षण गर्नुपर्ने चिकित्सकले बताएका छन् । पहिलो दिन अल्ट्रा इन्डोस्कोपी गरिएको थियो । त्यसैगरी उनको पेटभित्र पलाएको ट्युमरको सानो हिस्सा निकालेर बायप्सीका लागि पठाइएको छ । त्यसको रिपोर्ट आउन पाँच दिन लाग्नेछ । त्यही रिपोर्टले नै ट्युमर घातक भएको वा नभएको यकिन गर्नेछ ।

त्यसबीच थाइरोयड, अन्य परीक्षणहरू पनि गरिने यमीले बताइन् । ‘खाना जाने नलीमा अल्सर पनि देखिएको छ । जुन काठमाडौंमा परीक्षणका क्रममा देखिएको थिएन,’ उनले भनिन् । भट्टराईमा देखिएको ट्युमर मानिसमा विरलै देखिनेमध्येमा पर्छ । यो प्रायजसो आन्द्रा, फोक्सो, घाँटी, अग्नाशय (प्यांक्रियाज) मा देखिने गर्छ ।

प्रकाशित : फाल्गुन १२, २०७७ ०९:२१
पूरा पढ्नुहोस्
प्रतिक्रिया
पठाउनुहोस्
x
×