झन्डै ३ सय वकिल हुनुहुन्छ, बहस छिटो टुंग्याउनुस् : प्रधानन्यायाधीश - समाचार - कान्तिपुर समाचार

झन्डै ३ सय वकिल हुनुहुन्छ, बहस छिटो टुंग्याउनुस् : प्रधानन्यायाधीश 

कान्तिपुर संवाददाता

काठमाडौँ — प्रतिनिधिसभा विघटनको मुद्दामा बहस गर्नेहरूलाई संवैधानिक इजलासले कम समय दिन थालेको छ । १३ रिट निवेदन भएको र ठूलो संख्यामा कानुन व्यवसायीहरूले वकालतनामा भरेपछि अन्तिम फैसला आउन ढिला हुने भन्दै इजलासले छोटो बहस गर्न भनेको हो । 

शुक्रबारको बहसमा प्रधानन्यायधीश जबराले कानुन व्यवसायीहरूलाई छिटो बहस सक्न आग्रह गरेका छन् ।

कानुन व्यवसायी कोपिलप्रसाद अधिकारी उभिएपछि प्रधानन्यायाधीशले १० मिनेटमा बहस सिध्याउन भने । अधिकारीले आफूलाई १५ मिनेट दिन आग्रह गरे ।

त्यसपछि प्रधानन्यायाधीश जबराले भने , 'हामीले पटकपटक भनिरहेका छौं । अवस्था यस्तै छ । तपाईंहरू झन्डै तीन सय जना हुनुहुन्छ ।'

त्यसपछि अधिकारीले आफू नाम मात्रै लेखाउन नआएको जवाफ दिए । अधिकारीको जवाफ सुनेपछि समयको ख्याल गर्न रिट निवेदकहरू नै अगाडि बढ्नुपर्ने आशय व्यक्त गरे । उनले भने, 'दुई महिना लिन्छौं भने पनि दिन्छौं ।'

प्रधानन्यायाधीशले आफूहरूलाई हतार भएको बताए । उनले भने, 'हामीलाई एकदम हतार छ ।'

प्रकाशित : माघ ९, २०७७ १२:२०
प्रतिक्रिया
पठाउनुहोस्

लोकतन्त्रमा चुनावबाट भाग्न मिल्दैन : महतो

अवधेशकुमार झा

राजविराज — जनता समाजवादी पार्टीका वरिष्ठ नेता राजेन्द्र महतोले लोकतन्त्रमा चुनावबाट भाग्न नमिल्ने बताएका छन् । सप्तरीको राजविराजमा शुक्रबार आयोजित पत्रकार सम्मेलनमा उनले प्रतिनिधिसभा विघटनबारे सर्वोच्च अदालतले गर्ने फैसला आफूहरूलाई मान्य हुने भन्दै निर्वाचनबाट भाग्न नचाहेको प्रस्ट पारे ।

उनले अहिलेको समस्याको समाधान चुनाव वा पुन:स्थापना दुवैले दिन नसक्ने जिकिर पनि गरे । ‘अहिले न चुनाव न त प्रतिनिधिसभाको पुन:स्थापनले नै निकास दिन सक्छ,’ महतोले भने, ‘मुलुकको समस्याको स्थायी समाधान औपनिवेशिक चिन्तनको अन्त्य भए मात्र हुन सक्छ ।’

कम्युनिस्ट पार्टीहरूमा अहिले स्वार्थको लडाइ मात्र भएको दाबी गर्दै उनले भने, ‘बेइमानहरूको कुनै ठेगान छैन, कुन बेला फेरि प्रतिगमन सच्चियो भनेर गठजोर गर्दै कुर्सीमा बस्न पनि बेर लगाउँदैनन् ।’ प्रतिनिधिसभा विघटन गरेर प्रधानमन्त्री केपी शर्मा ओलीले ‘हिटलरशाही’ देखाएको महतोले आरोप लगाए ।

नेपालमा कम्युनिस्ट र कांग्रेस असफल भएको दाबी गर्दै उनले वैकल्पिक शक्तिका रूपमा जनता समाजवादी पार्टीको उदय भएको पनि उनले बताए ।

प्रकाशित : माघ ९, २०७७ १२:२०
पूरा पढ्नुहोस्
प्रतिक्रिया
पठाउनुहोस्
थप केही समाचारबाट
×