अनावश्यक रुपमा कोभिड परीक्षण नगरौं : स्वास्थ्य मन्त्रालय

सोमबार एक सूचना जारी गर्दै मन्त्रालयले कोरोना पुष्टि भएका तर लक्षण वा चिन्ह नदेखिएका व्यक्तिहरुमा १० दिनपछि बिना परीक्षण जनस्वास्थ्यका मापदण्ड अपनाइ दैनिक जीवनमा फर्किन सकिने जनाएको छ ।

मन्त्रालयका प्रवक्ता डा. जागेश्वर गौतमले कतिपय व्यक्तिहरुमा कोरोना पुष्टि भएर स्वास्थ्य अवस्था बिग्रिँदा पनि स्वास्थ्यकर्मीको सम्पर्कमा नआउने तथा अस्पताल पुग्न ढिलाइ गर्दा जोखिम बढेको बताए ।

मन्त्रालयको सूचनामा कतिपय व्यक्ति आइसोलेसन सेन्टर वा अस्पतालमा लामो समय भर्ना हुने र नेगेटिभ नआउञ्जेल पटक-पटक परीक्षण गरिरहने र डिस्चार्ज हुन नमान्दा स्रोतसाधनको दुरुपयोग हुँदा सम्बन्धित व्यक्तिहरुमा मानसिक तनावसमेत बढ्न सक्ने उल्लेख छ ।

प्रवक्ता डा. गौतमले सबैले कोभिड परीक्षण निर्देशिका अनुसार मात्रै परीक्षण गर्न र संक्रमण पुष्टि भएपछि स्वास्थ्यकर्मीको सम्पर्कमा रहन सूचना मार्फत् आग्रह गरेका छन् ।