नेपालमा थपिए १३ सय ५१ कोरोना संक्रमित, संक्रमितको संख्या ७४ हजार नाघ्यो- समाचार - कान्तिपुर समाचार
कान्तिपुर वेबसाईट
AdvertisementAdvertisement

नेपालमा थपिए १३ सय ५१ कोरोना संक्रमित, संक्रमितको संख्या ७४ हजार नाघ्यो

कान्तिपुर संवाददाता

काठमाडौँ — पछिल्लो २४ घन्टामा नेपालमा थप १३ सय ५१ जनामा कोरोना संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।

मन्त्रालयको नियमित प्रेस ब्रिफिङका क्रममा सोमबार प्रवक्ता डा जागेश्वर गौतमका अनुसार नयाँ थपिएका कोरोनाका संक्रमितसँगै नेपालमा कोरोना संक्रमितको संख्या ७४ हजार ७ सय ४५ पुगेको बताएका छन् ।

यसैगरी पछिल्लो २४ घन्टामा कोरोनामुक्त भएर ७ सय ४२ जना डिस्चार्ज भएका छन् । यो सँगै नेपालमा हालसम्म कोरोनामुक्त हुनेको संख्या ५४ हजार ६ सय ४० जना पुगेको छ ।

त्यस्तै पछिल्लो २४ घन्टामा नेपालमा थप ४ जनाको कोरोना संक्रमणबाट मृत्यु भएको स्वास्थ्य तथा जनसंख्या मन्त्रालयले जनाएको छ । योसँगै नेपालमा कोरोना संक्रमणबाट मृत्यु हुनेको संख्या ४ सय ८१ पुगेको छ ।

यसैगरी नेपालमा आइसोलेसनमा रहने कोरोना संक्रमित १९ हजार ६ सय २४ जना छन् भने ६ हजार ३१० जना क्वारेन्टाइनमा रहेको प्रवक्ता गौतमले बताए ।

प्रकाशित : आश्विन १२, २०७७ १६:२३
प्रतिक्रिया
पठाउनुहोस्

सुगर मिल सञ्चालन र बक्यौता भुक्तानीको माग राख्दै उखु किसान आन्दोलित

शिव पुरी

रौतहट — रौतहटको गरुडा नगरपालिका-४ मा रहेको श्रीराम सुगर मिलको सञ्चालन र बक्यौता भुक्तानीको माग गर्दै उखु किसान आन्दोलनमा उत्रिएका छन् । सोमबार उनीहरुले गौर–चन्द्रनिगाहपुर सडक खण्ड बन्द गराएका छन् ।

किसानले मिल सञ्चालन र उखुको बक्यौता भुक्तानीको माग अघि सारेर तीनदिन देखि आन्दोलन गर्दै आएका छन् । बन्दका कारण सदरमुकाम गौर जाने सवारी साधनहरु रोकिएका छन् ।

वर्षेनी घाटा व्यहोर्न बाध्य भएको भन्दै गोल्छा समूहले सञ्चालन गर्दै आएको सुगर मिल बन्द गरिसकेको छ । २६ वर्षदेखि निरन्तर सञ्चालनमा रहेको मिल बन्द हुँदा ३ सय २५ जना मजदुरको रोजगारी गुमेको छ । यसअघि सञ्चालकले मौखिक रुपमा मिल बन्द गर्ने जनाउँदै आए पनि कम्पनी सञ्चालक समितिको साउन ९ गतेको निर्णयले विधिवत रुपमा बन्द गरेको हो ।

उखुको भुक्तानीमा आलटाल गर्दै आएको मिल बन्द भएपछि किसान समस्यामा परेका हुन् ।किसानको उखुको रकम र कर्मचारीको तलब भत्ता दिन भएको चल/अचल सम्पति बिक्री गरि भुक्तानी दिने तयारीमा रहेको जनाउँदै अहिलेसम्म मिलले २ अर्ब १७ करोड ७५ लाख ५८ हजार घाटा व्यहोरेको सञ्चालकले जनायो ।

उधारोमा उखु किन्ने गरेको मिलले किसानलाई २०७१ साल देखिको झण्डै ३० करोड भन्दा माथिको रकम भुक्तानी दिन बाँकी रहेको उखु उत्पादक संघ रौतहटले जनाएको छ । यसैगरि अवकाश प्राप्त कर्मचारीहरुको ५० लाखभन्दा बढी रकम भुक्तानी दिन बाँकी रहेको छ । यही कारण संघकै नेतृत्वमा उखु किसानसहित मिलमा कार्यरत कर्मचारीहरु मिल सञ्चालन र भुक्तानीको माग गर्दै विरोध प्रदर्शनमा उत्रिएका हुन् । मिलमा सिजनल, रेगुलर र करार गरि ३ सय २५ जना कर्मचारीहरु कार्यरत छन् ।

उखु उत्पादक संघ रौतहटका किसान र मिलमा कार्यरत मजदुर, कर्मचारीको हितलाई ध्यान नराखी छलफल नगरी आफूखुसी एकतर्फी रुपमा मिल्स बन्द गर्ने निर्णय गरेको भन्दै जिल्ला संघ विरोधमा उत्रेको हो । संघको रौतहटका वरिष्ठ उपाध्यक्ष रामप्रमोद प्रसाद यादवले मिल बन्द गरेर जिल्लाका किसान र कर्मचारीलाई बिचल्लीमा पारेर मिल बन्दको नाटक गरेको बताए ।

मिलमा कार्यरत कर्मचारीले ६ महिनादेखि तलब नपाएको गुनासो गरेका छन् । १८ महिनादेखि सञ्चयकोष समेत व्यवस्थापन पक्षले पठाएको छैन । मिलबाट अवकाश प्राप्त कर्मचारीले पाउनुपर्ने उपदान समेत नदिइएपछि कर्मचारीहरु पनि किसानको आन्दोलनमा सहभागी भएका छन् ।

रौतहटको गरुडास्थित गौर चन्द्रनिगाहपुर खण्डमा चक्काजाम गर्न बसेका उखु किसानहरु । तस्बिरः शिव पुरी/कान्तिपुर

प्रकाशित : आश्विन १२, २०७७ १५:५१
पूरा पढ्नुहोस्
प्रतिक्रिया
पठाउनुहोस्
×