शिक्षा मन्त्रालयले ल्यायो शिक्षा सम्बन्धी आकस्मिक कार्ययोजना - समाचार - कान्तिपुर समाचार
कान्तिपुर वेबसाईट
AdvertisementAdvertisement

शिक्षा मन्त्रालयले ल्यायो शिक्षा सम्बन्धी आकस्मिक कार्ययोजना 

कान्तिपुर संवाददाता

काठमाडौँ — शिक्षा, विज्ञान तथा प्रविधि मन्त्रालयले शिक्षा सम्बन्धी आकस्मिक कार्ययोजना, २०७७ सार्वजनिक गरेको छ ।

कोभिडका कारण शिक्षा क्षेत्रमा देखिएको समस्यालाई मध्यनजर गर्दै आकस्मिक कार्ययोजना ल्याएको हो । कोभिडका कारण अवरुद्ध पठनपाठन सञ्चालन गर्ने सन्दर्भमा होम स्कुलिङको अवधारणा, विद्यार्थी—शिक्षक सम्पर्क प्रवर्द्धन जस्ता विधि अपनाएर सिकाइ सहजिकरण गरि सरोकारवालाहरुले आफ्नो दायित्व निर्वाह गर्ने गरि आकस्मिक कार्ययोजना ल्याइएको मन्त्रालयले जनाएको छ ।

मंगलबार भर्चुअल पत्रकार सम्मेलनमा मन्त्री गिरिराजमणी पोखरेलले कार्ययोजना सार्वजनिक गरिएको जानकारी गराउँदै बसाइ स्थानान्तरण भएका विद्यार्थीहरुको तथ्यांक संकलन, सबै बालबालिकाका लागि पाठ्यपुस्तक उपलब्धताको सुनिश्चितता र कार्यस्थलमा शिक्षकहरुको उपस्थितिलाई सुरुवाती दिनमा गरिहाल्नुपर्ने कार्यको रुपमा जोड दिइएको बताए ।

शैक्षिक सत्रमा विद्यार्थीले सिक्नुपर्ने विषयवस्तु, शिक्षण विधि र मूल्यांकन प्रक्रियाको लागि ढाँचा विकास नमुना स्वअध्ययन सिकाइका सामग्रीको विकासलाई कार्ययोजनामा समेटिएको उनले बताए ।

सरकारले यसअघि नै असार १ गतेबाट वैकल्पिक विधिबाट सिकाइ गर्ने निर्देशिका र असोज १ गतेबाट विद्यार्थी सिकाइ सहजीकरण निर्देशिका जारी गरिसकेको छ । महामारीका विषयलाई एकीकृत रुपमा सम्बोधन गर्न जरुरी रहेकोले अन्तर मन्त्रालय र सम्बन्धित निकायसँगको छलफल पछि कार्ययोजना निर्माण गरिएको हो । मन्त्रिपरिषद्को गत असोज १ को निर्णयबाट विद्यालय शिक्षा सम्बन्धी आकस्मिक कार्ययोजना, २०७७ स्वीकृत भएको हो ।

प्रकाशित : आश्विन ६, २०७७ १८:११
प्रतिक्रिया
पठाउनुहोस्

गोरखा नगरपालिबाट सेवा लिन एकतला माथिको 'टप'मा सेवाग्राही

सेवाग्राही भन्छन्, ‘काम भयो-भएन बुझ्न गएको हुँ ।’
हरिराम उप्रेती

गोरखा — गोरखा नगरपालिकाको एक तला माथिको टपबाट झ्यालको अगाडि उभिएर जोखिमसाथ सेवा लिइरहेको तस्बिर सार्वजनिक भएसँगै सामाजिक सञ्‍जालमा विभिन्‍न टीकाटिप्पणी भएका छन् । मंगलबार एक महिलासहित ३ सेवाग्राही झ्यालमा उभिएको तस्बिर सामाजिक सञ्जालमार्फत सार्वजनिक भएको गोरखा नगरपालिकाले पनि स्वीकारेको छ । 

जोखिमसाथ सेवा दिनु नगरपालिकाको लापरबाही भएको भन्दै चर्को आलोचना गरिएपछि नक्सापास शाखाका इन्जिनियर प्रकाश ढकालले सेवाग्राही जबरजस्ती झ्यालमा गएको बताए । ‘तस्बिरमा देखिएको जस्तो खासै असजिलो छैन, त्यो झ्यालमा चढ्न मिल्ने सजिलो ठाउँ छ,’ ढकालले भने, ‘झ्यालबाट सेवा दिएको होइन, सेवाग्राही आफूखुसी गएका हुन् ।’

नक्सापास शाखामा सेवा लिन उभिएकामध्ये एकजना गोरखा–३ नारेश्वरकी तारा सुनार थिइन् । भूकम्पले भत्काएको घर पुनर्निर्माण सकेकी तारा सम्पन्नता प्रमाणपत्र लिन बिहान १०.३० बजे नगरपालिका पुगेकी थिइन् । ‘पसल बन्द गरेर नगरपालिका गएको थिए, हतारमा भएकाले काम भए/नभएको हेर्न एकैछिन झ्यालमा चढेको थिएँ,’ उनले भनिन्, ‘कसले तस्बिर लियो पत्तो पाइनँ ।’ करिब एक घन्टा कुरेपछि सम्पन्नताको प्रमाणपत्र लिएर घर फर्केको उनले सुनाइन् ।

नगरपालिकाका प्रमुख प्रशासकीय अधिकृत दिनेशराज पन्तले कोभिड १९ का कारण सेवाग्राहीलाई मुलढोकाबाटै सेवा दिने गरेको दाबी गरेका छन् ।

‘मुलढोकामा सम्बन्धित सेवाग्राहीको फाइल लिएर सम्बन्धित शाखामा प्रोसेसिङ गरी काम सकेर मुल गेटमै फाइल ल्याउने व्यवस्था गरेका छौँ', पन्तले भने, ‘कुनै पनि सेवाग्राहीले झ्यालबाट सेवा लिनुपर्ने अवस्था छैन ।’ मंगलबार सार्वजनिक भएको फोटो भुइँतलाकै रहेको उनले बताए । ‘फोटो साइडबाट खिचिएको रहेछ, त्यो एक तलामाथि नभइ ग्राउण्ड फ्लोरकै हो,’ उनले भने ।

प्रकाशित : आश्विन ६, २०७७ १७:५२
पूरा पढ्नुहोस्
प्रतिक्रिया
पठाउनुहोस्
×