२४ घन्टामा थप १३ सय ५६ जनामा कोरोना संक्रमण पुष्टि, ८ सय २३ जना डिस्चार्ज- समाचार - कान्तिपुर समाचार

२४ घन्टामा थप १३ सय ५६ जनामा कोरोना संक्रमण पुष्टि, ८ सय २३ जना डिस्चार्ज

कान्तिपुर संवाददाता

काठमाडौँ — नेपालमा थप १३ सय ५६ जनामा कोरोना संक्रमण पुष्टि भएको छ । २४ घन्टामा देशभरका विभिन्न प्रयोगशालामा गरिएको परीक्षणमा १३ सय ५६ जनामा कोरोना संक्रमण देखिएको स्वास्थ्य तथा जनसंख्या मन्त्रालयले मंगलबारको पत्रकार सम्मेलनमा जानकारी दिएको हो ।

प्रवक्ता डा जागेश्वर गौतमले हालसम्म ६६ हजार ६३२ संक्रमितको संख्या पुगेको जनाए ।

त्यसैगरी २४ घन्टामा कोरोना संक्रमणबाट मुक्त भइ घर फर्किनेको संख्या ८२३ रहेको छ । यो सँगै हालसम्म कोेरोना संक्रमण निको हुनेको संख्या ४८ हजार ६१ पुगेको छ ।

२४ घन्टामा ११ हजार १ सय ५४ पीसीआर परीक्षण गरिएको छ ।

मन्त्रालयका अनुसार हालसम्म पीसीआर विधिबाट ९ लाख ४९ हजार ७७ परीक्षणहरु गरिएका छन् । हालसम्म क्वारेन्टाइनमा रहनेको संख्या ७ हजार १ सय ७१ जना रहेका छन् । त्यसैगरी सक्रिय संक्रमितको संख्या १८ हजार १ सय ४२ जना रहेको छ ।

थप २ को मृत्यु

कोरोना संक्रमणबाट २४ घन्टामा थप २ को मृत्यु भएको छ ।

स्वास्थ्य तथा जनसंख्या मन्त्रालयका प्रवक्ता डा जागेश्वर गौतमले मृतकमा १ जना महिला र १ जना पुरुष रहेको बताए । उनका अनुसार मृतकमा काठमाडौँका ५० वर्षीय पुरुष र काभ्रेपलाञ्चोकका ५० वर्षीया महिला रहेका छन् ।नेपालमा कोरोना संक्रमणबाट मृत्यु हुनेको हालसम्म ४२९ पुगेको छ ।



स्रोत : स्वास्थ्य तथा जनसंख्या मन्त्रालय


प्रकाशित : आश्विन ६, २०७७ १६:२६
प्रतिक्रिया
पठाउनुहोस्

प्रदेश ५ को प्रदेश सभा बैठक सुरु

घनश्याम गौतम

रूपन्देही — प्रदेश ५ को प्रदेश सभा छैठौं अधिवेशन मंगलबारबाट सुरु भएको छ । प्रदेशको राजधानी र नामाकरण यसै अधिवेशनबाट टुंगो लगाउने सरकारको तयारी छ । कोभिड–१९ को संक्रमण बढ्दै गएपछि बैठक साउन १८ पछि स्थगित भएको थियो । 


मंगलबारको बैठकको विशेष समयमा बोल्दै प्रदेश सभा सदस्यले कोरोना महामारी नियन्त्रणमा सरकारले गरेका कमजोरीदेखि बाढीपहिरोको पीडा र अन्य गतिविधिका विषय उठाएका छन् । सार्वजनिक लेखा समिति सभापतिसमेत रहेका सांसद डिल्लीबहादुर चौधरीले सोमबार गुल्मीमा नेपाली कांग्रेसका सभापति र कार्यकर्तामाथि प्रहरीबाट भएको धरपकडको निन्दा गर्दै प्रजिअ र प्रहरी प्रमुखलाई कारवाहीको माग गरे । त्यस्तै प्रदेशका बाँके र बर्दियामा कोभिड–१९ को परिक्षण रोकिएको भन्दै तत्काल सञ्‍चालन गर्न आग्रह गरे । त्यस्तै प्रदेशमा सिंचाई कुलोको मर्मत हुन नसकेको, सुत्केरी र गर्भवती महिला भोकभोकै मर्न थालेको भन्दै प्रदेश सरकारले भूमिका निर्वाह गर्न नसकेको बताए ।

बैठकमा जनमोर्चाकी तारा जिसी, जनता समाजवादी पार्टीका सन्तोषकुमार पाण्डेय, नेकपाका भोजप्रसाद श्रेष्ठ लगायतले विशेष समयमा बोलेका थिए । जिसीले एमसीसी नेपालको हितमा नभएको भन्दै अनुमोदन गर्न नहुने बताइन् । पाण्डेयले यातायात व्यवस्था कार्यालय भैरहवामा राख्नुपर्ने, कोरोनाका नाममा भ्रष्टाचार बढेकोले त्यसलाई नियन्त्रण गर्नुपर्ने लगायत विषय उठाउँदै सरकारको जवाफ मागे ।

प्रदेश सभा सदस्य श्रेष्ठले प्रदेश सरकार प्रत्येक जिल्लामा कोरोना परीक्षण गर्ने गरी अघि बढ्नु पर्ने र स्थानीय तहसँग सहकार्य गर्दै स्थानीय तहलाई अझै बलियो र परिपक्क बनाउनु पर्ने आवश्यकता देखिएको उनले बताए ।

प्रदेश सरकारले स्थापना गर्न लागेको प्रदेश पूर्वाधार विकास प्राधिकरण स्थापना र संचालन सम्बन्धमा व्यवस्था गर्न बनेको विधेयक प्रदेश सभामा पेस भएको छ । सरकारको तर्फबाट आन्तरिक मामिला तथा कानुनमन्त्री कुलप्रसाद केसीले विधेयक पेस गरेका हुन् । सरकारले यसै अधिवेशनबाट प्रदेश राजधानी र नामाकरण टुंगो लगाउने घोषणा गरेको थियो । नीति तथा कार्यक्रम र बजेटमा समेत राजधानी र नामको विषय समेटिएको थियो । त्यही राजधानी र नामाकरण टुंगो लगाउने उद्देश्यसहित बैठक सुरु गरिएको नेकपाका प्रमुख सचेतक भुमिश्वर ढकालले बताए । बैठकमा उद्योग पर्यटन वन तथा वातावरणमन्त्री लीला गिरीले अहिलेसम्म मन्त्रालयसँग सम्बन्धित विषयमा उठेका जिज्ञासाको जवाफ दिएका थिए ।

प्रकाशित : आश्विन ६, २०७७ १६:००
पूरा पढ्नुहोस्
प्रतिक्रिया
पठाउनुहोस्
×