पछिल्लो २४ घन्टामा उपत्यकामा ६ सय ७६ संक्रमित थपिए
काठमाडौँ — काठमाडौं उपत्यकामा ६ सय ७६ संक्रमित थपिएका छन् । स्वास्थ्य तथा जनसंख्या मन्त्रालयले मंगलबार आयोजना गरेको नियमित पत्रकार सम्मेलनमा पछिल्लो २४ घन्टामा थप ६ सय ७६ मा कोरोना संक्रमण पुष्टि भएको जानकारी दिइएको हो ।
मन्त्रालयका प्रवक्ता डा जागेश्वर गौतमले काठमाडौंमा ५५५, भक्तपुरमा ८६ र ललितपुरमा ३५ संक्रमित फेला परेको जानकारी दिए ।
उनका अनुसार २४ घन्टामा जम्मा १० हजार ३७५ पीसीआर परीक्षण भएका छन् । हालसम्म पीसीआर विधिबाट ८ लाख ६१ हजार ७८० परीक्षणहरु गरिएका छन् ।
२४ घन्टाको अध्यावधिक विवरण अनुसार सोमबार उपत्यकामा ५ सय १२ जनामा संक्रमण पुष्टि भएको जानकारी दिइएको थियो । सोही अवधिमा १० हजार ८७८ पीसीआर परीक्षण गरिएको थियो ।
२४ घन्टामा १ हजार ६२ जना डिस्चार्ज र ११ जनाको ज्यान गएको प्रवक्ता गौतमले जानकारी दिए । यो सँगै हालसम्म कोरोना संक्रमणबाट निको हुनेको संख्या ४० हजार ६३८ पुगेको छ ।
हालसम्म क्वारेन्टाइनमा रहनेको संख्या ७ हजार २५० जना रहेका छन् । त्यसैगरी सक्रिय संक्रमितको संख्या १५ हजार ७७९ जना रहेको छ ।
प्रकाशित : भाद्र ३०, २०७७ १६:४९