कोरोना संक्रमण : सर्वोच्चका सेवामा फेरि कटौती - समाचार - कान्तिपुर समाचार

कोरोना संक्रमण : सर्वोच्चका सेवामा फेरि कटौती 

कान्तिपुर संवाददाता

काठमाडौँ — कोरोना संक्रमण बढ्दै गएको र न्यायाधीशका सुरक्षामा खटिएका सुरक्षाकर्मीमा पनि कोरोना संक्रमण देखिएपछि सर्वोच्च अदालतले भदौ १५ गतेसम्मका लागि सेवामा कटौती गरेको छ । 

सर्वोच्च अदालतले शुक्रबार एक सूचना जारी गर्दै फैलिँदो कोरोना भाइरसको संक्रमणलाई मध्यनजर गर्दै सेवामा कटौती गरेको जनाएको हो ।

सर्वोच्चले जारी गरेको सूचनाअनुसार भदौ १५ गतेसम्म बन्दी प्रत्यक्षीकरणको निवेदन दर्ता र सुनुवाइ हुने, गम्भीर प्रकृतिका, संवेदनशील, तत्काल सुनुवाई हुनुपर्ने रिटको दर्ता र सुनुवाई मात्रै गर्नेछ । त्यस्तै, मुद्दा फिर्ता र मिलापत्रका काम मात्रै हुनेछन् ।

भदौ १५ गतेसम्म नियमित मुद्दाको सुनुवाई नहुने भएको छ । त्यस्तै, पुराना मुद्दाका पुनरावेदन र पुनरावलोकनको सुनुवाई रोकिएको छ भने सार्वजनिक सरोकारको रिटमा पनि तत्काल सुनुवाई गर्नैपर्ने बाहेकका अरुमा सुनुवाई नहुने भएको छ । काठमाडौं उपत्यकाको हकमा भने साउन ८ गतेबाट सुरु भएको म्याद र हदम्याद कायम हुने सर्वोच्चले जनाएको छ ।

लकडाउन खुलेपछि कोरोना संक्रमण बढ्दै गएको र विभिन्न जिल्लामा पुनः लकडाउनको अवस्था आएकाले अदालतका काममा संकुचन ल्याउनुपर्ने अवस्था आएको सर्वोच्चले जनाएको छ ।

'काठमाडौं उपत्यकामा समेत संक्रमण बढ्दै गएको र परीक्षणबाट यस अदालतका कर्मचारी, माननीय न्यायाधीशका निजी सुरक्षाकर्मी समेतमा संक्रमण देखिई माननीय न्यायाधीशहरू नै होम क्वारेन्टाइनमा रहनु परेको अवस्था छ,' अदालतको सेवामा कटौती गर्नुपर्नाको कारणबारे सर्वोच्चको सूचनामा भनिएको छ, 'यस परिस्थितिमा सेवाप्रवाहमा संकुचन ल्याउन आवश्यक रहेको विषयमा नेपाल बार एशोसिएसन तथा सर्वोच्च अदालत बार एशोसिएसनबाट समेत अनुरोध भई आएको छ ।'

सर्वोच्च अदालतका दुईजना न्यायाधीश होम क्वारेन्टाइनमा बसिरहेका छन् । न्यायाधीशहरू ईश्वर खतिवडाका सुरक्षाकर्मीमा कोरोना संक्रमण देखिएको थियो । त्यसपछि उनले आफू होम क्वारेन्टाइनमा बसेको सामाजिक संजालमार्फत जानकारी दिएका थिए ।

खतिवडासँगको इजलासमा आफू पनि बसेको भन्दै न्यायाधीश हरि फुयाँलले पनि आफू होम क्वारेन्टाइनमा बसेको जानकारी दिएका थिए ।

सर्वोच्चको सूचनाः

प्रकाशित : श्रावण ३०, २०७७ १६:३३
प्रतिक्रिया
पठाउनुहोस्

शरीर बन्धक मुद्दामा गाउँपालिका अध्यक्ष पक्राउ

टीकाप्रसाद भट्ट

रामेछाप — रामेछापको लिखु तामाकोशी गाउँपालिकाका अध्यक्ष गोविन्दबहादुर खड्का शरीर बन्धक अभियोगमा शुक्रबार पक्राउ परेका छन् ।

गाउँपाकिलाबाट रकम विनियोजन भएको योजनामा उपभोक्ता समितिका अध्यक्षलाई शरीर बन्धक बनाई जबरजस्ती चेकमा दस्तखत गर्न लगाएको अभियोगमा खड्कालार्ई पक्राउ गरीएको जिल्ला प्रहरी कार्यालय रामेछापका प्रमुख बसन्त पाठकले जानकारी दिएका छन् ।

शुक्रबार धोविबाट प्रहरीले नियन्त्रणमा लिएका खड्काको प्राथमिक स्वास्थ्य परीक्षण गरी अनुसन्धानका लागि प्रहरी हिरासतमा राख्न रामेछाप जिल्ला अदालतबाट ७ दिनको म्याद थप गरिएको प्रहरीले जनाएको छ ।

लिखु तामाकोशी गाउँपालिकाको गत आर्थिक बर्ष धोविबजार क्षेत्रमा सडक र नाला सुधारका लागि विनीयोजित २५ लाख रकमबाट निर्माण कार्य गरेका उपभोक्ता समितिका अध्यक्ष दर्पण लामाले अध्यक्ष खड्काविरुद्ध शरीर बन्धक जाहेरी गरेका थिए ।

प्रहरी नायब उपरिक्षक पाठकका अनुसार खड्काविरुद्ध अन्य जाहेरी पनि प्रहरीमा परेका छन् । गाउँपालिकालाई आवश्यक पर्ने जग्गा भनेर स्थानीय शेरबहादुर खड्कासँग २१ रोपनी जग्गा आफ्नी बहिनीको नाममा पारित गराएकोसमेत जाहेरी परेको प्रहरीले जनाएको छ । अध्यक्ष खड्का नेकपाबाट निर्वाचित हुन् ।

प्रकाशित : श्रावण ३०, २०७७ १६:३०
पूरा पढ्नुहोस्
प्रतिक्रिया
पठाउनुहोस्
×