प्रधानमन्त्री ओलीको पीसीआर रिपोर्ट नेगेटिभ- समाचार - कान्तिपुर समाचार

प्रधानमन्त्री ओलीको पीसीआर रिपोर्ट नेगेटिभ

कान्तिपुर संवाददाता

काठमाडौँ — प्रधानमन्त्री केपी शर्मा ओलीको पीसीआर रिपोर्ट नेगेटिभ आएको छ । शुक्रबार स्वाब संकलन गरी प्रधानमन्त्रीसहित उनको सम्पर्कमा आइरहने केही व्यक्तिको पीसीआर परीक्षण गरिएको प्रधानमन्त्रीका प्रेस सल्लाहकार सूर्य थापाले जानकारी दिए ।

प्रधानमन्त्रीसहित स्थायी कमिटी सदस्य सुवास नेम्वाङ, कानुनमन्त्री शिवमाया तुङ्बाहाम्फे, विष्णु रिमाल, राजन भट्टराई, सूर्य थापा र इन्द्र भण्डारीको पीसीआर रिपोर्ट नेगेटिभ आएको हो ।

प्रदेश २ का आन्तरिक मामिला तथा कानुनमन्त्री ज्ञानेन्द्र यादवलाई कोरोना संक्रमण पुष्टि भएपछि उनले भेटेका सबै जनाको कन्ट्याक्ट ट्रेसिङ र परीक्षण गरिएको हो । गत साउन १४ गते बालुवाटारमा आयोजित प्रदेशमा प्रहरी व्यवस्थापन सम्बन्धमा भएको छलफलमा सहभागी भएका ज्ञानेन्द्र यादवलाई बुधबार साँझ कोरोना पुष्टि भएको थियो ।

बालुवाटारमा सम्पन्न उक्त बैठकमा प्रधानमन्त्री केपी शर्मा ओली, गृहमन्त्री रामबहादुर थापा, सातवटै प्रदेशका आन्तरिक मामिला तथा कानुनमन्त्री र प्रहरी महानिरीक्षक शैलेश थापा सहभागी भएका थिए ।

प्रकाशित : श्रावण २३, २०७७ २३:२२
प्रतिक्रिया
पठाउनुहोस्

केरलमा एयर इन्डियाको विमान दुर्घटना, दुवै पाइलटसहित कम्तीमा ११ को मृत्यु

विमानस्थलबाट उछिट्टिँदा दुई टुक्रा भयो विमान, आगलागी भने भएन
एजेन्सी

नयाँदिल्ली — एयर इन्डियाको विमान केरलको कालिकट विमानस्थलमा शुक्रबार साँझ दुर्घटनाग्रस्त भएको छ । दुबईबाट आएको एयर इन्डियाको आईएक्स-१३४४ बोइङ ७३७ विमान अवतरणका क्रममा दुर्घटनाग्रस्त भएको हो ।

दुर्घटनामा परी दुई जना पाइलटसहित कम्तीमा ११ जनाको मृत्यु भएको भारतीय सञ्‍चारमाध्यम एनडीटीभीले जनाएको छ । त्यस्तै कम्तीमा ५० जना घाइते भएको र तीमध्ये १५ जनाको अवस्था गम्भीर रहेको बताइएको छ ।

तर विमान कम्पनीले भने यसको आधिकारिक पुष्टि गरेको छैन । एयर इन्डियाले दुर्घटनामा थुप्रै यात्रु घाइते भएको र उनीहरुको उद्धार भइरहेको जनाएको छ ।

विमान धावनमार्गबाट चिप्लिएर ठोक्किँदा दुई टुक्रा भएको भारतीय सञ्चारमाध्यमले बताएका छन् । विमान दुई टुक्रा भए पनि आगलागी भने नभएको कम्पनीले जनाएको छ ।

भारतीय सञ्चारमाध्यमका अनुसार विमानमा चालक दलका सदस्यसहित १९१ जना सवार थिए ।

उक्त विमानमा कोरोना महामारीका कारण दुबईमा फसेका भारतीय नागरिकलाई उद्धार गरी ल्याइएको थियो । दुर्घटनाको विस्तृत विवरण आउन बाँकी छ ।

यसअघि सन् २०१० मा मेङलोर विमानस्थलमा एयर इन्डियाको एउटा विमान दुर्घटना हुँदा १५८ जनाको मृत्यु भएको थियो ।

प्रकाशित : श्रावण २३, २०७७ २२:५०
पूरा पढ्नुहोस्
प्रतिक्रिया
पठाउनुहोस्
×