छोरा जोगिए, घरसँगै पुरिए आमाबाबु   - समाचार - कान्तिपुर समाचार

छोरा जोगिए, घरसँगै पुरिए आमाबाबु   

मनोज बडू

दार्चुला — दुहुँ गाउँपालिका–३ सल्लेखेतीका २२ वर्षीय सुनील जोशी काठमाडौंमा बसेर जापान जाने तयारी कक्षा लिइरहेका थिए । लकडाउनले कक्षा रोकिएपछि उनीसँगै बसेर पढिरहेकी बहिनीसहित घर फर्किए । मंगलबार बिहान घरमाथिको दार्चुला–टिंकर सडक किनारबाट खसेको पहिरोले घर पुरिँदा जापान जाने योजनासँगै सुनीलले आमाबुबालाई नै गुमाए । भागेर जोगिएका उनी अहिलेसम्म एकोहोरिइरहेका छन् ।

मंगलबार बिहान पौने ५ बजेतिर पहिरोमा पुरिएर ५० वर्षीय रामदत्त भनिने रतनराज जोशी र उनकी श्रीमती ४५ वर्षीया इन्द्रा जोशीको मृत्यु भएको प्रहरीले जनाएको छ । ‘घरमाथि पहिरो आएको थाहा पाएर बुबाले मलाई भाग्नु भनेको सम्म याद छ । हतपतमा भाग्दा मैले मोबाइलसम्म समात्न पाएको थिएँ,’ सुनीलले भने, ‘बाहिर निस्केर पछाडि हेर्दा घर पुरिएको देखें । आमाबुबा पछाडि आएको नदेखेपछि फर्केर हेर्दा केही देखिएन ।’ पहिरो घरमाथि खसेपछि गोठमा छिरेर बाहिर भागेको उनको भनाइ छ ।

‘आमाबुबालाई भाग्नुसम्म भन्न पाइएन । कोठाबाट बाहिर आउने ढोका बन्द थियो । ढोकातिरको भाग पहिले नै पुरिएको जस्तो लागेको छ,’ सुनीलले भने । उनको पिठ्युँ र खुट्टामा चोट लागेको छ । बहिनी भने राति ठूलोबुबाको घरमा सुत्न गएकाले सकुशल छिन् । दुहुँ–३ का वडाध्यक्ष लालबहादुर बमका अनुसार घरभित्रै वा भाग्ने बेलामा चोट लाग्यो भनेर सुनीलले स्मरण गर्न सकिरहेका छैनन् । बुबा रतनराजले छोरालाई जापान उडाउन गाउँमा ऋणपैंचो गरेर रकम जम्मा पारेका थिए । त्यही पैसा झिक्न खोज्दा ढिलो भएर पुरिएको स्थानीयले अनुमान गरिरहेका छन् ।

सोमबार दिउँसोदेखिको वर्षाको भेलले दार्चुला–टिंकर सडकको ग्याबिन जाली भरेको सडक किनारको भाग बगाएपछि झरेको पहिरोले घर पुरिएको स्थानीय वीरेन्द्र जोशीले बताए । सडकको घुम्तीको पूरै भाग बगेको छ । जस्तापाताले छाएको घरमा जोशी दम्पती पुरिएपछि स्थानीयवासी, सेना, सशस्त्र र प्रहरीले खोजी गरे । मंगलबार दिउँसो साढे २ बजे उनीहरूको शव भेटियो । ‘पूरै घर पुरिएका कारण शव निकाल्न समय लाग्यो,’ उद्धारमा खटिएका प्रहरी निरीक्षक भाष्कर चन्दले भने । रामदत्तको शव भैंसीसँगै र भैंसीले च्यापिएको अवस्थामा इन्द्राको शव फेला परेको थियो । शव पोस्टमार्टमका लागि जिल्ला अस्पताल पुर्‍याइएको छ । पहिरोमा एउटा भैंसी र ४ बाख्रासहित घरगोठका सबै सामान पुरिएका छन् ।

जिल्लामा असार १५ यता बाढीपहिरोमा परी ९ जनाको मृत्यु भएको छ । दुहुँ गाउँपालिकामा २, मालिकार्जुन गाउँपालिकामा २ र नौगाड गाउँपालिकामा ५ जनाले ज्यान गुमाएका हुन् । नौगाड, अपी हिमाल, मालिकार्जुन, लेकम, व्यास गाउँपालिका तथा महाकाली नगरपालिकामा ठूलो मात्रामा भौतिक संरचनामा क्षति पुगेको छ । जिल्लाभर एक दर्जनभन्दा बढी ग्रामीण सडक बन्द छन् ।

प्रकाशित : श्रावण १४, २०७७ ०८:१५
प्रतिक्रिया
पठाउनुहोस्

सिटौलाले आज सांसद पदको शपथ लिँदै

कान्तिपुर संवाददाता

काठमाडौँ — जनता समाजवादी पार्टीबाट सांसद बन्न लागेकी लीला सिटौलाले आज पद तथा गोपनीयताकाे शपथ लिने भएकी छिन् । सभामुख अग्निप्रसाद सापकोटाले दिउँसो १ बजे उनलाई शपथ गराउँदै छन् ।  

सिटौलालाई बुधबार दिउँसो १ बजे संघीय संसद् सचिवालयको कृषि, सहकारी तथा प्राकृतिक स्रोत समितिको हलमा शपथ ग्रहण गराउने कार्यक्रम तय भएको संसद् सचिवालयका सूचना अधिकृत दशरथ धमलाले जानकारी दिए ।

पार्टी ‘ह्विप’ नमानेका कारण पार्टीको संगठित सदस्य र सांसद पदबाटसमेत हटाइएकी सरिता गिरीको ठाउँमा सिटौला नियुक्त भएकी हुन् ।

गिरीले भारतीय अतिक्रमणमा परेका कालापानी, लिपुलेक र लिम्पियाधुरा नेपालको नक्सामा समेटिएको र त्यसलाई संविधानको अनुसूचीमा समेट्न ल्याइएको संशोधन विधेयकको विरोध गरेकी थिइन् । संविधानको अनुसूची ३ मा रहेको निसान छापमा उक्त नक्सा राख्न विधेयकमाथि मतदान भएका दिन समाजवादीले पक्षमा मतदान गर्न सांसदहरूलाई ह्विप जारी गरेको थियो । त्यसलाई गिरीले अस्वीकार गरेकी थिइन् ।

आफूमाथिको कारबाही पार्टी विधानविपरीत भएकाे दाबी गर्दै उनी सर्वोच्च अदालतसमेत पुगेकी थिइन् । तर, सर्वोच्चले गिरीका पक्षमा अन्तरिम आदेश दिन अश्वीकार गरेसँगै निर्वाचन आयोगले उनको ठाउँमा सिटौला निर्वाचित भएको पत्र संसद् सचिवालयलाई फठाएको थियो ।

ललितपुरनिवासी सिटौला पार्टीको खस महिला कोटाबाट सांसद बन्न लागेकी हुन् । उनी पार्टीको समानुपातिक सूचीमा गिरीभन्दा मुनि थिइन् ।

प्रकाशित : श्रावण १४, २०७७ ०८:१२
पूरा पढ्नुहोस्
प्रतिक्रिया
पठाउनुहोस्
×