कान्तिपुर वेबसाईट
AdvertisementAdvertisement

साउन २१ गतेदेखि आन्तरिक र भदौ १ गतेदेखि अन्तर्राष्ट्रिय उडान सञ्‍चालन गर्न सकिने : पर्यटन मन्त्रालय

सुरज कुँवर

काठमाडौं — संस्कृति,पर्यटन तथा नागरिक उड्डयन मन्त्रालयले साउन २१ गतेदेखि आन्तरिक र भदौ १ गतेदेखि अन्तर्राष्ट्रिय उडान सञ्‍चालन गर्न सकिने जनाएको छ ।

चैत ९ देखि अन्तर्राष्ट्रिय र चैत ११ देखि आन्तरिक उडान रोकेको सरकारले वायुसेवा पुनः सञ्चालन गर्न असार १५ गते अध्ययन समिति गठन गरेको थियो ।

पर्यटन मन्त्रालयका सहसचिव बुद्धिसागर लामिछानेको नेतृत्वमा गठन भएको चार सदस्यीय समितिले बिहीबार संस्कृति,पर्यटन तथा नागरिक उड्डयन मन्त्री योगेश भट्टराईलाई बुझाएको प्रतिवेदनले साउन २१ गतेदेखि आन्तरिक र भदौ १ गतेदेखि अन्तर्राष्ट्रिय उडान खुला गर्न सकिने सुझाव दिएको छ ।

स्रोतका अनुसार सहसचिव लामिछानेले सचिव केदारबहादुर अधिकारी हुँदै मन्त्री भट्टराईलाई बुझाएको प्रतिवेदनलाई सदर गरिएको छ । समितिको प्रतिवेदन शुक्रबार छाउनीस्थित कोभिड–१९ संकट व्यवस्थापन सञ्‍चालन केन्द्र हुँदै उपप्रधानमन्त्री ईश्वर पोखरेलले नेतृत्वको नोबल कोरोना भाइरस रोकथाम तथा नियन्त्रण उच्चस्तरीय समन्वय समितिमा जानेछ । उक्त समितिको सिफारिसका आधारमा सरकारले साढे तीन महिनादेखि बन्द गरेको व्यवसायिक उडान सुचारु गर्न अनुमति दिनुपर्ने छ ।

सहसचिव लामिछाने नेतृत्वको अध्ययन समितिले कोभिड–१९ को माहामारी कायमै र बढ्दै गइरहेको अवस्थामा कसरी वायुसेवालाई अनुमति दिनेबारे कार्ययोजना पनि पेश गरेको छ । उच्च स्रोतका अनुसार समितिले आन्तरिक उडानमा रहेका वायुसेवालाई सुरुमा दिनमा एउटा सेक्टरमा एउटा उडान मात्रै गर्न दिइनुपर्ने उल्लेख गरेका छन् भने अन्तर्राष्ट्रिय वायुसेवालाई सातामा एउटामात्रै उडान गर्न दिइनुपर्ने प्रस्ताव गरेका छन् । हाल काठमाडौंस्थित त्रिभुवन अन्तर्राष्ट्रिय विमानस्थलमा ९ वटा आन्तरिक उडान गर्ने वायुसेवा कम्पनी छन् भने अन्तर्राष्ट्रियतर्फ ३० वटा वायुसेवा छन् ।

यसैबीच, पर्यटन क्षेत्रका २५ वटा संस्थाहरुले बिहीबार राजधानीमा संयुक्त पत्रकार सम्मेलन गर्दै पूर्ण रुपमा बन्द भएका पर्यटकीय क्षेत्र खुला गर्न सरकारसँग माग गरेका छन् । उनीहरुले आन्तरिक तथा बाह्य उडान ठप्प भएसँगै नेपाली पर्यटन उद्योग शून्य हुँदै व्यवसायीहरुमा असीमित दायित्व थपिएको बताएका छन् । कोभिड-१९का कारण ऋणात्मक अवस्था हुँदा धेरैको रोजगारी तथा खर्बौंको लगानी संकटमा परेको उनीहरुले बताएका छन् ।

पर्यटन व्यवसायीहरुले विस्तारै कोभिड–१९ सँगै अनुकूल जनजीवन सञ्चालन गर्नुको विकल्प नभएको जनाउँदै अन्तर्राष्ट्रिय अभ्यास र अनुभव हेरेर साउन १७ बाटै आन्तरिक र साउन ३१ बाट अन्तर्राष्ट्रिय उडान सुचारु गर्न र बन्द नाका खोल्न माग राखेका छन् ।

ती संस्थाहरुले हवाई सेवा समग्र पर्यटन गतिविधिको आधार भएकाले नियमित उडान गराउदै महँगो शुल्क तिरेर भइरहेका चार्टर र उद्धार उडान मार्फत नभई नियमित उडान सुचारु गर्नुपर्ने माग राखेका छन् । त्यस्तै, पर्यटकीय सवारी साधनहरु स्वास्थ्य सुरक्षा सम्बन्धी उपायहरु पालना गराउँदै निर्वाध सञ्‍चालन गर्न दिनुपर्ने पनि उनीहरुको माग रहेको छ । व्यवसायीहरुले नेपाली पर्यटन क्षेत्रलाई गतिशिल तथा चलायमान बनाउन पर्यटकीय क्षेत्र, गन्तव्य, सेवा तथा बजारीकरणका आधारहरु विस्तारै सुचारु गर्नमा जोड दिएका छन् ।

प्रकाशित : श्रावण १, २०७७ २०:२७
प्रतिक्रिया
पठाउनुहोस्

मध्यपहाडी लोकमार्गको अन्तिम खण्ड स्तरोन्‍नति सुरु

हरि गौतम

रुकुम पश्चिम — मध्यपहाडी लोकमार्ग अन्तर्गत रुकुम खण्डमा पर्ने सबै सडकमा स्तरोन्‍नोतिको काम सुरु भएको छ । सेरीगाउँ–हासिबाङ खण्डको ठेक्का लागेसँगै लोकमार्गको सबै खण्डमा स्तरोन्‍नोतिको काम सुरु भएको हो ।

कालोपत्रे हुने क्रममा रहेको मध्यपहाडी लोकमार्गअन्तर्गत मुसिकोट नगरपालिकाको किटेनी–खोपिचार खण्ड । तस्बिर : हरि गौतम/कान्तिपुर

अरु खण्डमा यसअघि नै सडक स्तरोन्‍नोतिको लागि ठेक्का लागिसकेको थियो । मध्यपहाडी लोकमार्ग योजना कार्यालय, दैलेखका अनुसार १२ किलोमिटर दूरीको सेरीगाउँ– हाँसिबाङ खण्ड सबैभन्दा अप्ठ्यारो मानिएको छ । योजना प्रमुख नारायणप्रसाद निहुरेले अन्य खण्डमा कालोपत्रेका लागि ठेक्का लागेर पनि झण्डै आधा काम सकिएको बताए । उनका अनुसार लकडाउन सुरु हुनुभन्दा अघि ठेक्का आह्वान गरिएको यो खण्डमा केही दिनअघि काम थालिएको हो ।

कालोपत्रेका लागि गत जेठ २८ गते निर्माण कम्पनी र योजना कार्यालयबीच सम्झौता भएको हो । जसका लागि दिवा/यति जेभीले निर्माणको जिम्मा पाएको छ । ४४ करोड ९ लाख रुपैयाँमा कालोपत्रेको सम्झौता भएको हो ।

योजना प्रमुख निहुरेका अनुसार कम्पनीले २०७९ मंसिर २७ गतेभित्र कालोपत्रे सक्ने गरी जिम्मा पाएको छ । डबल कटिङ, वाल, ग्याविङ वाल, नालीसहित सडक कालोपत्रे गर्ने गरी निर्माण कम्पनीसित सम्झौता भएको योजना कार्यालयको भनाइ छ । कार्यालयका अनुसार १२ किलोमिटर लामो सडक ९ मिटर चौडाइको हुनेछ । सडकमा साढे ७ मिटर कालोपत्रे उनले जानकारी दिए । जसमा डेढ मिटर सडक क्षेत्र नाली र वालले ओगट्नेछ ।

अहिले उक्त खण्डको मूल सडक बिग्रेकाले अर्को सडकबाट यातायातका साधन सञ्चालन भइरहेका छन् । रुकुम पश्चिम र रुकुम पूर्वमा मध्यपहाडी लोकमार्ग अन्तर्गतका ८ खण्ड छन् । ८ मध्ये ७ खण्डमा कालोपत्रे गर्नेसम्मको ठेक्का लागेर धमाधम काम भइरहेको छ । केही खण्डको कालोपत्रेसमेत सकिएको छ भने केहीमा निर्माणको काम अन्तिम चरणमा पुगेको योजना प्रमुख निहुरेले बताए ।

उनका अनुसार रुकुम पश्चिम र पूर्व गरी २ जिल्लामा मध्यपहाडी लोकमार्गको साढे १ सय २३ किलोमिटर सडकमध्ये सबैभन्दा बढी अप्ठेरो खण्ड सेरीगाउँ–हाँसिबाङ खण्ड हो । यो खण्डमा कठीन भूगोलका कारण हरेक वर्षामा तल र माथिबाट झर्ने पहिरोले यात्रुले सास्ती भोग्दै आएका छन् ।

मध्यपहाडी लोकमार्गअन्तर्गत रुकुम पूर्वको भूमे गाउँपालिका–१ को तुकुवाङखोलादेखि बाग्लुङ सीमासम्मको १३ किलोमिटरको एउटा खण्ड छ । तुकुवाङखोलादेखि पश्चिमतर्फको किमुबोटसम्म १६ किलोमिटर अर्को खण्ड र किमुबोटदेखि पश्चिमतर्फ रुकुमकोटसम्म १६ किलोमिटर खण्डमा पनि कालोपत्रेको काम जारी छ ।

यसैगरी रुकुम पूर्वको रुकुमकोटदेखि रुकुम पश्चिमको रिनदहसम्मको २० किलो मिटर सडक र रिनदहदेखि शिलतपोखरी सम्मको १४ किलोमिटरमा पनि निर्माणको काम अन्तिम चरणमा पुगेको कार्यालयले जनाएको छ ।

हासिवाङदेखि चौरजहारी नगरपालिकाको भेरी पुलसम्मको साढे ३२ किलोमिटरमा २ खण्ड बनाएर निर्माणको काम गरिरहेको योजना प्रमुख निहुरेले जनाए । उनका अनुसार हाँसिवाङदेखि चाइनबागरसम्म साढे १६ किमि र चाइनाबगरदेखि चौरजहारी भेरीपुलसम्मको १६ किलोमिटर सडकमा पनि कालोपत्रे भइरहेको हो ।

प्रकाशित : श्रावण १, २०७७ २०:००
पूरा पढ्नुहोस्
प्रतिक्रिया
पठाउनुहोस्
×