वैदेशिक रोजगारीमा रहेका नेपालीलाई कार्यस्थलबाटै संक्रमण हुन सक्ने चिन्ता- समाचार - कान्तिपुर समाचार
कान्तिपुर वेबसाईट
AdvertisementAdvertisement

वैदेशिक रोजगारीमा रहेका नेपालीलाई कार्यस्थलबाटै संक्रमण हुन सक्ने चिन्ता

कान्तिपुर संवाददाता

काठमाडौँ — वैदेशिक रोजगारीमा रहेका नेपाली कामदारहरूले कार्यस्थलबाटै कोभिड–१९ संक्रमण हुन सक्ने जोखिम रहेको भन्दै चिन्ता व्यक्त गरेका छन् । नेपाली पोलिसी इन्स्टिच्युटले माइग्रेसन ल्याबसँगको सहकार्यमा खाडीका ८ देश, मलेसिया र भारतमा कार्यरत ६ सय २५ कामदारमाझ गरेको सर्वेक्षणमा ५८ प्रतिशतले यस्तो चिन्ता जनाएका हुन् । सर्वेक्षणमा सहभागी १७ प्रतिशतले भने व्यक्तिगत जीवनशैलीका कारण संक्रमण हुन सक्ने बताएका छन् ।

फाइल फोटो

कोभिड–१९ संक्रमणका कारण स्वदेश फर्किने योजना बनाइरहेकामध्ये धेरैजसो (८० प्रतिशत) कामदारले नेपाल फर्केपछि कृषि वा गैरकृषि क्षेत्रमा स्वरोजगार बन्ने योजना बनाएको पाइएको छ । बाँकीले कृषि वा गैरकृषि क्षेत्रमा ज्यालादारी गर्ने योजना बनाएको बताएका हुन् । मुख्य श्रम गन्तव्यमा रहेका नेपाली कामदारले समूहगत कुराकानीमा नेपालमा ज्यालादारी काममा आम्दानी कम हुने र खर्च धेरै हुनेसमेत बताएका छन् ।

सरकारले वैदेशिक रोजगारीबाट फर्किएका कामदारहरूलाई लक्षित गरी विभिन्न कार्यक्रम र बजेट छुट्याएको भए पनि प्रवासमा रहेकामध्ये ७० प्रतिशत कामदारलाई यसबारे जानकारी नै नरहेको पाइएको हो । सर्वेक्षणमा सहभागी २ प्रतिशतले मात्रै त्यस्ता योजनाको बारेमा थाहा भएको सुनाएका थिए । सर्वेक्षणमा सहभागीमध्ये ८० प्रतिशतले स्वदेश फर्केर केही उद्यम गर्न आफूहरूसँग पुँजीको अभाव रहेको बताएका छन् । यस्तो बताउनेले प्रवासको कमाइ घर खर्चमै सकिने गरेको पनि खुलाएका थिए ।

कोरोना संकटका कारण धेरै संख्यामा प्रवासी कामदारहरूले स्वदेश फर्किने सोच बनाए पनि उनीहरू नेपालमा रोजगारीको प्रत्याभूति नहुने र कोरोना संक्रमण बढ्दो क्रममा रहेकाले द्विविधामा रहेको देखिएको छ । धेरैजसो कामदारले महँगो हवाई भाडा, गुणस्तरहीन क्वारेन्टाइन र त्यहाँ बस्दाको खर्च, नेपालमा जारी लकडाउनको सामना गर्नुपर्ने भएकाले पनि स्वदेश फर्किन नचाहेको बताएका थिए ।

वैदेशिक रोजगार बोर्डको सचिवालयले भिसाको म्याद सकिएका र आममाफीका कारण तत्काल फर्किन सक्ने १ लाख २७ हजार र रोजगारी गुमाएर फर्किन सक्ने २ लाख ८० हजार गरी कुल ४ लाख ७ हजार कामदारलाई फर्काउनुपर्ने आकलन संसद्को श्रम सम्बन्ध तथा अन्तर्राष्ट्रिय समिति बैठकमा पेस गरेको थियो । खाडीस्थित नेपाली दूतावासहरूमा मात्रै झन्डै एक लाख नेपाली श्रमिकले स्वदेश फर्किनका लागि नाम टिपाएका छन् ।

प्रकाशित : श्रावण १, २०७७ १२:२३
प्रतिक्रिया
पठाउनुहोस्

सार्वजनिक यातायात क्षेत्रका समस्या समाधान गर्न सरकारले पहल गर्नेछ : प्रधानमन्त्री

कान्तिपुर संवाददाता

काठमाडौँ — प्रधानमन्त्री केपी शर्मा ओलीले सार्वजनिक यातायात सञ्चालनका लागि सरकारले सहयोग गर्ने बताएका छन् । प्रधानमन्त्री ओलीले कोभिड–१९ को महामारीपछि दैनिक जीवन, अर्थतन्त्र, सेवा र रोजगारीसम्बन्धी सबै क्षेत्र प्रभावित भएको बताउँदै सार्वजनिक यातायात सञ्चालनमा देखिएका समस्या समाधान गर्न पहल गर्ने बताएका हुन् ।

कोरोना महामारीपछि यातायात सञ्चालनमा देखिएका समस्याबारे ज्ञापनपत्र बुझाउन गएको यातायात व्यवसायी र मजदुर संगठनका नेताहरुको प्रतिनिधि मण्डलसँग कुरा गर्दै प्रधानमन्त्री ओलीले महामारीले प्रभावित भएका सबै क्षेत्रका समस्या राज्यले हेर्नुपर्ने भएकाले आफ्नो सामर्थ्यअनुरुप समाधानमा अग्रसर रहने बताए ।

‘कोभिड–१९ को महामारीपछि सबै क्षेत्र प्रभावित हुन पुगे । जनताको दैनिक जीविका, विकास, अर्थतन्त्र र सेवा, सबै क्षेत्रमा यसको प्रभाव छ,’ प्रधानमन्त्री ओलीले भने, ‘सबै क्षेत्रका समस्या सरकारले समाधान गरिदिए हुन्थ्यो भन्ने परिरहेको छ, यस्तो स्वाभाविक पनि हो । सार्वजनिक यातायात सञ्चालन गर्न के–कस्तो सहयोग गर्न सकिन्छ, सरकारले पहल गर्नेछ ।’ संसारभर कोरोना महामारीको संकट आएपछि सरकारको आर्थिक हैसियतमा पनि ह्रास आएको प्रधानमन्त्रीको भनाइ थियो ।

नेपाल यातायात व्यवसायी राष्ट्रिय महासंघ र यातायात मजदुर संगठनका प्रतिनिधिले प्रधानमन्त्री ओलीसँग भेट गरी आफ्ना समस्या प्रस्तुत गरेका थिए । प्रतिनिधिमण्डलमा महासंघका अध्यक्ष योगेन्द्रनाथ कर्माचार्य, महासचिव सरोज सिटौला, उपमहासचिव वसन्त भण्डारी, नेपाल यातायात स्वतन्त्र मजदुर संगठनका अध्यक्ष भीमज्वाला राई, अखिल नेपाल यातायात मजदुर संघका रामचन्द्र कार्की र नेपाल यातायात मजदुर संघका धर्मराज भण्डारी सहभागी थिए ।

प्रकाशित : श्रावण १, २०७७ १२:०४
पूरा पढ्नुहोस्
प्रतिक्रिया
पठाउनुहोस्
×