कुर्सी जोगाउन जे पनि बोल्ने र गर्ने प्रमबाट देश सुरक्षित छैन : थापा- समाचार - कान्तिपुर समाचार
कान्तिपुर वेबसाईट
AdvertisementAdvertisement

कुर्सी जोगाउन जे पनि बोल्ने र गर्ने प्रमबाट देश सुरक्षित छैन : थापा

'नेकपाका साथीहरू ! राजनीतिक होइन भनेर नपन्छिनोस, अब ओलीलाई प्रमबाट बिदा गर्नोस्।'
कान्तिपुर संवाददाता

काठमाडौँ — प्रधानमन्त्री केपी शर्मा ओलीले अयोध्या र रामबारे दिएको अभिव्यक्तिको व्यापक रुपमा आलोचना भइरहेको छ । सोमबार भानु जयन्तीका अवसरमा प्रधानमन्त्री ओलीले नेपाल सांस्कृतिक अतिक्रमणमा परेको उल्लेख गर्दै भगवान रामको राज्य अयोध्या नेपालको वीरगन्जदेखि पश्चिममा पर्ने बताएका थिए ।

उनले राम नेपाली भएको र भारतले विवादित अयोध्या खडा गरेको दाबी गरेका थिए । बिनाप्रमाण प्रधानमन्त्री ओलीले विवादित अभिव्यक्ति दिएको भन्दै आलोचना भइरहेको छ ।

यसैक्रममा कांग्रेस सांसद तथा पूर्वमन्त्री गगन थापाले प्रधानमन्त्री ओलीले नेकपाभित्रको आन्तरिक किचलोमा कुर्सी जोगाउन योजनाबद्ध ढंगले अस्त्र उठाउँदै राजनीतिक स्टन्ट गरेको आरोप लगाएका छन् ।

थापाले ट्वीटरमा लेखेका छन्, 'प्रधानमन्त्रीको अभिव्यक्तिमा प्रतिक्रिया देख्दा धेरैले 'जे पनि बोल्ने' प्रमको पुरानै प्रवृत्ति हो र यो पनि उट्पट्याङ शैलीबाट आएको क्षणिक आवेगको रुपमा लिएको पाएँ। मेरो विचारमा-यो नेकपाको आन्तरिक किचलोमा प्रमले आफ्नो कुर्ची जोगाउन योजनाबद्ध ढंगले उठाएको अस्त्र र राजनीतिक स्टन्ट हो ।'

प्रधानमन्त्री ओलीले यस्तो अभिव्यक्ति दिँदा भारतबाट कस्तो प्रतिक्रिया आउँछ भन्ने हेक्का भए पनि त्यही आधारमा देशभित्र उत्पन्न परिस्थितिको जगमा आफूलाई'कथित राष्ट्रवादी'बनाउने र पार्टीभित्रको विद्रोह थाम्ने कडीका रुपमा संवेदनशील विषयमा असंगत अभिव्यक्ति दिएको थापाले आरोप लगाएका छन् ।

गगन थापा लेख्छन्, 'यसले केपी ओली सत्ता स्वार्थका लागि जुनसुकै प्रपञ्च रच्न तयार रहेको प्रस्ट पार्छ । आफ्नो लागि राष्ट्रिय स्वार्थ समेत दाउमा राख्ने,प्रमको अराजनीतिक टिप्पणीको भार बोक्न स्वाभिमानी नेपाली अभिशप्त छैनौँ।यसलाई हल्का रुपमा नलिऔं।यस्ता योजनावद्ध राजनीतिक प्रपञ्चलाई पूरा हुन नदिऔं।'

सांसद थापाले प्रधानमन्त्री ओलीले देशभित्र र बाहिर उत्तेजना ल्याउने नियतले 'अन्टसन्ट' बोलेको पनि आरोप लगाएका छन् । प्रधानमन्त्रीको अभिक्यक्ति प्रत्युत्पादक भएपछि परराष्ट्रको वक्तव्य आएको उल्लेख गर्दै थापा भन्छन्, 'कुर्सी जोगाउन जे पनि बोल्ने र गर्ने प्रमबाट न देश सुरक्षित छ न लोकतन्त्र !नेकपाका साथीहरू ! राजनीतिक होइन भनेर नपन्छिनोस,अब खड्गप्रसाद ओलीलाई प्रमबाट बिदा गर्नोस्।'

यसैबीच प्रधानमन्त्री केपी शर्मा ओलीले रामजन्मबारे सोमबार दिएको अभिव्यक्तिप्रति नेपाल र भारतबाट टिकाटिप्पणी र आलोचना भएपछि पराराष्ट्र मन्त्रालयले विज्ञप्ति जारी गर्दै प्रधानमन्त्रीको भनाई राजनीतिक विषयसँग सम्बन्धित नभएको जनाएको छ । प्रधानमन्त्रीको अभिव्यक्ति राजनीतिक विषयसँग र कसैको भावनामा ठेस पुर्‍याउने आशयमा व्यक्त नभएको परराष्ट्र मन्त्रालयले उल्लेख गरेको छ ।

सम्बन्धित समाचार

प्रकाशित : असार ३०, २०७७ २३:१५
प्रतिक्रिया
पठाउनुहोस्

पासो बने बालुवा झिकेका खाल्डा

जथाभावी उत्खननले स्थानीय खोला किनारका ठाउँठाउँमा बनेका गहिरा खाल्डाका कारण अकालमै ज्यान जाने घटना रोकिएको छैन
हरिहरसिंह राठौर

धादिङ — १६ वर्षीय ताराबहादुर लुंगेली मगर गत बुधबार गल्छी गाउँपालिका–२ मा पर्ने त्रिशूली नदीमा बालुवा झिक्ने क्रममा डुबेर बेपत्ता भए । उनी लगायत स्थानीय १६ युवकलाई नदी छेउमै घर भएका डिलबहादुर भण्डारीले एक टिपर बालुवा झिकेको ५५ सय रुपैयाँ र घरमै खानबस्न दिने सर्तमा असार १९ गतेबाट काममा लगाएका थिए ।

बाढी आएका बेला बालुवा झिक्दाझिक्दै डुबेका उनको अवस्था अझै अज्ञात छ । उनका आफन्तजनले क्षतिपूर्ति माग्दै गल्छी गाउँपालिका र गजुरीस्थित प्रहरी चौकीमा निवेदन दिएका छन् ।

गत मंगलबार पनि बालुवा निकाल्ने क्रममै खाल्डोमा फसेका खोटाङ बडापोखरी–१ का १९ वर्षीय चन्द्रमणि राई त्रिशूलीमै बेपत्ता छन् । गत चैत १३ गते नुहाउन गएका २० वर्षीय रविन राईको पनि बालुवा निकालेकै खाल्डोमा परेर मृत्यु भएको थियो । जथाभावी उत्खननले त्रिशूलीलगायत स्थानीय खोला किनारमा ठाउँठाउँमा बनेका गहिरा खाल्डाका कारण अकालमै ज्यान जाने घटना भइरहेका छन् ।

गत वर्षको साउन २५ मा गजुरी–६ दरियाल खोलामा यस्तै खाल्डोमा परेर २ युवकको मृत्यु भएको थियो । स्थानीय खोलामा बालुवा उत्खनन गरेर छाडेको खाल्डोमा उनीहरु परेका थिए । त्यसको केही दिनपछि नै धादिङ र नुवाकोट सिमानामा पर्ने ककनी गाउँपालिकाको कोल्पु खोलाको मुहानक्षेत्र कुमरीमा बालुवा निकाल्न खनेको खाल्डोमा परेर एक बालिकासहित २ जनाले ज्यान गुमाए । नुहाउन गएकी स्थानीय १३ वर्षीया विनीता खाल्डोमा डुबेकी थिइन्, उनलाई बचाउन गएकी लक्ष्मी तामाङको पनि खाल्डोमै डुबेर मृत्यु भएको थियो ।

उर्लंदो नदीमा बालुवा झिक्दा सुरक्षा सतर्कता नअपाउँदा हरेक वर्ष मजदुरहरुको मृत्यु हुने गरेको प्रहरीले जनाएको छ । जिल्ला प्रहरी कार्यालयका अनुसार यसरी खाल्डोमा परेर बर्सेनि ६ जना बढीको ज्यान जाने गरेको छ । नदीजन्य पदार्थ उत्खनन गर्ने मजुदरसँगै स्थानीय र पौडी खेल्न आएका बालबालिकाले यसरी ज्यान गुमाउने गरेका छन् । कतिपय पशुवस्तु पनि खाल्डोमा पर्ने गरेका स्थानीय बताउँछन् ।

नदीमा बालुवा झिक्दा न्यूनतम सुरक्षा सतर्कता अपनाउन सचेत गराइएको गल्छी गाउँपालिका अध्यक्ष कृष्णहरि श्रेष्ठले बताए । ‘कम्तीमा लाइफ ज्याकेट लगाएर पसे पनि जोखिम कम हुन्थ्यो,’ उनले भने, ‘हामीले मजदुर र बालुवा खरिद गर्नेहरूलाई सावधानी अपनाउन भनिसकेका छौं ।’

प्रकाशित : असार ३०, २०७७ २२:२१
पूरा पढ्नुहोस्
प्रतिक्रिया
पठाउनुहोस्
×