कान्तिपुर वेबसाईट
AdvertisementAdvertisement

एक महिनामा विदेशबाट १६७ वटा शव ल्याइयो

विदेशमा अलपत्र २७ हजार ५३२ नेपाली नेपाल फर्के 
सुरज कुँवर

काठमाडौँ — लकडाउनपछि सरकारले सुरु गरेको अलपत्र परेका नेपालीको उद्धार गर्ने क्रममा जेठ २८ देखि असार २८ सम्मको अवधिमा भएका चार्टर उडानबाट १ सय ६७ वटा नेपाली नागरिकको शव नेपाल ल्याइएको छ ।

छाउनीस्थित कोभिड–१९ सञ्चालन व्यवस्थापन केन्द्र (सीसीएमसी) का अनुसार यो एक महिनाको अवधिमा विदेशबाट नेपाली नागरिक फर्काउने क्रममा श्रम गन्तव्यबाट १ सय ६७ वटा शव पनि नेपाल ल्याइएको हो ।

यो अवधिमा २५ वटा मुलुकबाट करिब एक दर्जन वायुसेवाले १ सय ७५ वटा चार्टर उडान भएका थिए । ती चार्टर उडानले ८ वटा मध्यपूर्वी मुलुकबाट १ सय ६७ वटा नेपाली नागरिकहरुको शव ल्याएका थिए ।

यस अवधिमा साउदी अरबियाबाट ५९, मलेसियाबाट ४१, कतारबाट ४१, यूएईबाट १०, बहराइनबाट ६, कुवेतबाट ८, माल्दिभ्सबाट १ र ओमनबाट १ गरी १ सय ६७ वटा शव ल्याइएको हो ।

सीसीएमसीका सचिव महेन्द्र प्रसाद गुरागाईंका अनुसार अझै कतिपय श्रम मुलुकबाट शव ल्याउन बाँकी नै छ । उनले कोभिड–१९ बाहेक अन्य विभिन्‍न कारणले विदेशमा मृत्यु भएका नेपाली नागरिकहरुको शव यो अवधिमा नेपाल ल्याइएको कान्तिपुरसँग बताए ।

यो अवधिमा विभिन्‍न मुलुकमा अलपत्र परेका २७ हजार ५ सय ३२ नेपाली नागरिक नेपाल फर्केका छन् । जसमा प्रदेश १ का ५ हजार ६ सय ५५, प्रदेश २ का ४४ सय ८०, वाग्मती प्रदेशका ८ हजार ३९,गण्डकीका ३५ सय १८, प्रदेश ५ का ४५ सय ४९, कर्णालीका ६ सय १६ र सुदूरपश्चिम प्रदेशका ६ सय ७५ जना स्वदेश फर्किएका हुन् ।

प्रकाशित : असार २९, २०७७ १७:१०
प्रतिक्रिया
पठाउनुहोस्

समयमै भुक्तानी नपाएको भन्दै तालाबन्दी

एलिसा श्रेष्ठ

भोजपुर — समयमै भुक्तानी नपाएपछि भोजपुरका निर्माण व्यावसायीहरुले पूर्वाधार विकास कार्यालय भोजपुरको कार्यालयमा तालाबन्दी गरेका छन् ।

तोकिएको समयमा नै योजनाको काम सकेर बिल पेश गरेपनि प्रदेश सरकारले भुक्तानी नदिएपछि उनीहरु आन्दोलित बनेका हुन् ।

कोरोना भाइरस र अविरल वर्षाका बाबजुत पनि विकासे योजनाका कामहरु सकेर बिल पेश गरेपनि करोडौंको भुक्तानी नहुँदा व्यावसायी र कामदार समस्यामा परेको मार्सेली निर्माण सेवाका सञ्चालक श्याम श्रेष्ठले बताए ।

प्रदेश सरकारसँग पटकपटक ताकेता गर्दासम्म पैसा निकासा नगराइएको उनले आक्रोश पोखे । ‘कामदारहरुलाई काम मात्रै लगाएर हुन्छ ? उनीहरुको पनि परिवार छ, घर चलाउनुपर्छ । हामीले बादलझरी, दिनरात नभनी काम गर्‍यौं तर अहिलेसम्म पैसा निकासा गर्ने कुनै छाँटकाँट छैन,’ उनले भने । काम सम्पन्न गरी भुक्तानी पाउनु पर्ने रकम करिब १५ करोड रहेको व्यवसायीहरुले बताएका छन् ।

भुक्तानी नहुँदा व्यावसायीसँग सम्बद्व श्रमिक,व्यापारी र आम मजदुर समेत मारमा परेको अर्का निर्माण व्यावसायी उत्तम खड्काले जानकारी दिए । प्रदेश सरकारले योजनाका कामहरु सम्पन्‍न गर्दापनि भुक्तानीमा आनाकानी गरेको उनीहरुको गुनासो छ ।

भुक्तानी नभएसम्म व्यावसायीले कार्यालयमा अनिश्चितकालका लागि तालाबन्दी गर्ने बताएका छन् । यस्तै, अन्य सम्पूर्ण योजनाका कामहरु ठप्प पार्ने उनीहरुले बताएका छन् । पूर्वाधार विकास कार्यालय भोजपुर अन्तर्गत भोजपुरमा ३० र धनकुटामा २५ वटा योजनाहरु सञ्चालनमा रहेका छन् ।

प्रकाशित : असार २९, २०७७ १७:०४
पूरा पढ्नुहोस्
प्रतिक्रिया
पठाउनुहोस्
×