कान्तिपुर वेबसाईट
AdvertisementAdvertisement

लमजुङमा पहिरोमा पुरिएर एकै परिवारका तीन जनाको मृत्यु

आश गुरुङ

लमजुङ — बिहीबार रातिको भीषण वर्षापछि गएको पहिरोमा परी लमजुङमा एकै परिवारका ३ जनाको मृत्यु भएको छ । बेंसीसहर नगरपालिका–१०, खााचे घर भई हाल बेंसीसहर नगरपालिका ७, सातबिसेको तल्लो क्षेत्रमा बस्दै आएका अन्दाजी ३० वर्षीय दीपक तामाङ, उनकी पत्नी अन्दाजी २५ वर्षीया बिमाया तामाङ र उनीहरुका छोरा अन्दाजी ८ वर्षीय छेवाङ तामाङको पहिरोमा परी मृत्यु भएको हो ।

लमजुङको बेंसीसहर नगरपालिका-७, सातबिसेको तल्लो क्षेत्रमा रहेको पहिरोले पुरिएको दीपक तामाङको घर । तस्बिर: कान्तिपुर ।

उनीहरुलाई उद्धार गरी राति नै लमजुङ जिल्ला सामुदायिक अस्पताल पुऱ्याइए पनि चिकित्सकले मृत घोषणा गरेको डीएसपी गंगाबहादुरले बताए ।

बिहीबार राति साढे ८ बजेदेखि भीषण वर्षा भएको बेंसीसहरको सातबिसे क्षेत्रमा राति १० बजेतिर पहिरो गएको प्रहरीले बताएको छ ।

घरमा दीपकका आमाबुवा र छोरी पनि बस्दै आए पनि बिहीबार राति भने उनीहरु आफन्तकोमा गएको प्रहरीले बताएको छ । दीपकसँगै काम गर्ने बेंसीसहर नगरपालिका–७ का २६ वर्षीय सन्तबहादुर गुरुङ, बेंसीसहर–१० पांग्रेक्युका २३ वर्षीय अनिल गुरुङ, २३ वर्षीय सुमन गुरुङ घाइते भएका छन् । बेंसीसहरस्थित लमजुङ जिल्ला सामुदायिक अस्पतालमा उनीहरुको उपचार भइरहेको प्रहरीले जनाएको छ । घरदेखि करिब ५० मिटर माथिबाट पहिरो बग्दै गरेको थाहा पाएपछि घाइतेले हारगुहार गरेका थिए ।

प्रकाशित : असार २६, २०७७ ०८:०१
प्रतिक्रिया
पठाउनुहोस्

म्याग्दी पहिरोमा ३२ जना बेपत्ता [अपडेट]

पहिरोमा फसेका ३० जना उद्धारको पर्खाइमा रहे पनि खराब मौसमका कारण हेलिकोप्टर जान सकेन
घनश्याम खड्का

म्याग्दी — अविरल वर्षापछि आएको पहिरोमा परी म्याग्दीमा दर्जनौं घर पुरिनुका साथै ३२ जनाभन्दा बढी बेपत्ता भएका छन् । 


धौलागिरि र मालिका गाउँपालिकामा पहिरो गएको हो । धाैलागिरि–६ मराङमा भीम जुग्जाली, धनबहादुर जुग्जालीको परिवारमा मात्र कम्तीमा ७ जना बेपत्ता भएको वडाध्यक्ष राजाराम सुवेदीले बताए । उनका अनुसार पहिरोले बस्तीसँग यातायात सम्पर्क विच्छेद भएकाले कति क्षति भयो भन्ने अझै यकिन भइसकेको छैन । पहिरोमा फसेकाको उद्धार पनि हुन सकेको छैन ।

त्यसै गरी मालिका गाउँपालिका–७ बिमको तल्लोगाउँ तथा भारवाङमा गएको पहिरोमा परी सोमनाथ शर्मा पौडेलकी पत्नी विष्णु शर्मा (३५) र इच्छा पौडेल (५) सहित कम्तीमा ८ जना बेपत्ता भएका वडाध्यक्ष रेशम जुग्जालीले जानकारी गराए ।

‘बिमको पहिरोमा कम्तीमा ८ जना बेपत्ता भएको जानकारी आएको छ । वारिपारि दुवैतर्फ पहिरो गएको र बाढी आएकाले प्रहरीसमेत हामी कोही पनि घटनास्थल पुग्न सकेका छैनौं,’ उनले भने, ‘हेलिकोप्टरको सहयोग मागेका छौं । घटनास्थल पुग्न उपायको खोजी भइरहेको छ ।’

पहिरोमा मराङको घन्टवाङ र मालिकाको बिममा थुप्रै व्यक्ति बेपत्ता हुनुका साथै ३० जनाभन्दा बढी फसिरहेको जानकारी रहे पनि खराब मौसमका कारण उद्धारका लागि हेलिकोप्टर उड्न नसकेको जिल्ला आपत्कालीन कार्य सञ्चालन केन्द्रले जनाएको छ ।

‘पहिरोले बस्ती पूरै घेरिएकाले प्रहरी र स्थानीय उद्धारकर्तासमेत घटनास्थल पुग्न सकेका छैनन् । बेपत्ता र क्षतिको विवरण फोनको भरमा टिपेका छौं । पुष्टि भइसकेको छैन,’ प्रमुख जिल्ला अधिकारी ज्ञाननाथ ढकालले भने, ‘उद्धारका लागि गृहसँग हेलिकोप्टरको सहयोग मागेका छौं ।’

त्यसै गरी बाढीका कारण गलेश्वरस्थित राघुघाट खोलाको बेलीब्रिज बगेको छ । पुल बगाएपछि बाढी पिप्लेगलेश्वर बस्तीतर्फ सोझिएको छ । रघुगंगा, अन्नपूर्ण गाउँपालिका तथा मुस्ताङ जिल्ला अब यातायात सम्पर्कबाट पूर्ण विच्छेद भएका छन् ।

प्रकाशित : असार २६, २०७७ ०७:४३
पूरा पढ्नुहोस्
प्रतिक्रिया
पठाउनुहोस्
×