राष्ट्रपतिद्वारा संविधान संशोधन विधेयक प्रमाणीकरण- समाचार - कान्तिपुर समाचार
कान्तिपुर वेबसाईट
AdvertisementAdvertisement

राष्ट्रपतिद्वारा संविधान संशोधन विधेयक प्रमाणीकरण

कान्तिपुर संवाददाता

काठमाडौँ — लिम्पियाधुरा, कालापानी र लिपुलेक लगायतका भारतीय अतिक्रमणमा परेका क्षेत्रलाई समेटेर जारी गरेको नेपालको नक्सा संविधानको अनुसूची ३ मा व्यवस्था गरिएको नेपालको निसान छापमा राख्नका लागि गरिएको संविधान संशोधन विधेयक राष्ट्रपति विद्यादेवी भण्डारीले प्रमाणीकरण गरेकी छन् । 

सभामुख अग्‍निप्रसाद सापकोटाले बिहीबार प्रमाणित गरेर उक्त विधेयक प्रमाणीकरणका लागि राष्ट्रपतिसमक्ष पेस गरिएको थियो ।

राष्ट्रपति कार्यालयका प्रवक्ता हरिप्रसाद दाहालले राष्ट्रपतिले उक्त विधेयक प्रमाणीकरण गरेको एक विज्ञप्ति जारी गरेर जानकारी दिएका हुन् । 'आज मिति २०७७ साल असार ४ गते बिहीबारका दिन सम्माननीय राष्ट्रपति श्रीमती विद्यादेवी भण्डारीज्यूले संघीय संसदको दुवै सदनको बैठकबाट पारित भई प्रमाणीकरणको लागि पेस हुन आएको 'नेपालको संविधान (दोस्रो संशोधन) विधेयक, २०७७' नेपालको संविधानको धारा २७४ को उपधारा (१०) बमोजिम प्रमाणीकरण गर्नुभएको छ,' प्रवक्ता दाहालले जारी गरेको विज्ञप्तिमा भनिएको छ ।

विधेयक राष्ट्रिय सभाबाट बिहीबार र प्रतिनिधिसभाबाट जेठ ३१ गते पारित भएको थियो । दुवै सदनबाट विधेयक सर्वसम्मतिले पारित भएको थियो ।

सरकारले भारतीय अतिक्रमणमा परेका भू-भाग समेटेर जेठ ७ गते नक्सा जारी गरेको थियो । उक्त नक्साका आधारमा संविधान संशोधनका लागि जेठ ९ गते संविधान संशोधन विधेयक संघीय संसदको प्रतिनिधिसभामा दर्ता गरिएको थियो ।विधेयक प्रमाणीकरण भएसँगै नेपालको निसान छापमा नयाँ नक्सा प्रयोगमा आउनेछ ।

दार्चुलाको कालापानी, लिपुलेक र लिम्पियाधुरालाई भारतले अतिक्रमण गरेको छ । उक्त क्षेत्रको विषयमा छलफल गर्न नेपालले भारत सरकारलाई आग्रह गर्दा मानेको थिएन । भारतले गत कात्तिक महिनामा नक्सा जारी गरेर कालापानी क्षेत्रलाई आफ्नो नक्सामा राखेको थियो । त्यसपछि नेपालले विरोध जनाएको थियो । भारतलाई कूटनीतिक नोट पठाएर सीमा समस्या समाधानका लागि परराष्ट्र सचिवस्तरीय संयन्त्रको बैठक बस्नुपर्ने भन्दै प्रस्ताव गरेको थियो ।

पछिल्लो समय भारतले लिम्पियाधुरा भएर कैलाश मानसरोवर जाने सडक निर्माण गरेको थियो । जसको भारतीय रक्षामन्त्री राजनाथ सिंहले उद्घाटन गरेका थिए । नेपालले त्यसपछि पनि कूटनीतिक तवरमा छलफलका लागि मिति तोक्न भनेको थियो । भारतले भने कोरोना भाइरसको संक्रमण सकिएपछि वार्ता गर्ने भन्दै जवाफ दिएको थियो । त्यसपछि नेपालले नक्सा जारी गरेको हो । नक्जा जारी गर्नका लागि सरकारलाई सडक र संसदबाट बारम्बार दबाब गइरहेको थियो ।

प्रकाशित : असार ४, २०७७ १८:४४
प्रतिक्रिया
पठाउनुहोस्

सूदूरपश्‍चिममा बल्ल पुग्यो मनसुन

अब्दुल्लाह मियाँ

काठमाडौँ — गत शुक्रबार पूर्वी भाग हुँदै प्रवेश गरेको मनसुन बिहीबार सूदूरपश्चिमसम्मै पुगेको छ । जल तथा मौसम पूर्वानुमान महाशाखाका मौसमविद्हरुका अनुसार देशभर मनसुन फैलिए पनि वर्षा भने पूर्वी र मध्य भागमा केन्द्रित छ । 

औसत समयभन्दा दुई दिन ढिलो गरी ३० जेठ (१२ जुन) मा मनसुन प्रवेश भएको थियो । महाशाखाका वरिष्ठ मौसमविद् राजु प्रधानाङ्गका अनुसार यो गत वर्षभन्दा छिटो हो । सामान्यता नेपालमा १० जुनमा मनसुन प्रवेश हुने गर्छ । गत वर्ष औसत समयभन्दा १० दिन ढिलो गरी २० जुनमा मनसुन सुरु भएको थियो । यो वर्ष औसत समय आसपासमै मनसुन सुरु भई करिब एक साताभित्र देशैभर सक्रिय भएको छ । पूर्वका केही स्थानमा भारी वर्षासँगै पहिरो र बाढीको जोखिमसमेत बढेको छ । छिटो मनसुन प्रवेश भएकाले कोरोनाबाट आक्रान्त बनेका किसानलाई भने राहत मिलेको छ । वर्षासँगै मुलुकका धेरैजसो भागमा किसान रोपाइँमा व्यस्त भएका छन् ।

'विगतमा मनसुन प्रवेश भए पनि लामो समय निस्कृय हुँदा किसानले धान रोप्न पाउँथेनन् । यो पटक मनसुन छिट्टै सक्रिय भएको छ', मौसमविद् प्रधानाङ्गले भने, '६ दिनमै देशैभर पुगेको छ, वर्षा हुन थालेको छ ।'

मनसुन सुरु भएसँगै जल तथा मौसम विज्ञान विभागले संभावित बाढी र त्यसले निम्त्याउने सक्ने जोखिमबारे सतर्क गर्न २४ सै घन्टा बाढीसम्बन्धी सूचना दिन थालेको छ । त्यसका लागि बबरमहलस्थित विभागको मुख्यालयमा विज्ञहरु खटिएका छन् । खटिएका प्राविधिकले वर्षाका कारण मुलुकभरका ठूला, मझौला र साना नदीहरुमा आउनसक्ने बाढीबारे सूचना दिने गरेका छन् । बाढी पूर्वानुमान शाखामा खटिएका हाइड्रोलोजिस्ट सुनिल पोखरेलका अनुसार अझै करिब एक साता ठूला नदीहरुमा बाढीको सम्भावना छैन ।

कोसी, गण्डकी, कर्णाली र महाकाली ठूला नदी हुन् भने कन्काई, कमला, वाग्मती, नारायणी, पश्चिम राप्ती, तिनाउ, बबई र मोहनालगायत मझौला नदी हुन् । हाइड्रोलोजिस्ट पोखरेलले ठूला र मझौलाबाहेकका सहायक नदीहरुमा भने थोरै वर्षापछि पनि बाढीको रुप लिन सक्ने जानकारी दिए । विभागले मनसुन अवधिभर ठूला, मझौला र सहायक नदीमा वर्षापछि बग्ने पानीको सतहको अवस्था, सचेतनाको अवस्था (वार्निङ लेभल), खतराको अवस्था र त्यसले निम्त्याउन सक्ने जोखिमबारे वेबसाइटमा सूचना प्रवाह गर्ने गरेको छ । बिहीबारसम्म मुलुकका कुनै पनि नदीहरुमा पानीको सतह वार्निङ लेभलसम्म पनि पुगेको छैन । 'मनसुन सक्रिय हुने क्रममै भएकाले नदीहरुमा पानीको सतह बढेको छैन,' पोखरेलले कान्तिपुरसित भने, 'अझै करिब एक साता पानीको सतह बढ्ने नदेखिएकाले जोखिम छैन ।'

विभागले वर्षाका कारण ठूलो बाढीको सम्भावना भएको अवस्थामा बाढी आउनुअघि नै नदी आसपासमा बस्ने स्थानीयहरुलाई सतर्क गर्ने र बच्नका लागि मोबाइलमा मास एसएमएस पठाउने समेत गरेको छ । 'कुनै स्थानमा बाढीको खतरा देखिए पहिले नै हामीले सबै मोबाइलकर्तालाई सूचना पठाउने गरेका छौं', विभागका महानिर्देशक सरजुकुमार वैद्यले भने, 'यो वर्ष पनि हामीले मास एसएमएस पठाउने र सतर्कता अपनाउन अन्य सन्देश दिने तयारी गरेका छौं ।'

महाशाखाकाअनुसार बिहीबार राति प्रदेश १, प्रदेश २, वाग्मती प्रदेश र गण्डकी प्रदेशका थोरै स्थानहरुमा भारी वर्षाको सम्भावना छ । 'शुक्रबार दिउँसो प्रदेश १, प्रदेश २, वाग्मती प्रदेश, गण्डकी प्रदेश र प्रदेश नं ५ का धेरै स्थानहरुका साथै कर्णाली र सुदूरपश्चिम प्रदेशका थोरै स्थानहरुमा हल्कादेखि मध्यम वर्षाको सम्भावना छ । प्रदेश १, प्रदेश २ र गण्डकी प्रदेशका थोरै स्थानहरुमा भने भारी वर्षाको सम्भावना छ,' महाशाखाले बुलेटिनमा भनेको छ ।

शुक्रबार राति प्रदेश १, प्रदेश २, वाग्मती प्रदेश, गण्डकी प्रदेश र प्रदेश नं ५ का धेरै स्थानहरुमा साथै कर्णाली र सुदूरपश्चिम प्रदेशका थोरै स्थानमा हल्कादेखि मध्यम वर्षाको सम्भावना छ ।

शनिबार पनि प्रदेश १, प्रदेश २, वाग्मती प्रदेश, गण्डकी प्रदेश र प्रदेश नं ५ का धेरै स्थानहरुमा साथै कर्णाली र सुदूरपश्चिम प्रदेशका केही स्थानहरुमा वर्षाको संभावना रहेको महाशाखाले उल्लेख गरेको छ । वाग्मती प्रदेश, गण्डकी प्रदेश र प्रदेश नं ५ का एक दुई स्थानमा भारी वर्षाको सम्भावना रहेकाले सतर्क हुन आग्रह गरेको छ ।

शनिबार प्रदेश १, प्रदेश २, वाग्मती प्रदेश, गण्डकी प्रदेश र प्रदेश नं ५ का धेरै स्थानहरुमा साथै कर्णाली र सुदूर पश्चिम प्रदेशका थोरै स्थानहरुमा हल्कादेखि मध्यम र गण्डकी प्रदेशका थोरै स्थानहरुमा भारी वर्षाको संभावना रहेको महाशाखाले उल्लेख गरेको छ ।


प्रकाशित : असार ४, २०७७ १८:४०
पूरा पढ्नुहोस्
प्रतिक्रिया
पठाउनुहोस्
×