नयाँ नक्सा राजपत्रमा प्रकाशन हुने

बलराम बानियाँ

काठमाडौँ — भूमि व्यवस्था, सहकारी तथा गरिबी निवारण मन्त्रालयले लिम्पियाधुरा, लिपुलेक र कालापानी क्षेत्र समेटिएको नेपालको नयाँ राजनीतिक तथा प्रशासनिक नक्सा राजपत्रमा प्रकाशन गर्ने भएको छ ।

मन्त्रालयका सहसचिव एवं प्रवक्ता जनकराज जोशीले मन्त्रीस्तरीय निर्णय गरी शुक्रबार नयाँ नक्सा राजपत्रमा प्रकाशन गर्न मुद्रण विभागमा पठाइएको जानकारी दिए । उनका अनुसार मुद्रण विभागबाट राजपत्र शनिबारसम्म प्रकाशन भएर आइसक्ने छ । नयाँ नक्सा छापिएको राजपत्र आइतबार सबै मन्त्रालय, निकाय र प्रदेश सरकार र स्थानीय तहसहित राज्यका सबै कार्यालयलाई पठाइने छ ।

‘हाम्रो नयाँ नक्सा यो हो भनेर राज्यका सबै निकायलाई औपचारिक रूपमा जानकारी दिन राजपत्रमा प्रकाशन गरी वितरण गर्न लागिएको हो’ उनले कान्तिपुरसित भने ।

मन्त्रालय मातहतको नापी विभागले पहिलो चरणमा ३ हजार कपी नेपालको नयाँ नक्सा छापेर राज्यका सबै निकायलाई वितरण गर्ने भएको छ । विभागले नयाँ नक्साको छपाइ सुरु गरिसकेको छ । ती नयाँ नक्सा आइतबारदेखि राष्ट्रपति कार्यालय, उपराष्ट्रपति कार्यालय, प्रधानमन्त्री कार्यालय, सबै संवैधानिक निकाय र मन्त्रालय तथा मातहतका कार्यालयमा राख्न पठाइने जानकारी मन्त्रालयका अधिकारीले दिएका छन् ।

ती अधिकारीका अनुसार सबै प्रदेश र स्थानीय तहसहित सबै सरकारी कार्यालयलाई समेत नयाँ नक्सा उपलब्ध गराइने छ । लकडाउनका कारण नयाँ नक्साको हार्डकपी पठाउन गाह्रो भएमा मन्त्रालयको वेबसाइटमा रहेको नयाँ नक्सा प्रिन्ट गरी कार्यालयमा राख्न सबै निकायलाई आग्रह गरिएको जानकारीसमेत मन्त्रालयका अधिकारीले दिएका छन् ।

मन्त्रिपरिषदले सोमबार भूमि व्यवस्था मन्त्रालयको प्रस्तावमा लिम्यिाधुरा, लिपुलेक र कालापानी क्षेत्र समेटिएको नेपालको नयाँ राजनीतिक तथा प्रशासनिक नक्सा पारित गरेको थियो । भूमि व्यवस्था मन्त्रालयले बुधबार नयाँ नक्सासमेत सार्वजनिक गरिसकेको छ । सरकारले नयाँ नक्सासँगै भारतीय कब्जामा रहेका लिम्पियाधुरा, लिपुलेक र कालापानी फिर्ता ल्याउन भारतसित कूटनीतिक पहल सुरु गर्दैछ ।

सरकराले ने शुक्रबार नै संविधानको अनुसूची ३ मा रहेको निशान छापमा अंकित नेपालको नक्सा परिवर्तन गर्न संविधान संशोधन प्रस्ताव संघीय संसदमा दर्ता गरेको छ । संघीय संसदका दुवै सभाको दुई तिहाइ बहुमतबाट संशोधन प्रस्ताव पारित भई राष्ट्रपतिबाट प्रमाणीकरण भएपछि संविधानको अनुसूची ३ मा नेपालको नयाँ नक्सा राखिने छ ।

त्यसपछि नेपालको नयाँ नक्सा औपचारिक रूपमा प्रचलनमा आउने । प्रधानमन्त्री तथा मन्त्रिपरिषद कार्यालयले संविधान संशोधनसँगै निशान छाप अंकित सबै सरकारी लेटरप्याड र लोगो परिवर्तन गर्न सर्कुलर जारी गर्नेछ । निशान छाप अंकित संघीय सांसद र प्रदेश सभा सदस्यको लोगोसमेत परिवर्तन हुने छ भने अब सरकारी दस्तावेज र प्रकाशनमा समेत नयाँ नक्सा भएको निशान छाप र लोगो प्रयोग गर्न थालिने छ ।

विद्यालय तथा विश्वविद्यालयका पाठ्यपुस्तकमा समेत नेपालको नयाँ नक्सा राख्न लगाइने छ । निजी क्षेत्र तथा गैरसरकारी संघसंस्थालाई समेत नयाँ नक्सा प्रचलनमा ल्याउन आग्रह गरिने जानकारी मन्त्रालयका अधिकारीले दिए ।

प्रकाशित : जेष्ठ ९, २०७७ १७:०७
ADVERTISEMENT
प्रतिक्रिया
पठाउनुहोस्
ADVERTISEMENT

बैतडीमा कोरोना संक्रमण पुष्टि भएका पुरुष थुनुवा, प्रहरी कार्यालय सील

तृप्ति शाही

बैतडी — बैतडीमा पनि एक जनामा कोरोना संक्रमण देखिएको छ । शुक्रबार जिल्ला प्रहरी कार्यालयको हिरासतमा रहेका थुनुवामा कोरोना संक्रमण पुष्टि भएको स्वास्थ्य कार्यालय बैतडीका प्रमुख योगेश भट्टले जानकारी दिए ।

जिल्लाकै शिवनाथ गाउँपालिकाका २ घर भएका २२ वर्षीय पुरुषलाई वैशाख १५ गते प्रहरीले पक्राउ गरेर थुनुवा कक्षमा राखेको थियो । बिहे गर्छु भनेर लिएकी किशोरी खोलामा मृत अवस्थामा खोलामा फेला परेपछि प्रहरीले उनलाई नियन्त्रणमा लिएर म्याद थप गर्दै अनुसन्धान गरिरहेको थियो । उनैलाई कोरोना देखिएको हो । उनी सँगै उनको बहिनी पनि घटनामा सम्लग्न रहेको भन्दै पक्राउ परेकी थिइन् । उनको रिपोर्ट भने नेगेटिभ आएको छ ।

प्रमुख भट्टका अनुसार संक्रमित सँगै हिरासतमा रहेका अन्य दुई जनाको रिपोर्ट पनि नेगेटिभ आएको छ । उनी २ महिनाअघि भारतबाट आएका प्रहरीले जनाएको छ । उनीसँग सम्पर्कमा आएकाहरुको खोजी गर्ने स्वास्थ्य कार्यालयले जनाएको छ । संक्रमितलाई बैतडी जिल्ला अस्पतालको आइसोलेसनमा राख्ने तयारी भइरहेको अस्पतालका प्रमुख डा वसन्तराज जोशीले बताए ।

संक्रमित फेला परेसँगै जिल्ला प्रहरी कार्यालय बैतडीलाई सील गरिएको छ । थुनुवामा नै कोरोनाको संक्रमण देखिएपछि कार्यालयलाई नै सील गरिएको जिल्ला प्रहरी प्रमुख प्रहरी नायव उपरीक्षक डिल्लीनारायण पाण्डेयले बताए ।

प्रकाशित : जेष्ठ ९, २०७७ १७:०६
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×