बाँकेको क्वारेन्टाइनमा २५ वर्षीय युवकको मृत्यु

२ घन्टासम्म भएको थियो बान्ता, कोरोना भए–नभएको रिपोर्ट आउन बाँकी
मधु शाही

नेपालगन्ज — बाँकेको नरैनापुर गाउँपालिकामा क्वारेन्टाइनमा रहेका एक जना २५ वर्षीय युवकको आइतबार बिहान ४ बजे मृत्यु भएको छ । गाउँपालिकाको मटैया-५ स्थित दिपेन्द्र प्राविको क्वारेन्टाइनमा बस्दै आएका उनको शनिबार मात्रै स्वाब संकलन गरी कोरोनाको लागि पीसीआर परीक्षण गर्न लगिएको थियो ।

नतिजा आइनसकेकाले उनको मृत्यु कोरोना भाइरसले भएको हो या होइन भन्नेमा पृष्टि भइनसकेको बाँकेका जनस्वास्थ्य फोकल पर्सन नरेश श्रेष्ठले बताए ।

क्वारेन्टाइनका इन्चार्ज प्रेम बुढाका अनुसार मृतकलाई राति अचानक बान्ता आएपछि जीवनजल खान दिइएको थियो । जीवनजल खाएको दुई घन्टासम्म पनि उनको बान्ता नरोकिएको र उनको मृत्यु भएको बुढाले जानकारी दिए ।

दिपेन्द्र प्राविको क्वारेन्टाइनमा रहेका चार जनामा यसअघि कोरोना संक्रमण पुष्टि भइसकेको छ । बान्ता भएकै कारण युवकको मृत्यु भएकाले क्वारेन्टाइनमा रहेका २ सय ३ जनासहित स्वास्थ्यकर्मी र सुरक्षाकर्मीसमेत त्रासमा रहेको बुढाले बताए ।

मृतक युवक भारतको महाराष्ट्रदेखि आएका थिए । हिँडेरै आएका उनी सीमामा हप्तौ बसेको इन्चार्ज बुढाले जानकारी दिए । नरैनापुर गाउँपालिकामा भारतदेखि आएका ५ सयभन्दा बढीलाई क्वारेन्टाइनमा राखिएको छ । जसमध्ये पीसीआर परीक्षणबाट ८ जनालाई कोरोना भाइरस संक्रमण देखिएको छ ।

प्रकाशित : जेष्ठ ४, २०७७ १०:३२
प्रतिक्रिया
पठाउनुहोस्
ADVERTISEMENT
ADVERTISEMENT

७ वर्षीय संक्रमित बालकका आफन्तलाई हेटौंडा ल्याइयो

सुवास विडारी

मकवानपुर — काठमाडौंमा कोरोना भाइरसको संक्रमण पुष्टि भएपछि थाहा नगरपालिकाका सात वर्षीय बालकको घर र मामाघरको परिवारलाई स्वाब परीक्षणका लागि आइतबार बिहान हेटौंडा ल्याइएको छ ।

थाहा नगरपालिका–७ स्थित चल्तीमा रहेको उनको घरका परिवार र गैरीगाउँमा रहेका मामाघरका परिवारका ११ जनालाई हेटौंडास्थित आइसोलेसन वार्डमा स्वाब परीक्षणका लागि ल्याइएको थाहा नगरपालिकाका मेयर लबशेर विष्टले जानकारी दिए । ‘बालकमा कोरोना पुष्टि भएसँगै हाम्रो नगरपालिकामा उपलब्ध स्रोत साधनबाट उच्च सतर्कताका साथ हामीले बालकको घर र उनको परिवारलाई हेटौंडा ल्याएका छौं । आजै पीसीआर परीक्षण गर्ने तयारी भइरहेको छ,’ उनले भने ।

हेटौंडा–४ स्थित आइसोलेसन वार्डका इञ्चार्ज भोला चौलागाईंका अनुसार उनीहरुको स्वाब संकलन गरी परीक्षणका लागि किटजन्य रोग नियन्त्रण तथा तालिम केन्द्र पठाइसकिएको छ । चौलागाईंका अनुसार उनीहरुको स्वास्थ्य अवस्था सामान्य रहेको छ । उनीहरुलाई आइतबार बिहान १ बजेतिर हेटौंडा ल्याइएको थियो ।

मेयर विष्टका अनुसार कोरोना संक्रमित बालक पालुङबाट वैशाख २९ गते काठमाडौंको सतुंगलस्थित डेरामा गएका थिए । उनमा जेठ २ गते कोरोना संक्रमण पुष्टि भएको थियो । उनी हाल काठमाडौंको बलम्बुस्थित सशस्त्र प्रहरीका आइसोलेसन वार्डमा उपचाररत् छन् । बालकको सम्पर्कमा आएका अन्य व्यक्तिको पनि कन्ट्याक्ट ट्रेसिङ भइरहेको छ ।

आइतबार बिहानसम्म हेटौंडाको आइसोलेसन वार्डमा २८ जना रहेका छन् । आइसोलेसन वार्डमा भारतबाट फर्किएका १४, एकजना प्रहरी, ज्वरोको बिरामी एकजना र सडकमै बस्ने दुई जना व्यक्ति रहेका छन् । भारतबाट हेटौंडासम्म आएका सबै तीनदिन भारतबाट पैदल यात्रा गर्दै १२ दिन भारतको बाबागञ्जलगायतका क्वारेन्टाइनमा बस्दै नेपालगञ्ज आएका थिए ।

चौलागाईंका अनुसार भारतबाट आएकाहरुको नेपालगञ्जमा आरडीटी गर्दा नेगेटिभ देखिएपछि प्रतिव्यक्ति तीनहजार पाँचसय रुपैयाँ भाडा तिरेर हेटौंडा आएका थिए । हाल उनीहरुको स्वास्थ्य अवस्था भने सामान्य रहेको चौंलागाईंले बताए ।

प्रकाशित : जेष्ठ ४, २०७७ १०:२१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×