बाझ्यो क्याबिनेट र समन्वय समितिको निर्णय

कान्तिपुर संवाददाता

काठमाडौँ — स्वास्थ्य उपकरण खरिदका सन्दर्भमा मन्त्रिपरिषद् र कोभिड–१९ संक्रमण रोकथाम तथा नियन्त्रण समन्वय समितिले गरेको निर्णय नै आपसमा बाझिएका छन् ।

मन्त्रिपरिषद्को चैत १६ को निर्णय भन्दै रक्षा र स्वास्थ्य मन्त्रालयमा गरिएको परिपत्रमा स्वास्थ्य सामग्री सरकार–सरकार (जीटूजी) विधिबाट खरिद गर्ने र त्यसको जिम्मा नेपाली सेनालाई दिने भनिएको छ । त्यसै आधारमा सेनाले सामग्री खरिदका लागि छलफलसमेत थालिसकेको अवस्थामा फेरि स्वास्थ्य मन्त्रालयले नै टेन्डर आह्वान गर्ने आशयको निर्णय समन्वय समितिबाट सार्वजनिक भएको छ ।


बिहीबार बसेको समिति बैठकको शुक्रबार सार्वजनिक गरिएको निर्णय नम्बर ११ मा भनिएको छ, ‘कोभिड–१९ को संक्रमण रोकथाम तथा नियन्त्रण गर्न आवश्यक पर्ने औषधि तथा उपकरणहरू निजी क्षेत्रबाट प्रतिस्पर्धात्मक रूपमा खरिद गर्ने व्यवस्था स्वास्थ्य तथा जनसंख्या मन्त्रालयले मिलाउने । निर्धारित अवधिभित्र निजी क्षेत्रबाट प्रतिस्पर्धात्मक रूपमा औषधि, उपकरण तथा सामग्री पर्याप्त आपूर्ति हुन नसकेमा जीटूजी प्रक्रिया अवलम्बन गरी खरिद गर्ने ।’


बिहीबार समितिमा यस विषयमा छलफल भए पनि निर्णय नभएको बैठकपछि प्रवक्ता युवराज खतिवडाले पत्रकारहरूलाई बताएका थिए । उता सेनामार्फत स्वास्थ्य सामग्री किन्ने सरकारको परिपत्र गएपछि स्वास्थ्य सेवा विभागले टेन्डर आह्वान गर्न रोकेको थियो । ‘हामीले टेन्डर आह्वान गर्ने तयारी गरेका थियौं,’ विभागका महानिर्देशक महेन्द्र श्रेष्ठले बिहीबार कान्तिपुरसँग भनेका थिए, ‘तर नेपाली सेनाले नै खरिद प्रक्रिया अगाडि बढाउने खबर पाएपछि रोक्यौं ।’


अहिले भने श्रेष्ठले जतिसक्दो छिटो टेन्डर आह्वान गर्ने बताएका छन् । उनले कति उपकरण चाहिन्छ भन्ने विषयमा क्राइसिस म्यानेजमेन्ट सेन्टर (सीसीएमसी) अन्तर्गतको उपसमितिमा छलफल भइरहेको जानकारी दिँदै एक–दुई दिनमै टेन्डर आह्वान गर्ने बताए । ‘अब छिट्टै उपकरण ल्याइसक्नुपर्ने टाइमलाइनसहितको २४ घण्टे सूचना जारी गर्छौं,’ श्रेष्ठले भने ।


स्रोतका भनाइमा, पहिले २४ घण्टे टेन्डर खोल्ने र त्यसमा सन्तोषजनक प्रस्ताव नआएको कारण देखाउँदै सेनामार्फत जीटूजी प्रक्रिया थाल्ने तयारी हुन सक्छ ।

प्रकाशित : चैत्र २२, २०७६ १०:०४
प्रतिक्रिया
पठाउनुहोस्
ADVERTISEMENT

खगेन्द्र लामिछानेको रोजाइका १० फिल्म 

रीना मोक्तान

काठमाडौँ — आफैंले लेखेको नाटक 'पानीफोटो'मा व्यस्त थिए कलाकार खगेन्द्र लामिछाने । आफ्नो पहिलो निर्देशन रहेको फिल्मको काम अगाडि बढ्न  सकेन । सरकारले लकडाउन घोषणा गरेसँगै फिल्मको काम स्थगित गरेर उनी घरतिरै छन् ।

नयाँ फिल्मको स्क्रिप्ट लेख्दैछन् । नयाँ प्रोजेक्ट आगामी दशैंबाट छायांकनमा जाने तयारी छ । आफ्नो लकडाउन स्क्रिप्ट लेखेरै बितिरहेको उनी सुनाउँछन् ।

'म काठमाडौंमै छु । दशैंपछाडि गर्ने भनेको प्रोजेक्टको स्क्रिप्टमा छु । अहिले त्यही स्क्रिप्टको रि-राइट गरिरहेको छु' उनले भने । खगेन्द्र 'बधशाला', 'टलकजंग भर्सेज टुल्के' र 'पशुपतिप्रसाद'जस्ता फिल्मबाट स्थापित भएका कलकार हुन् । खगेन्द्र पुस्तकका लेखक पनि हुन् । उनले लेखेको पछिल्लो फिल्म 'धनपति' हो भने उनको कथासंग्रह 'फूलानी' प्रकाशित छ ।

यो लकडाउनको अवधि अधिकांश फिल्मप्रेमी दर्शकका लागि त फिल्म हेर्ने गज्जबको समय नै हो । लकडाउनमा रहेका दर्शकका लागि यहाँ खगेन्द्रले आफूलाई मनपरेका १० फिल्म सिफारिस रेका छन् । यी फिल्महरु उनले कुनै धेरै अगाडि हेरेका हुन् भने केही हालसालै ।


उनी फिल्म हेरेपछि दर्शकले फिल्मप्रति आफ्नै धारणा बनाउनुपर्ने मान्यता राख्छन् । त्यसैले तल दिएका फिल्ममाथि उनले कुनै धारणा दिएका छैनन् । 'यी फिल्म मैले हेरेर रिकमेन्ड गरें, अब दर्शकले आफ्नो तरिकाले हेर्ने हो । दर्शकले फिल्म हेरेर आफ्नो धारणा आफैं बनाउन जरुरी हुन्छ । फिल्ममात्र होइन पुस्तक पढ्दा अथवा नाटक हेर्दा होस्, मूल्यांकन आफैंले गर्ने हो,' उनले भने । लकडाउनको खाली समय फिल्मप्रेमी दर्शकका लागि उनले दिएको फिल्महरु असली खुराक हुन सक्छन् । यस्ता छन् खगेन्द्रको रोजाइका फिल्म :

१. बाइसाइकल थिफ्स, निर्देशक : भिट्टेरियो डेसिका, इटाली
२. द व्बोइ इन्द द स्ट्रिप्ड पाइजामा, निर्देशक : मार्क हरमन, बेलायत
३. द टर्मिनल, निर्देशक : स्टिवन स्पिलवर्ग, अमेरिका
४. द बिज्रेज अफ मेडिसन काउन्टी, निर्देशक : क्लिन्ट इस्टवुड, अमेरिका
५. ह्वाट्स इटिङ गिलबर्ट ग्रेप, निर्देशक : लेसी ह्यालस्ट्रोम, अमेरिका
६. रसोमन, निर्देशक : अकिरो कुरोसावा, जापान
७. प्यारासाइट, निर्देशक : बोङ जोन हु, कोरिया
८. पाथेर पांचाली, निर्देशक : सत्यजित रे, भारत
९. फोरेस्ट गम्प, निर्देशक : रोबर्ट जेमिक्स, अमेरिका
१०. नुमाफुङ, निर्देशक : नवीन सुब्बा, नेपाल

प्रकाशित : चैत्र २२, २०७६ ०९:५८
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×