उच्च सावधानीसहित कान्तिपुर वितरण
काठमाडौँ — कान्तिपुर मिडिया ग्रुप (केएमजी) ले कान्तिपुर, दी काठमान्डू पोस्टलगायत आफ्ना प्रकाशनहरु उच्च सजगता एवम् आवश्यक सुरक्षा विधि अवलम्बन गरी पाठकसमक्ष पुर्याउँदै आएको जनाएको छ । कोरोना भाइरस (कोभिड–१९ )को सम्भावित संक्रमण हुन नदिन आवश्यक विधि अपनाएर मात्र पत्रिकाहरुको मुद्रण एवम् वितरण गर्ने गरिएको छ ।
केएमजी व्यवस्थापनका अनुसार प्रेसमा काम गर्ने प्राविधिक र वितरण कार्यमा खटिने वितरण वाहकहरुलाई मास्क, मेडिकल पञ्जा र स्यानिटाइजरको व्यवस्था गरिएको छ ।
उनीहरुले निर्धारित सुरक्षा उपायहरु अपनाएर मात्र ग्राहकको घर–घरमा पत्रिका वितरण गर्ने गरेका छन् । पत्रिका प्रकाशन कार्यमा जोडिने अन्य सबै कर्मचारीहरुको पनि नियमित ज्वरो परिक्षण गरिँदै आएको छ । हालको प्रतिकूल परिस्थितिमा पनि उच्च सावधानीसहित पाठकहरुसमक्ष कान्तिपुर पुर्याइँदै केएमजीले जनाएको छ ।