सोमबारबाट एक जिल्लाबाट अर्को जिल्लामा सार्वजनिक यातायात चलाउन नपाइने

विमल खतिवडा

काठमाडौँ — सोमबारबाट केही समयका लागि एक जिल्लाबाट अर्को जिल्लामा सार्वजनिक यातायात सञ्‍चालनमा सरकारले रोक लगाएको छ । कोभिड–१९ को त्रास बढेसँगै सरकारले सावधानी अपनाउन भन्दै सरकारले यस्तो निर्णय गरेको हो । सोमबारबाट सरकारले लामो दूरीका सार्वजनिक सवारीसाधन सञ्चालनमा रोक लगाएको हो ।

लामो दूरी भन्नाले २ सय ५० किमिभन्दा टाढालाई मानिएको छ । ‘२ सय ५० किमि कानुनी रूपमा हो,’ भौतिक पूर्वाधार तथा यातायात मन्त्रालयका सचिव देवेन्द्र कार्कीले भने, ‘हामीले भन्न खोजेको सहरभित्र चल्न पाउनेछन्, सहरबाट बाहिर जान भने पाउनेछैनन् ।’ सहरका जुनसुकै ठाउँमा पनि सवारीसाधन चल्न पाउँछन् । एक जिल्लाबाट अर्को जिल्लामा भने जान पाउनेछैनन् ।


सहरभित्र चल्ने सार्वजनिक साधनमा भने अवरोध हुनेछैन । भौतिक पूर्वाधार तथा यातायात मन्त्रालयले शनिबार साँझ सूचना जारी गर्दै घर फर्कन चाहनेले रोक लगाउनुअघि नै प्रबन्ध गर्न आग्रह गरेको थियो । ‘सरकारको यो निर्णय स्वागतयोग्य छ,’ यातायात व्यवसायी राष्ट्रिय महासंघका महासचिव सरोज सिटौलाले भने, ‘अहिलेको अवस्थामा रोगबाट जोगिन सबैले स्वास्थ्य सतर्कता अपनाउन जरुरी छ ।’


बुधबारसम्मको टिकट बुक भए पनि सोमबारबाट लामो दूरीका सवारी बन्द हुने भएपछि यात्रुले आइतबार टिकट सारेर घर फर्किएका छन् । केही यात्रुले भने टिकट नपाएपछि घर जान नपाएको गुनासो गरेका छन् ।


‘पूरै लकडाउन नभए पनि मुभमेन्ट नहोस् भन्न यस्तो गरिएको हो, जो जहाँ छ, त्यहीँ बस भन्न खोजिएको हो,’ उनले भने । निजी र मालबाहक साधनलाई भने नरोकिने उनको भनाइ छ । प्रधानमन्त्री केपी शर्मा ओलीले चैत ७ मा गरेको सम्बोधनमा भनिएअनुसार लामा दूरीका सवारीमा रोक लगाइएको मन्त्रालयले जनाएको छ ।


‘सहरभित्र चलाउन पाइयो तर एकबाट अर्को जिल्ला जान पाइएन,’ महानगरीय ट्राफिक प्रहरी महाशाखा प्रमुख (एसएसपी) भीमप्रसाद ढकालले भने, ‘यो नियम देशभरका सबै जिल्लामा लागू हुनेछ ।’ काभ्रेबाट काठमाडौं चल्ने स्थानीय रुटका गाडी पनि चल्न नपाउने उनको भनाइ छ । ‘उपत्यकाका तीन जिल्ला भक्तपुर, ललितपुर र काठमाडौंलाई एउटै सहर मानेर यी जिल्लामा लोकल गाडी चल्ने व्यवस्था गरिएको छ,’ उनले भने, ‘अघिपछि जस्तो काभ्रेबाट काठमाडौं यात्रु लिएर गाडी आउन भने पाउनेछैनन् ।’


महानगरिय ट्राफिक प्रहरी महाशाखाका अनुसार बुधबारयता ६ लाख ९२ हजार ५ सय २४ जनाले उपत्यका छाडेका छन् । सोमबारबाट लामो दूरीको गाडी बन्द हुने भएपछि आइतबार एकै दिन २ लाख २२ हजार ४ सय ७ जनाले उपत्यका छाडेको ढकालले जानकारी दिए ।

प्रकाशित : चैत्र ९, २०७६ २०:२५
प्रतिक्रिया
पठाउनुहोस्
ADVERTISEMENT
ADVERTISEMENT

चीन र भारतसँगको सीमा नाका एक हप्ता बन्द गर्ने मन्त्रिपरिषद्को निर्णय

बिनु सुवेदी, जयसिंह महरा

काठमाडौँ — सरकारले सोमबार बिहान १० बजेदेखि एक हप्तासम्म भारत र चीनसँगको सीमा नाकामा आवागमन पूर्णरुपमा बन्द गर्ने निर्णय गरेको छ । कोरोना भाइरस (कोभिड १९) को उच्च जोखिमलाई ख्याल गर्दै आइतबार साँझ बसेको मन्त्रिपरिषद् बैठकले छिमेकी देश चीन र भारतको सीमा नाकाबाट चैत १० बिहान १० देखि १६ गतेसम्म यात्रु आवागमन स्थगित गर्ने निर्णय गरेको हो ।

भारतसँग ३९ मोटरेबल, १ सय २५ सामान्य नाका, चीनसँग २ मोटरेबल र अन्य ४ वटा नाका छन् ।

यस्तै कोभिड १९ को महामारीका रोकथामका लागि चिकित्साकर्मीले उपयोग गर्ने व्यक्तिगत सुरक्षा उपकरण, मास्क, थर्मोमिटर, भेन्टिलेटर, मनिटरलगायत सामग्री किन्‍न ५० करोडको केन्द्रीय कोष खडा गर्ने निर्णय भएको अर्थ, सञ्‍चार तथा सूचना प्रविधिमन्‍त्री युवराज खतिवडाले जानकारी दिए । उक्त कोषका लागि सबै मन्त्री १/१ महिनाको पारिश्रमिक दिने निर्णय पनि गरिएको छ ।

त्यस्तै अन्य सहयोगीहरुले पनि रकम जम्मा गर्न सकिन मन्‍त्री खतिवडाले जनाए ।कोषमा जम्मा रकम कोरोना संक्रमितको उपचार, संरचना तयार लगायतमा खर्च गरिने भएको छ ।

यस्तै सशस्त्र प्रहरीको बलम्बुस्थित एपीएफ अस्पताललाई कोरोना संक्रमितको उपचारका लागि विकास गर्ने र अस्पताल उपचारमा सेना, प्रहरी र सशस्त्रका चिकित्सक टोली खटाउने निर्णय गरिएको छ । त्यस्तै चिकित्साका लागि आवश्यक औषधि, उपकरण, सुरक्षाका सामग्रीका लागि सहयोगी मित्रराष्ट्र दातृ निकायहरुसँग सहकार्य गरी परराष्ट्र, स्वास्थ्य मन्त्रालयको सहयोगमा अर्थमन्त्रालयले पहल गर्ने निर्णय भएको उनले जानकारी दिए ।

प्रकाशित : चैत्र ९, २०७६ २०:१२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×