'संक्रमण फैलिएको मुलुकबाट आएका नेपाली घरमै क्वारेन्टाइनमा बस्नुस्'
काठमाडौँ — प्रधानमन्त्री केपी शर्मा ओलीले कोरोना भाइरस (कोभिड-१९)को संक्रमण फैलिएको मुलुकबाट स्वदेश फर्किएका नेपालीलाई घरमै क्वारेन्टाइनमा बस्न आग्रह गरेका छन् । कोरोनाको विषयमा शुक्रबार साँझ ६ बजे राष्ट्रका नाममा सम्बोधन गर्दै ओलीले संक्रमण फैलिएको मुलुकबाट फर्किएकालाई घरमै क्वारेन्टाइन बनाएर बस्न आग्रह गरेका हुन् ।
प्रधानमन्त्रीले भने, 'संक्रमित मुलुकबाट नेपाल आएका सबैले आफू बच्न, आफ्नो परिवारलाई बचाउन र समुदायलाई संक्रमणबाट जोगाउन कम्तीमा १४ दिन घरमा क्वारेन्टाइनमा बस्नुपर्छ ।'
संक्रमण फैलिएको मुलुकबाट फर्किएका नागरिकले जिम्मेवार नागरिकको भूमिका निर्वाह गर्ने प्रधानमन्त्री ओलीको विश्वास छ । 'सबै दिदीबहिनी तथा दाजुभाईहरूले यस अप्ठ्यारो घडीमा जिम्मेवार नागरिकको भूमिका निर्वाह गर्नुहुनेछ भन्ने मैले विश्वास लिएको छु,' उनले भनेका थिए ।
सरकारले शुक्रबार राति १२ बजेपछि हवाई माध्यम भएर नेपाल प्रवेश गर्न कडाइ गर्ने भएको छ । अन्तर्राष्ट्रिय विभानस्थल भने पूर्णतः बन्द नहुने नागरिक उड्डयन प्राधिकरणले जनाएको छ । प्राधिकरणका अनुसार बैंककको थाई एयर, चीनका एयर चाइना, चाइना साउर्दन र चाइना इस्टर्न तथा सिंगापुरको सिल्क एयरका उडान नियमित भएका छन् । अमेरिका, अष्ट्रेलिया लगायतका मुलुकबाट आउनेहरूलाई प्रवेश दिइरहेको विमानस्थल स्रोतले जानकारी दिएको छ । भारतबाट आउने यात्रुहरूलाई पनि हवाइ क्षेत्रबाट आइरहेको विमानस्थल स्रोतले जानकारी दिएको छ ।
कतार लगायत खाडी लगायतका मुलुकमा रहेका नेपाली पनि स्वदेश फर्किने वा डिपोर्ट गरिएर नेपाल आउने क्रम जारी रहेको छ । त्यस्तै कोरोनाको संक्रमण फैलिइरहेको छिमेकी भारतबाट स्थलमार्ग भएर नेपाल फर्किनेहरूको संख्या ठूलो छ । यस्तो अवस्थामा प्रधानमन्त्री ओलीले उनीहरूलाई घरमै क्वारेन्टाइन बनाएर बस्न आग्रह गरेका हुन् ।
यसअघि स्वास्थ्य तथा जनसंख्यामन्त्री भानुभक्त ढकालले सरकारले विदेशबाट आउने सबैलाई क्वारेन्टाइनमा राख्न नसक्ने भएकाले घरमै 'सेल्फ क्वारेन्टाइन' बस्न आग्रह गरेका थिए ।
प्रधानमन्त्रीले विदेशमा रहेका र नेपाल आउन खोजेका नेपालीहरूलाई नआत्तिएर आफू रहेको देशमा बस्न र त्यहाँस्थित नेपाली दूतावाससँग सम्पर्क राख्न आग्रह गरेका छन् । विदेशमा रहेका नेपालीहरूको समस्या समाधान गर्न कूटनीतिक नियोगहरूले सहयोग गर्ने पनि प्रधानमन्त्रीले बताएका छन् ।
मुलुकभित्र भने कोरोनाको संक्रमण रोकथाम, नियन्त्रण र उपचारका लागि सरकारले कुनै कसर बाँकी नराख्ने प्रधानमन्त्री ओलीको भनाइ छ । उनले देशभरका अस्पतालहरूबाट सेवा प्रदान गर्ने, पर्याप्त औषधि र उपकरणको प्रबन्ध गर्ने, आवश्यक जनशक्तिको व्यवस्था गर्ने कार्यलाई उच्च प्राथमिकतामा राखिएको जानकारी दिएका छन् ।
कोरोना संक्रमण रोक्न र उपचारका लागि चिकित्सक, नर्स, स्वास्थ्यकर्मी र सुरक्षा निकाय लगायतका जनशक्तिलाई उचित प्रोत्साहन सहित उच्च मनोबलका साथ परिचालन गर्ने व्यवस्था मिलाइएको प्रधानमन्त्रीको भनाइ छ ।
प्रकाशित : चैत्र ७, २०७६ १९:१४