अत्यावश्यकबाहेकका सेवा चैत ९ देखि २१ गतेसम्म बन्द, के-के पर्छन् ?- समाचार - कान्तिपुर समाचार

अत्यावश्यकबाहेकका सेवा चैत ९ देखि २१ गतेसम्म बन्द, के-के पर्छन् ?

कान्तिपुर संवाददाता

काठमाडौँ — प्रधानमन्त्री केपी शर्मा ओलीले शुक्रबार राष्ट्रका नाममा गरेको सम्बोधनमा राजपत्रमा प्रकाशित अत्यावश्यकबाहेकका सेवाहरु चैत ९ देखि २१ सम्म बन्द गर्ने बताएका छन् ।

सम्बोधनको एउटा बुँदामा भनिएको छ-

'देशैभर संघ, प्रदेश र स्थानीय तहका सार्वजनिक, सामुदायिक तथा निजी सेवा प्रदायक संस्थाहरूबाट प्रदान गरिने नेपाल राजपत्रमा प्रकाशन गरिए अनुसारका अत्यावश्यक सेवा बाहेकका अन्य सबै सेवाहरु आगामी चैत ९ गतेदेखि चैत २१ गतेसम्म बन्द गरिएको छ ।'

तर, सबै सरकारी कर्मचारीहरू र अत्यावश्यक सेवामा कार्यरत निजी क्षेत्रका समेत कर्मचारीहरूले यथावत् रूपमा आआफ्नो कार्यालयमा उपस्थित भई नियमित कामकाज गर्न पनि सम्बोधनमा भनिएको छ ।

के-के हुन् अत्यावश्यक सेवा ?

राजपत्रको भाग ५ मा आवश्यक सेवाबारे उल्लेख गरी यिनमा हड्ताल गर्न रोक लगाइएको छ ।

राजपत्रका अनुसार हुलाक, डाँक, अस्पताल, हातहतियार र आन्तरिक सुरक्षा, खानेपानी, विद्युत, औषधि निर्माण तथा वितरण, फोहोर मैला संकलन, दाल चामल-नुन तेलजस्ता दैनिक उपभोग्य वस्तुको उत्पादन, ढुवानी तथा पैठारी, पेट्रोलियम भण्डारण लगायतका सेवा आवश्यक सेवा हुन् ।

राजपत्रमा यी व्यवस्था भएपनि कोभिड १९ विरुद्ध सरकारले चालेका कदम र प्रधानमन्त्रीको संवोधन अनुसार राजपत्र भाग ५ का बुँदा नम्बर ३, ४ र १० मा भने यो प्रावधान लागु नहुने देखिन्छ ।


प्रकाशित : चैत्र ७, २०७६ १८:५९
प्रतिक्रिया
पठाउनुहोस्

आपतकालीन आपूर्ति व्यवस्थापन कार्यदल गठन गरिने

एकीकृत टोलीबाट बजार अनुगमन
कान्तिपुर संवाददाता

काठमाडौँ — सरकारले खाद्य वस्तु लगायतको आपूर्ति सहज बनाउन आपतकालीन आपूर्ति व्यवस्थापन कार्यदल गठन गर्ने भएको छ । उद्योग वाणिज्य तथा आपूर्ति मन्त्रालयका सचिव बैकुण्ठ अर्यालको संयोजकत्ववमा आपूर्ति व्यवस्थापन समन्वय समिति र वाणिज्य आपूर्ति तथा उपभोक्ता हित संरक्षण महाशाखा प्रमुखको संयोजकत्वमा मन्त्रालयका सम्बन्धित महाशाखासहितको सहभागिता गठन हुने कार्यदलले आपूर्ति व्यवस्थापन गर्ने जनाएको छ ।

‘कार्यदलले अवस्थाको आपूर्तिको तथ्यांक दैनिक रुपमा अधावधिक गरी हरेक दिन सार्वजनिक गर्नेछ,’ उद्योग वाणिज्य तथा आपूर्ति मन्त्रालयले जारी गरेको विज्ञप्तिमा उल्लेख छ । खाद्य व्यवस्था तथा व्यापार कम्पनी लिमिटेड र साल्ट ट्रेडिङ कर्पोरेसन लिमिटेडको खाद्यन्न मौज्दातलाई दोब्बर पार्ने जनाएको छ । यसका लागि आवश्यकता अनुसार साविक नेसनल ट्रेडिङ लिमिटेडको टेकुस्थित गोदाम उपयोग गर्ने विज्ञप्तिमा उल्लेख छ । यस्तै, दुगर्ममा खाद्यान्न अभाव हुन नदिन पहाडी जिल्लामा सम्भावित खाद्य संकट आउन नदिन समयमै आवश्यक खाद्यको ढुवानी गर्ने मन्त्रालयले जनाएको छ ।

बजार अनुगमनका लागि वाणिज्य आपूर्ति तथा उपभोक्ता संरक्षण विभागको नेतृत्वमा एकीकृत टोली निर्माण गरी परिचालन गरिने विज्ञप्तिमा उल्लेख छ । यसका लागि संघीय मामिला तथा सामान्य प्रशासन मन्त्रालयसँग आवश्यक जनशक्ति माग गर्ने जनाएको छ । ‘अनुगमनका क्रममा नियम विपरितका क्रियाकलाप, कृत्रिम अभाव मूल्य वृद्धि आदिमा संलग्न व्यवसायीलाई तत्कालै कानुन बमोजिम हदैसम्मको कारबाही गर्नेछ,’ विज्ञप्तिमा भनिएको छ ।

प्रकाशित : चैत्र ७, २०७६ १८:५६
पूरा पढ्नुहोस्
प्रतिक्रिया
पठाउनुहोस्
×