काठमाडौँ — चीनको हुबेई प्रान्तस्थित वुहान सहरमा रहेका १ सय ८० नेपाली विद्यार्थीलगायतलाई फिर्ता ल्याउन नेपाल वायुसेवा निगमको वाइडबडी विमान सरकारको आदेश कुरेर बसेको एक साता बित्दै छ ।

मंगलबार साँझसम्म पनि सरकारको कुनै आदेश नआएपछि निगमका पदाधिकारीहरु घर फर्किए । ‘हाम्रो तयारी सकिसकेको छ,’ निगमको अपरेसन विभागका निर्देशक क्याप्टेन दिपुराज जुहार्चनले कान्तिपुरसँग भने, ‘सरकारको आदेश कुरेर बसेका छौं । एक सातायता हरेक दिन बैठक भइरहेका छन् । तर आदेश आइसकेको छैन ।’ 

निगमले चीनको हुबेईमा जाने चालकदलसहितको टिम बनाइसकेको छ । निगमबाट १४ जना उक्त उडानमा सहभागी हुने छन् । जसमा तीनजना पाइलट, ७ जना चालकदल, २ जना इन्जिनियर, एक जना फ्लाइट डिस्प्याचर र एक जना लोडमास्टर छन् । बुधबार उनीहरुलाई स्वास्थ्य सम्बन्धि तालिम दिने कार्यक्रम राखिएको छ । 

उक्त उडानमा सरकारले ४ जना स्वास्थ्यकर्मी खटाउने भनेको छ । निगमले आफ्नो आन्तरिक तयारी सबै सकिसकेको जनाउँदै सरकारको आदेश कम्तीमा २ दिनअघि आउनुपर्ने भनेको छ । 

काठमाडौंबाट उड्ने जहाज भारत, बंगलादेश र म्यानमार हुँदै चीन जाने भएकाले उडान रुट र चीनभित्रको अनुमतिका लागि दुई दिन चाहिने भनेको छ । निगमले उडान नम्बर पनि निकालिसकेको छ । प्राविधिक रुपमा निगमका इन्जिनियरले यस रुटमा वाइडबडीको उड्दा आवश्यक पर्ने हवाई इन्धन, रुट, भारलगायतका पक्षको विश्लेषण गरी तयारी सकिसकेका छन् ।