राजीनामापछि शिवमायाले भनिन्- ‘बाजी मैले नै मारें तर पितृसत्ता फाल्न बाँकी छ’- समाचार - कान्तिपुर समाचार
कान्तिपुर वेबसाईट
AdvertisementAdvertisement

राजीनामापछि शिवमायाले भनिन्- ‘बाजी मैले नै मारें तर पितृसत्ता फाल्न बाँकी छ’

जयसिंह महरा

काठमाडौँ — उपसभामुख शिवमाया तुम्बाहाङ्फेले प्रतिनिधिसभालाई नेतृत्वविहीन हुन नदिन आफूले अहिलेसम्म राजीनामा नदिई बसेको बताएकी छिन् । संसद सचिवालयमा राजीनामापत्र बुझाएपछि संसद भवन बानेश्वरमा पत्रकारहरुसँग कुरा गर्दै तुम्बाहाङ्फले संविधानले नै प्रतिनिधिसभालाई नेतृत्वविहीनको कल्पना नगरेकाले अहिलेसम्म राजीनामा नदिएको स्पष्ट पारेकी हुन् ।  

संसदको ठूलो पार्टीले सभामुखको उम्मेदवारको टुंगो लगाएकाले आफूले सोमबार मात्रै राजीनामा दिएको स्पष्ट पारेकी हुन् ।राजीनामा नगर्नु र सभामुखका लागि दाबी गर्नुमा आफूलाई कुनै संस्था वा व्यक्तिको संरक्षण नभएको पनि स्पष्ट पारिन् । उनले भनिन्, ‘मेरो ब्याकअपमा कुनै व्यक्ति वा संस्था होइन,संविधान थियो । व्यक्ति र संस्था संविधानपछिका हुन् । मलाई संविधानले नै यहाँसम्म पुर्‍याएकाे हो । आज पनि अगाडि बढेको भए नेकपासँग संविधानअनुसार महाभियोग लगाउने मात्र विकल्प थियो । मैले हटाउने भए महाभियोग लगाएर हटाउ पनि भनेकी थिएँ, तर हामी सबैले यसको सहज निकास निकाल्यौँ ।’


तुम्बाहाङ्फेले कसैको निर्देशनमा राजीनामा नदिएको पनि उनले स्पष्ट पारिन् । उनले भनिन्, ‘मैले जे बोले त्यो पुर्‍याएँ । नेताले भनेको आधारमा होइन संविधानले दिएको अधिकारको आधारमा मैले राजीनामा गरेँ ।’


उनले उपसभामुखबाट राजीनामा दिन दलले दिएको निर्देशन नमानेकै पनि बताइन् । उनले भनिन्, ‘मैले दलको निर्देशन नमानेकै हो । आग्रह भएको भए सोचिन्थ्यो । म दलको उपसभामुख थिइनँ । प्रतिनिधिसभाको थिएँ, दलीय व्यवस्थाअनुसार उपसभामुख निर्वाचित भएकाले दलसँग समन्वय र सहकार्य गरिरहेकी थिएँ ।’

आफूले दलीय स्वार्थबाट बाहिर रहेर जिम्मेवारी सम्हालेको बताउँदै उनले भनिन्, ‘दलको अर्डरबाट प्रतिनिधि सभालाई जोगाउन सक्छु कि सक्दिनँ भन्ने लडाइँमा थिएँ । त्यसमा सफल भएकी छु । आजको दिनसम्म आइपुग्दा संविधानअनुसार चलेकी थिएँ । तर त्यसमा बाधाहरु पनि धेरै थिए ।’


आफूले राजीनमा दिएपछि प्रतिनिधिसभामा नयाँ नेतृत्व सुनिश्चित भएको पनि तुम्बाहाङ्फेले बताइन् । आजका दिनसम्म प्रतिनिधिसभालाई आफूले रिक्त रहन नदिएको उनले बताइन् ।


मुलुकमा पितृसंस्था सोच मात्रै नभई संस्थागत रुपमा जरा गाडेर बसेको पनि उनले टिप्पणी गरिन्, ‘नेपालमा पितृसत्ता एकदम बलियो छ । राजसंस्थालाई सहजै फालिदियौँ तर पितृसत्ता फाल्न बाँकी छ, गाह्रो पनि छ ।’

संस्थालाई प्रणालीगत रुपमा अगाडि बढाउने सवालमा आफूले बाजी मारेको दाबी गर्दै उनले भनिन्, ‘बाजी मैले नै मारें । अब मेरो कामको ट्रयाक चेन्ज भएको छ । परिवर्तन भएको छ । युटर्न भएको छ । म नयाँ लक्ष्यसहित अगाडि बढ्नेछु ।’ तर तुम्बाहाङ्फेले ‘युटर्न’, ‘नयाँ लक्ष्य’ र ‘ट्रयाक चेन्ज’ के हो त भन्ने प्रश्नको उत्तरमा भविष्यमै दिने बताइन् ।


अब मन्त्री बन्नुहुन्छ त भन्ने प्रश्नमा भने अहिलेसम्म कुनै सहमति नभएको उनले बताइन् ।

प्रकाशित : माघ ६, २०७६ १४:५५
प्रतिक्रिया
पठाउनुहोस्

चीनमा कोरोना भाइरसको जोखिम बढ्दै, अरु सहरमा पनि भेटियो 

कान्तिपुर संवाददाता

चीन — चीनको वुहान सहरमा भेटिएको कोरोना भाइरस अरु सहरमा पनि फैलिँदै जाँदा जोखिम बढेको छ । चिनियाँ अधिकारीहरुका अनुसार दुई दिनयता १३९ नयाँ केसहरु फेला परेका छन् । भाइरसकाे संक्रमण अरु सहरमा पनि भेटिएका छन् । 

स‌ंक्रमित बिरामीहरु वुहान बाहेक बेइजिङ र सेनजेन सहरमा पनि भेटिएका छन् । सोमबार दक्षिण कोरिया, थाइल्यान्ड र जापानमा पनि यो भाइरस भेटिएको जानकारी आएको छ । हालसम्म २०० भन्दा केसहरु भेटिएको बताइएको छ जसमा ३ जनाको श्वासप्रश्वासको समस्याबाट मृत्यु भइसकेको छ ।

स्वास्थ्य अधिकारीका अनुसार यो डिसेम्बरमा वुहान सहरमा कोरोना भाइरसको संक्रमण पाइएको थियो । यो भाइरलजस्तै फैलिइरहेको छ अरु पनि धेरैजना प्रभावित भएका हुन सक्छन् ।

बेलायती विज्ञहरुले बीबीसीलाई बताए अनुसार अहिलेसम्म संक्रमित भएका व्यक्तिहरुको संख्या अझ बढी हुन सक्छ । १७०० जना प्रभावित भएको उनीहरुको आंकलन रहेको छ ।

चिनियाँ नयाँ वर्षको अवसरमा मानिसको चहलपहल बढेका हुनाले चीनले निगरानी तथा उच्च सर्तकता अपनाएको छ ।

को को संक्रमित भएका छन् ?

वुहान सहरका अधिकारीका अनुसार यो हप्ता अवधिमा १३६ नयाँ केसहरु पुष्टि भइसकेको छ जसमा ३ जनाको मृत्यु भइसकेको छ ।

वुहान सहरमै अहिलेसम्म २०० भन्दा बढी कोरोना भाइरसका संक्रमितहरु फेला परेका छन् । आइतबारसम्म अधिकारीका अनुसार वुहानमा १७० जनाको उपचार भइरहेको छ जसमा ७ जना सिकिस्त अवस्थामा रहेका छन् ।

बेइजिङ ड्याक्सि जिल्लाका स्वस्थ्य अधिकारले जनाएअनुसार वुहान घुम्न आएका २ जना व्यक्तिहरुको यही भाइरसको आशंका गरी उपचार गरिएको छ ।

सेन्जेन सहरमा पनि ६६ वर्षीय मानिसमा यो भाइरस देखिएको हो । उनी वुहानमा परिवारसहित यात्रामा गएका थिए ।

त्यसैगरी यो भाइरस अरु सहरतिर पनि फैलिँदै गइरहेको छ । २ वटा केस थाइल्यान्डमा देखिएको छ भने एउटा केस जापानमा । यी केसमा पनि वुहान सहर घुम्न गएका मानिसमा भाइरस देखिएको हो ।

दक्षिण कोरियाले रहस्यमी बिरामीबाट सोमबार एक महिलाको मृत्यु भएको बताएको छ । रोग रोकथाम तथा नियन्त्रण महाशाखा कोरियाको अनुसार ती ३५ वर्षीय चिनियाँ महिला ज्वरो र श्वासप्रश्वासको समस्या रहेको थियो र उनी वुहान सहरबाट फर्केर आएकी थिइन् ।

के भन्छन् स्वस्थ्य अधिकारी ?

चिनियाँ राष्ट्रिय स्वस्थय आयोगका अनुसार यो भाइरस रोकथाम र नियन्त्रण गर्न सकिन्छ । यसका अनुसार यो भाइरस मानिसबीचमा सर्दैन र यो संक्रमित जनवार सी फुडबाट भाइरस फैलिएको हो ।

विज्ञका अनुसार यस भाइरसबाट बच्न मासु र अण्डा पकाउँदा ध्यान पुर्‍याउने, जनवारको सम्पर्कबाट बच्ने र रुघाखोकी लागेका मानिसबाट टाढा रहन बताएका छन् ।

चिनियाँ नयाँ वर्ष नजिकिँदै गर्दा सो समयमा घुम्न निस्कने चिनियाँ पर्यटकहरुबाट रोग फैलनसक्ने आशंका विश्व स्वास्थ्य संगठनले गर्दै विशेष गरेर थाइल्याण्डका अधिकारीहरुलाई उच्च सतर्कता अप्नाउन सुझाएको छ। हालै वुहान भ्रमण गरेका जोकोहीलाई पनि रुघाखोकी र ज्वरो आए तत्काल स्वास्थ्यकर्मीलाई देखाउन पनि आग्रह गरिएको छ।

के हो कोरोना भाइरस ?

यो एक प्रकारको भाइरस हो जसमा रुघाखोकीको लक्षण देखिन्छ । सन् २००२ मा चीनमा देखिएको यो भाइरसबाट हालसम्म ७७४ जनाको मृत्यु भइसकेको छ भने ८ हजार ९८ जना संक्रमित भएका छन् ।
सम्बन्धित समाचार :

प्रकाशित : माघ ६, २०७६ १४:३९
पूरा पढ्नुहोस्
प्रतिक्रिया
पठाउनुहोस्
×