फिल्ड ड्युटीमा खटिने प्रहरीलाई विद्यालयमै ब्यारेक

कान्तिपुर संवाददाता

भक्तपुर — विश्वव्यापी महामारीको रुपमा फैलिएको कोरोना भाइरस (कोभिड–१९) संक्रमण नियन्त्रणका लागि अग्रपंक्तिमा खटिने प्रहरी कर्मचारीका लागि विद्यालयहरुमा ब्यारेक स्थापना गरिएको छ । 

महानगरीय प्रहरी परिसर भक्तपुर, प्रहरी वृत्त जगाती र थिमिलगायतमातहतका कार्यालयमार्फत ड्यूटीमा खटिने प्रहरी कर्मचारीको सामाजिक दूरी कायम राख्न विद्यालयलाई प्रहरी ब्यारेकको रुपमा प्रयोग गरेको हो ।

भक्तपुर प्रहरी प्रमुख एसपी सबिन प्रधानका अनुसार नगरपालिकाहरुको समन्वयमा जिल्लामा कार्यरत करिब ६ सय जना प्रहरी कर्मचारीले विद्यालयको कक्षाकोठालाई ब्यारेकको रुपमा प्रयोग गरेको हो । प्रहरी कार्यालयहरुको सबै ठाउँमा भौतिक दूरी कायम गरेर खान मिल्ने मेस, सुत्न मिल्ने ब्यारेक, उपयुक्त शौचालय, बाथरुमको व्यवस्था सम्भव छैन । ‘सबैभन्दा ठूलो चुनौती हामी समूहमा बस्छौं,’एसपी प्रधानले भने,‘एक जना कोरोना संक्रमित भए युनिट नै संक्रमण हुने अवस्था छ । संक्रमणको जोखिम न्यूनीकरणका लागि सामुदायिक विद्यालयहरुको कक्षाकोठा ब्यारेकको रुपमा चलाएका छौं ।’

भएको जनशक्तिलाई सुरक्षित रुपमा परिचालन गर्न र भौतिक दूरी कायम गर्न ९ वटा विद्यालय, सीटीईभीटीको कार्यालय र चाँगुनारायण नगरपालिका–२ वडाको नयाँ कार्यालय भवनलाई ब्यारेकको रुपमा प्रयोग गरेको प्रहरीले जनाएको छ । जसमध्ये, महानगरीय प्रहरी परिसर भक्तपुर मार्फत खटिने १सय ८० प्रहरी कर्मचारीलाई विद्यार्थी निकेतन मावि र शारदा माविमा ब्यारेक बनाइएको छ ।

महानगरीय प्रहरी वृत्त जगातीमार्फत खटिने १ सय ६० प्रहरीलाई आदर्श आजाद मावि भेलुखेल, प्रभाव कटुञ्जेका ३० प्रहरीलाई सुवर्णेश्वर मावि, प्रभाग दधिकोटका १२ प्रहरीलाई अरनिको मावि दधिकोट, प्रभाग बालकोटका ३६ प्रहरीलाई पुरानो प्रभागको भवनमा, प्रभाग दरबार स्क्वायरका २० प्रहरीलाई पद्म माविको कक्षाकोठामा, प्रभाग सुडालका १५ प्रहरी कर्मचारीलाई चाँगुनारायण–८ महेन्द्र माविमा ब्यारेक स्थापना गरेर व्यवस्थापन गरेको जनाएको छ । त्यसैगरी, महानगरीय प्रहरी प्रभाग सानोथिमिका २६ प्रहरी कर्मचारीलाई सिटीईभिटीको कार्यालय र प्रभाग दुवाकोटमार्फत खटिने १८ प्रहरी कर्मचारीलाई चाँगुनारायण–२ वडा कार्यालयको नयाँ भवनमा अस्थायी ब्यारेक बनाइएको छ ।

४६ पीसीआर रिपोर्ट नेगेटिभ

भक्तपुरमा कार्यरत ४६ जना प्रहरी कर्मचारीको कोरोना भाइरस (कोभिड–१९) रिपोर्ट नेगेटिभ आएको छ । उपत्यका भित्रिने र बाहिरिने यात्रुसँग प्रत्यक्ष सम्पर्कमा रहेर सेवामा खटिँदै आएका प्रहरी कर्मचारीको ‘नोजल स्वाब’ को नमुना कोरोना भाइरस परीक्षणका लागि पठाइएकोमा सबैको रिपोर्ट नेगेटिभ आएको भक्तपुर प्रहरी प्रमुख एसपी सबिन प्रधानले बताए । १ सय ६३ प्रहरीको आरडीटी परीक्षण गराएको थियो ।

प्रकाशित : जेष्ठ १९, २०७७ ११:५०
प्रतिक्रिया
पठाउनुहोस्

नगर विकासको जग्गामा व्यक्तिका नाममा स्थापित प्रतिष्ठानको पार्क

कर्णाली प्रदेश स्थापनाको आन्दोलनमा सहादत पाएकाका नाममा पार्क बनाउन माग हुँदै आएकाे जग्गा वीरेन्द्रनगरकी उपप्रमुखले ‘क्याप्टेन दिनेश प्रतिष्ठान’ लाई दिएपछि स्थानीयको विरोध
चाँदनी कठायत

वीरेन्द्रनगर (सुर्खेत) — वीरेन्द्रनगर नगरपालिकाको घण्टाघर पार्कसँग जोडिएको जग्गामा व्यक्तिको नाममा स्थापित प्रतिष्ठानको पार्क निर्माण हुँदै छ । सुर्खेत उपत्यका नगर विकास समितिको स्वामित्वमा रहेको जग्गामा ‘क्याप्टेन दिनेश प्रतिष्ठान’ का नाममा पार्क निर्माण गर्न थालिएको हो ।

उक्त जग्गामा कार्यवाहक नगरप्रमुख मोहनमाया ढकालले पार्क निर्माणका लागि स्वीकृति दिएकी छिन् । अहिले डिभिजन वन कार्यालयसँग सम्झौता भई काम भइरहेको छ । प्रतिष्ठानलाई संघीय सरकारले ३० लाख र प्रदेशको वन तथा वातावरण मन्त्रालयले ३० लाख रुपैयाँ दिएको छ ।

ढकालले चैत ७ गते प्रतिष्ठानलाई दिएको पत्रमा ‘२०७६ माघ २६ को पत्रानुसार क्याप्टेन दिनेश स्मृति पार्क निर्माणका लागि माग भएको जग्गाका विषयमा छलफल हुँदा स्टिमेटअनुसार क्रमागत रूपमा निर्माण गर्नका लागि स्वीकृति प्रदान गरिएको’ उल्लेख छ । डोल्पा स्थायी भर भएका विमानचालक दिनेश न्यौपानेको २०७३ फागुनमा कालिकोटमा भएको हवाई दुर्घटनामा मृत्यु भएको थियो । उनको स्मृतिमा परिवारले प्रतिष्ठान स्थापना गरेको हो ।

नगरपालिकाले कानुनविपरीत संरचना निर्माणको स्वीकृति दिएको भन्दै स्थानीयले तत्काल काम रोक्न माग गर्दै नगरपालिकामा ज्ञापनपत्र बुझाएका छन् । उनीहरूले अख्तियार दुरुपयोग अनुसन्धान आयोगको सुर्खेत कार्यालयमा समेत उजुरी हालेका छन् । कार्यालयका सूचना अधिकारी मेघनाथ सापकोटाले प्रारम्भिक चरणमा नगरपालिका र डिभिजन वन कार्यालयसँग यसबारे स्पष्टीकरण मागिएको बताए ।

नगर विकासको स्वामित्वमा रहेको उक्त जग्गा हकभोगका लागि निश्चित प्रक्रिया पूरा गरेर बोर्ड (सञ्चालक समिति) बाट निर्णय गर्नुपर्छ । बोर्डको अध्यक्ष नगरप्रमुख हुने प्रावधान छ । हाल नगरप्रमुख देवकुमार सुवेदी पारिवारिक उपचारका सिलसिलामा विदेशमा रहेकाले उपप्रमुख ढकाल कार्यवाहक प्रमुख छिन् । अधिवक्तासमेत रहेका सुर्खेत उपत्यका नगर विकास समितिका पूर्वअध्यक्ष नारायण कोइराला नगरपालिकाको कार्यवाहकको जिम्मेवारी दिइएको भए पनि समितिको कार्यकारी अधिकार उपप्रमुखमा नहुने बताउँछन् । ‘फेरि बोर्डबाट कुनै निर्णय नगरी कार्यवाहक नगरप्रमुखको हैसियतमा ठाडो आदेशका भरमा जग्गामा पार्क बनाउन अनुमति दिइएको छ,’ उनले भने, ‘यसले वीरेन्द्रनगरको मुटुमा रहेको बहुमूल्य जग्गा व्यक्तिको नाममा स्थापित संस्थालाई दिइएको मात्र नभई विधि र कानुनसमेत मिचिएको छ ।’ यति ठूलो विषयमा सामान्य छलफलबाट निर्णय गरेर स्वीकृति प्रदान गर्नु गलत भएको उनले बताए । उनका अनुसार सार्वजनिक जग्गा भोगचलनका लागि स्वीकृति प्रदान गर्नुपरे समितिको सञ्चालक समितिको बैठक बसी एजेन्डा पेस गरेर छलफल गर्नुपर्ने हुन्छ ।

नगरपालिकाका प्रमुख प्रशासकीय अधिकृत टीकाराम ढकालले घण्टाघर पार्क वीरेन्द्रनगर नगरपालिकालाई प्रदान गरिएको र वरपरको जग्गा पनि प्रयोग गर्न पाइने भएकाले यस्तो स्वीकृति दिइएको बताए । प्रतिष्ठानले संघ र प्रदेश सरकारबाट रकम पाई निर्माणको अनुमति मागेकाले दिइएको उनको भनाइ छ ।

कर्णाली प्रदेश स्थापनाको आन्दोलनमा सहादत प्राप्त गरेका चार जनाको परिवारले प्रदेश सरकार र वीरेन्द्रनगर नगरपालिकासँग उनीहरूको सम्मान र स्मृतिका लागि पार्क निर्माण गरिदिन माग गरिरहेका छन् । सहिद यामबहादुर बीसीका तर्फबाट उनकी बहिनी भगवती बीसीले एक वर्षअघि नै पार्क बनाइदिन वा घण्टाघर आसपास क्षेत्रमा जग्गा उपलब्ध गराउन माग गरे पनि सुनुवाइ नभएको बताइन् । उनका अनुसार सहिद यामबहादुर बीसी स्मृति प्रतिष्ठानका नामबाट नगरपालिकामा निवेदन दिइएको थियो । ‘नगरपालिकाले पहिले दिएको निवेदन हरायो भनेपछि दुई–तीन महिनाअघि फेरि निवेदन दिएका थियौं,’ उनले भनिन्, ‘तर हाम्रो मागको कुनै सुनुवाइ भएन, बरु अहिले आएर पहुँच र पावरको भरमा अरूले नै जग्गा र पैसा पाएको सुन्यौं ।’

पारिवारिक उपचारका सिलसिलामा भारतको नयाँदिल्लीमा रहेका नगरप्रमुख सुवेदीले भने सुर्खेत उपत्यकाको स्वीकृत गुरुयोजनाविपरीत कुनै व्यक्ति वा संस्थाले जहाँतहीँ संरचना बनाउन नपाउने बताए । नगर विकास समितिको निर्णयबिनै संरचना बनाउनसमेत नहुने उनको भनाइ छ । ‘गुरुयोजनामा घण्टाघर क्षेत्रलाई पार्कका रूपमा प्रयोग गर्न मिल्ने भनेको छ,’ उनले भने, ‘तर पार्क बनाउन मिल्ने भन्दैमा कोही व्यक्तिको नाममा बनेको संस्थाको नाममा पार्क बनाउन त मिलेन नि ।’

प्रकाशित : जेष्ठ १९, २०७७ ११:४३
पूरा पढ्नुहोस्
प्रतिक्रिया
पठाउनुहोस्
×