बारा — जसपा नेपालले कलैयामा मंगलबार सरकारविरूद्ध प्रदर्शन गरेको छ । गाउँ र सहरबाट भेला भएका नेता कार्यकर्ताले सरकारविरूद्ध चर्को नाराबाजी गर्दै भरत चोकमा टायर बालेर प्रदर्शन गरेको हुन् ।

प्रदर्शनको क्रममा प्रदर्शनकारीलाई काबुमा राख्न प्रहरीले खाजेपछि प्रहरी र प्रदर्शनकारीबीच घम्साघम्सी भई स्थिति केहीबेर तनावपूर्ण बनेको थियो । तर दुवै पक्षले संयमता अपनाएकोले झडपको अवस्था भने आएन ।

प्रदर्शनकारीले चोकमा कोणसभा गरेर सरकारले पार्टी अध्यक्ष उपेन्द्र यादवलाई फसाउन जालझेल गरिरहेको आरोप लगाए । २०६३ चैत ७ मा रौतहटको गौरमा भएको तत्कालीन फोरम र माओवादीबीचको झडपका क्रममा २७ जनाको ज्यान गएको थियो । त्यो बेला माओवादीका २७ कार्यकर्ताको मृत्यु भएको थियो भने ४२ जना घाइते भएका थिए ।