पर्सा — वीरगन्ज–१७ अलौंका किसान वृजेश्वर साह कानुलाई अहिले धान बाली जोगाउने चिन्ता छ । दुई साताअघि रोपाइँ गरेका उनको खेतमा अहिले पानी सुकेर धाँजा फाटेको छ । 

आज भोलिमै पानी पर्छ भनेर समाचारमा सुनेको उनले बताए । पानी पर्ने आश गरेर बसेका उनी पानी नपरेपछि निराश छन् । ‘खोई समाचारमा सधैं पानी पर्छ भनेर सुन्छु,’ उनले भने, ‘पानी कहिल्यै पर्ने होइन, यहाँ खेतमा धाँजा फाटिसक्यो ।’

अलौंकै अर्का किसान अम्बिका साहको पनि वृजेश्वरकोजस्तै अवस्था छ । दुई साताअघि उनले पनि रोपाइँ गरेका थिए । बिस्तारै खेतमा जमेको पानी सुक्दै गयो । अनि उनको निधारमा चिन्ताले पसिना बग्दै गयो । ‘खेतको पानी सुक्दै छ, मेरो निधारमा चिन्ताको पसिना बग्दै छ,’ उनले भने, ‘खोइ कहिले पानी पर्छ र हाम्रो पसिना पखालिन्छ ।’ 

जिल्लाको दक्षिणी भेगका अधिकांश किसानको यस्तै अवस्था छ । उत्तरी र पश्चिमी भेगका किसानको धान बाली जोगिएपनि दक्षिणी भेगका किसानलाई भने बाली जोगाउने चिन्ता छ । रोपाइँ गर्न नभ्याएका किसानको धानको बेर्ना खेतमै सुक्न थालेको उनले बताए ।

असार महिनामा पर्याप्त वर्षा नभएपछि कतिपय किसानले रोपाइँ गर्न भ्याएका छैनन् भने कतिपयले रोपाइँ गरेपनि बाली जोगाउन सक्ने अवस्था छैन । कृषि ज्ञान केन्द्र पर्साका प्रमुख रामजीवन ठाकुरले जिल्लामा करीब ८० प्रतिशत रोपाइँ भइसकेको बताए । अब आकाशे खेतीको भरमा रहेका किसानको मात्र खेतमा रोपाइँ गर्न बाँकी रहेको उनले बताए । एक दिन पनि राम्रोसँग वर्षा भए ती किसानले पनि रोपाइँ गर्न भ्याउने ठाकुर बताउँछन् । संघीय कृषि मन्त्रालयबाट आइतबार दुई अधिकृतहरु जिल्लामा आएर आइतबार नै स्थलगत निरीक्षणमा गएको उनले बताए । ‘उहाँहरु भोलि फिल्डबाट फर्केपछि बनाउने प्रतिवेदनले संघीय सरकारले जिल्लाका किसानलाई दिने राहतबारे केही निर्णय गर्न सक्छ,’ उनले भने, ‘तत्काल पानी परी हाले अधिकांश किसानको समस्या समाधान हुन्छ ।’