वीरगन्ज — कोरोना संक्रमित एक बिरामीको डायलसिस गरिएको छ । २४ वर्षीय ती संक्रमित युवतीको सोमबार वीरगन्जमा डायलसिस गरिएको हो ।
नारायणी अस्पतालमा डायलसिस गराउँदै आएका बिरामी मध्ये ३ जनामा गत साउन १५ मा कोरोना संक्रमण पुष्टि भएको थियो ।
डायलसिस विभागका कर्मचारीमा पनि संक्रमण देखिएको थियो । नारायणी अस्पताल मृगौला विभागका डा.निरज कुमार सिंहका अनुसार मृगौलाका बिरामीमा संक्रमण पुष्टि भएपछि अन्य बिरामीसँगै डायलसिस कसरी गर्ने भनेर अन्योलता थियो । ‘नारायणी अस्थायी कोरोना अस्पतालमा बनाइएको वीरगन्ज हेल्थ केयर हस्पिटलमा कोरोना संक्रमित मृगौलाका बिरामीको डायलसिस गरिएको छ,’ डा.सिंहले भने, ‘समयमै डायलसिस नहुँदा बिरामीको स्वास्थ्य बिग्रिने खतरा थियो ।’
