राजविराज — सप्तरीमा मंगलबार बिहानदेखि निषेधाज्ञा जारी गर्ने निर्णय भएको छ । जिल्ला सुरक्षा समितिको सोमबार बसेको बैठकले जिल्लाभरी निषेधाज्ञा जारी गर्ने निर्णय गरेको हो ।

यसअघि स्थानीय प्रशासनले गत साउन ८ गतेदेखि राजविराज नगरपालिका क्षेत्रभित्र अनिश्चितकालीन निषेधाज्ञा जारी गरेको थियो । साउन २० गते बिहान ५ बजेदेखि साउन २६ गतेसम्म सम्मका लागि जिल्लाभरी निषेधाज्ञा जारी गर्ने निर्णय भएको प्रमुख जिल्ला अधिकारी शंकरहरि आचार्यले बताएका छन् । 

जिल्लामा सोमबार साँझ थप ७ जनामा कोरोना संक्रमण पुष्टि भएको छ ।  योसँगै जिल्लामा कोरोना संक्रमितको संख्या ५ सय ३१ पुगेको छ । एक हप्तादेखि सप्तरीमा निरन्तर रुपमा संक्रमितहरुको संख्या बढ्दै गइरहेको छ ।