अभिनेता तथा चलचित्रकर्मी नायक धीरेन शाक्य, संगीतकर्मी तथा संस्कृतिविद् महेश देउराली, मदन देउराली, भरत देउराली पत्रकार मेघराज शर्मा, गायक कलाकर्मी मीना नेपाली (गैरे), धातुकला उद्यमी मंगलप्रसाद बज्राचार्य, प्रदीपकुमार बज्राचार्यलाई तानसेन नगरप्रमुख तथा नगर प्रज्ञा प्रतिष्ठानका कुलपति सन्तोषलाल श्रेष्ठ, उपप्रमुख प्रतिक्षा गाहा सिंजाली, नगर प्रज्ञा प्रतिष्ठानका उपकुलपति  चोलेश्वर शर्माले नगद १० हजार, सम्मानपत्र, तक्मा, पाल्पाली ढाकाको दोसल्ला ओढाएर सम्मान गरेका हुन् । 

तानसेनको शिक्षा, पाल्पाली ढाका, करुवा लगायतका क्षेत्रबाट देश तथा विदेशमा ख्याती कमाउन सफल व्यक्तित्वलाईसमेत सम्मान गरिएको छ । यसैगरी पाल्पाली ढाकाकी संस्थापक ८७ वर्षीय पूर्णमाया महर्जनलाई ६८ हजार नगदसहित सम्मान तथा पुरस्कार प्रदान गर्ने घोषणासमेत गरिएको छ । साथै लुम्बिनी प्रदेशभित्र साहित्य क्षेत्रमा पुस्तक प्रकाशन गरी योगदान गर्ने एक जनालाई पनि पुरस्कार प्रदान गरिने तानसेन प्रज्ञा प्रतिष्ठानका सदस्य सचिव दुर्गा थापाले जानकारी दिए । 

तानसेन नगरपालिकाभित्रका भाषा, कला ,साहित्य, संस्कृति संरक्षण संवर्द्धन गर्दै यहाँका मौलिक सिर्जना र प्रतिभालाई उजागर गर्न सामाजिकशास्त्रको अनुसन्धानबाट प्रभावकारी हुने भएकाले नगर प्रज्ञा प्रतिष्ठानको स्थापना गरिएको छ । तानसेन नगरपालिकाको १५ औं नगरसभाले पारित गरेको ऐनअनुसार एक उपकुलपतिसहित १६ जना सदस्य रहेको प्रज्ञा प्रतिष्ठान गठन भएको छ । नगरपालिका क्षेत्रको कला र संस्कृति संरक्षण गर्दै काम गर्ने योजना बनाएको नगरपालिकाले प्रज्ञा प्रतिष्ठानलाई यो वर्षको लागि १५ लाख बजेट विनियोजन गरेको थियो ।