दुईवटा मतपत्र बढी भेटिएपछि सिन्धुलीको कमलामाईमा रोकियो मतगणना - स्थानीय तह निर्वाचन २०७९ - कान्तिपुर समाचार

दुईवटा मतपत्र बढी भेटिएपछि सिन्धुलीको कमलामाईमा रोकियो मतगणना 

राजकुमार कार्की

सिन्धुली — मुचुल्कामा लेखिएको भन्दा २ वटा मतपत्र बढी भेटिएपछि सिन्धुलीको कमलामाई नगरपालिकामा मतगणना रोकिएको छ । वडा नम्बर १३ को मत पेटिकामा खसेको मत भन्दा बढी भेटिएपछि गणना रोकिएको निर्वाचन अधिकृत धु्रवप्रसाद सापकोटाले बताए । मुचुल्का गरेपछि मतपेटिकामा भएको मत नै सदर हुने भएकाले अनावश्यक विवाद गरेर मतगणना रोक्नुको कुनै तुक नरहने उनको भनाइ छ ।

‘मुचुल्का गर्दा कहिलेकाहीं अंक लेख्दा थपघट हुनसक्छ,’ उनले भने ‘बाकसमा छाप लगाई शिलबन्दी गरेपछि खोल्दा भएको मत संख्या नै कानून अनुसार आधिकारिक हुन्छ ।’ कमलामाईको १४ वडा मध्ये ११ वटाको परिणाम घोषणा भइसकेको छ । वडा नम्बर १,४,५,६,९ मा कांग्रेस तथा ३,७,८,११ एमाले र २ र १० मा माओवादी केन्द्रले अध्यक्ष जितेको छ ।

कमलामाईमा हालसम्मको गणनामा गठबन्धनबाट मेयरमा कांग्रेसका उपेन्द्र पोखरेलले अग्रता कायम राखेका छन् । उनले १२ हजार ५३९ मत प्राप्त गरेका छन् भने एमालेका महेन्द्रदेव श्रेष्ठले १० हजार ८०८ पाएर पछ्याइरहेका छन् । उपमेयरमा एमालेकी मञ्जु देवकोटाले १० हजार ८७२ मत पाउँदा गठबन्धनबाट माओवादी केन्द्रका दीर्घराज श्रेष्ठको १० हजार २६९ रहेको छ ।


प्रकाशित : जेष्ठ ५, २०७९ ०९:४२
प्रतिक्रिया
पठाउनुहोस्

बझाङको खप्तडछान्ना गाउँपालिका अध्यक्षमा कांग्रेस र उपाध्यक्षमा माओवादी विजयी

वसन्तप्रताप सिंह

काठमाडौँ — बझाङ जिल्लाको खप्तडछान्ना गाउँपालिकाको अध्यक्षमा कांग्रेसका उत्तमकुमार रोकाया र उपाध्यक्षमा माओवादी केन्द्रका विष्णु थापा निर्वाचित भएका छन् । बहुमत वडासहित गाउँपालिका अध्यक्ष र उपाध्यक्ष पदमा गठबन्धन उम्मेदवार विजयी भएका हुन् । खप्तडछान्नामा कांग्रेस एमालेबीच चुनावी गठबन्धन भएको थियो ।

नवनिर्वाचित अध्यक्ष रोकायाले ३ हजार १ सय ४१ मत प्राप्त गर्दा उनका निकटतम प्रतिद्वन्द्वी एमालेका लोकेन्द्रबहादुर सिंहले २ हजार ७ सय ३८ मत मात्र प्राप्त गरे ।

यस्तै उपाध्यक्षमा निर्वाचित थापाले ३ हजार २ सय ३२ मत प्राप्त गरेका छन् । उनको प्रतिस्पर्धी देवकी जोशीले २ हजार ३ सय ३ मत पाएको निर्वाचन अधिकृत खगेन्द्रबहादुर सिंहले जानकारी दिए ।

गाउँपालिका १ मा एकीकृत समाजवादीका देविभक्त जोशी, २ मा माओवादी केन्द्रका ज्योतिप्रकाश बोगटी, ३ मा कांग्रेसकी गौरी अधिकारी र ४ मा एमालेका ईश्वर रोकाया निर्वाचित भएका छन् ।

त्यस्तै वडा नम्बर ५ मा एमालेका रामबहादुर सिंह, ६ एमालेकै तेज खड्का र ७ मा कांग्रेसका रमानन्द जोशी वडा अध्यक्षमा निर्वाचित भएको निर्वाचन अधिकृतको कार्यालयले जानकारी दिएको छ ।

प्रकाशित : जेष्ठ ५, २०७९ ०९:४०
पूरा पढ्नुहोस्
प्रतिक्रिया
पठाउनुहोस्
x
×