काठमाडौंको शंखरापुरको मेयरमा राप्रपाका रमेश नापित विजयी- स्थानीय तह निर्वाचन २०७९ - कान्तिपुर समाचार

काठमाडौंको शंखरापुरको मेयरमा राप्रपाका रमेश नापित विजयी

२०६२/६३ पछि भएका दुई वटा स्थानीय तहको निर्वाचनमा राप्रपाले पहिलो पटक काठमाडौंमा जित हात पारेको हो
कान्तिपुर संवाददाता

काठमाडौँ — काठमाडौंको शंखरापुर नगरपालिकामा राप्रपाका रमेश नापित मेयरमा निर्वाचित भएका छन् । मुलुकभर स्थानीय तहको मतगणना भइरहँदा राप्रपाबाट नापित पहिलो निर्वाचित मेयर बनेका छन् ।

नापितले गठबन्धनका उम्मेदवार एवं एकीकृत समाजवादीका लक्ष्मीप्रसाद (एलपी) श्रेष्ठलाई ४९८ मतको अन्तरले पराजित गरेका हुन् । नापितले ४७०० र श्रेष्ठले ४२०२ मत प्राप्त गरेका छन् ।

त्यसैगरी उपमेयरमा गठबन्धन एवं कांग्रेसकी उम्मेदवार समिता श्रेष्ठ निर्वाचत भएकी छिन् । शंखरापुरमा कांग्रेस र समाजवादीले गठबन्धन गरेका हुन । उपमेयर श्रेष्ठले ३१६४ मतको अन्तरले राप्रपाकी विजयकुमारी वाइबालाई पराजित गरेका हुन् । श्रेष्ठले ६३६२ र वाइबाले ३२९८ मत प्राप्त गरेका छन् ।

यसैगरी मेयरमा नेकपा एमालेका कृष्णलाल बजगाईंले ३६२२ मत प्राप्त गरी तेस्रो स्थानमा आएका छन् भने माओवादी केन्द्रका मधु केसीले २२४४ मत प्राप्त गरेका छन् ।

यसैगरी कांग्रेसले वडा नम्बर २,४,८ र ९ मा जित हात पार्दा राप्रपाले ३,६ र ७ एमालेले ५ र माओवादीले वडा नम्बर १ वडामा विजय हासिल गरेको छ । यस २०७४ को निर्वाचनमा शंखरापुरमा एमालेले जित हासिल गरेको थियो ।

२०६२/६३ पछि भएका दुई वटा स्थानीय तहको निर्वाचनमा राप्रपाले पहिलो पटक काठमाडौंमा जित हात पारेको हो । त्यस्तै यस पटक हेटौंडा उपमहानगरपालिकामा पनि राप्रपाका दीपकबहादुर सिंहले गठबन्धनका उम्मेदवारलाई टक्कर दिइरहेका छन् । नेकपा एकीकृत समाजवादीका उम्मेदवार मीना लामा र सिंहबीच कहिले अघि, कहिले पछि हुने भइरहेको छ ।

प्रकाशित : जेष्ठ ३, २०७९ २२:०८
प्रतिक्रिया
पठाउनुहोस्

डोल्पाको त्रिपुरासुन्दरीको प्रमुख, उपप्रमुखमा एमालेका उम्मेवादवार विजयी

हरि गौतम

रुकुम पश्चिम — डोल्पाको त्रिपुरासुन्दरी नगरपालिकाको प्रमुख र उपप्रमुखमा नेकपा एमालेका उम्मेदवार विजयी भएका छन् । नगरप्रमुखमा एमालेका जुनचन्द्र रोकाया र उपप्रमुखमा एमालेकै उम्मेदवार देवी घर्ती विजयी भइन् ।

नेपाली कांग्रेसका चन्द्रलाल धरालालाई पछि पार्दै एमालेका रोकायाले नगरप्रमुख जितेका हुन् । उपप्रमुखमा नेकपा माओवादी केन्द्रकी काली चलाउनेलाई एमालेकी घर्तीले पराजित गरेकी हुन् ।

नगरप्रमुखमा विजय भएका रोकायाले २ हजार १ सय ४ मत ल्याएका छन् भने कांग्रेसका धरालाले १ हजार ५ सय ९६ मत पाएका छन् ।

उपप्रमुखमा निर्वाचित एमालेकी घर्तीको पक्षमा १ हजार ८ सय ५६ मत आएको छ भने माओवादीकी चलाउनेको १ हजार २ सय ९० मत आएको छ ।

२०७४ सालको निर्वाचनमा पनि यो नगरपालिकाको प्रमुख र उपप्रमुख दुवैमा एमालेका उम्मेदवार विजेता भएका थिए ।


प्रकाशित : जेष्ठ ३, २०७९ २२:०६
पूरा पढ्नुहोस्
प्रतिक्रिया
पठाउनुहोस्
×