डोल्पाको त्रिपुरासुन्दरीको प्रमुख, उपप्रमुखमा एमालेका उम्मेवादवार विजयी- स्थानीय तह निर्वाचन २०७९ - कान्तिपुर समाचार

डोल्पाको त्रिपुरासुन्दरीको प्रमुख, उपप्रमुखमा एमालेका उम्मेवादवार विजयी

हरि गौतम

रुकुम पश्चिम — डोल्पाको त्रिपुरासुन्दरी नगरपालिकाको प्रमुख र उपप्रमुखमा नेकपा एमालेका उम्मेदवार विजयी भएका छन् । नगरप्रमुखमा एमालेका जुनचन्द्र रोकाया र उपप्रमुखमा एमालेकै उम्मेदवार देवी घर्ती विजयी भइन् ।

नेपाली कांग्रेसका चन्द्रलाल धरालालाई पछि पार्दै एमालेका रोकायाले नगरप्रमुख जितेका हुन् । उपप्रमुखमा नेकपा माओवादी केन्द्रकी काली चलाउनेलाई एमालेकी घर्तीले पराजित गरेकी हुन् ।

नगरप्रमुखमा विजय भएका रोकायाले २ हजार १ सय ४ मत ल्याएका छन् भने कांग्रेसका धरालाले १ हजार ५ सय ९६ मत पाएका छन् ।

उपप्रमुखमा निर्वाचित एमालेकी घर्तीको पक्षमा १ हजार ८ सय ५६ मत आएको छ भने माओवादीकी चलाउनेको १ हजार २ सय ९० मत आएको छ ।

२०७४ सालको निर्वाचनमा पनि यो नगरपालिकाको प्रमुख र उपप्रमुख दुवैमा एमालेका उम्मेदवार विजेता भएका थिए ।


प्रकाशित : जेष्ठ ३, २०७९ २२:०६
प्रतिक्रिया
पठाउनुहोस्

सिन्धुलीको मरिणमा बढी मतपत्र भेटिएपछि मतगणना रोकियो

राजकुमार कार्की

सिन्धुली — मुचुल्कामा लेखिएको भन्दा ६ वटा मतपत्र बढी भेटिएपछि सिन्धुलीको मरिण गाउँपालिकाको मतगणना रोकिएको छ ।

७ वडा रहेको मरिणमा ६ वटाको गणना सम्पन्न भइ नतिजा आइसकेको छ । वडा नम्बर ७ को बाह्रबिसे मतदान केन्द्रमा खसेको मतभन्दा बढी भेटिएपछि प्रतिस्पर्धामा रहेको एमालेका कार्यकर्ताहरुले गणना रोकेका हुन् ।

निर्वाचन अधिकृत दुर्गा बन्जाडेका अनुसार मुचुल्का ६३० मत खसेको भनेर लेखिएको र मतपत्र ६३६ पेटिकामा भेटिएकाले विवाद उत्पन्न हुँदा रोकिएको हो । मुचुल्का गरेपछि मतपेटिकामा भएको मत नै सदर हुने भएकाले अनावश्यक विवाद गरेर मतगणना रोकेको उनको भनाइ छ ।

‘मुचुल्का गर्दा कहिले काही अंक लेख्दा थपघट हुनसक्छ,’ उनले भनिन्, ‘बाकसमा लाहाछाप गरी शिलबन्दी गरेपछि खोल्दा भएको मत संख्या नै कानून अनुसार आधिकारिक हुन्छ । यसमा विवाद गर्नुपर्ने केही छैन ।’ मरिण गाउँपालिकाको गणना सम्पन्‍न भएका ६ वडामध्ये वडा नम्बर ४ बाहेक सबै माओवादी केन्द्रले जितेको छ । वडा नम्बर ४ मा एमालेले वडाध्यक्षसहितको प्यानल जितेको छ । एउटा वडाको मतगणना रोकेर अनावश्यक विवाद नझिक्न भन्दै सहमतीको प्रयास भइरहेको निर्वाचन अधिकृतको कार्यालयले जनाएको छ ।

गणना सम्पन्‍न भएकोमा गठबन्धनबाट अध्यक्षमा माओवादी केन्द्रका उम्मेदवार विमर्श मोक्तान चारसय हाराहारी मत अन्तरले अगाडि छन् । उनले गणना सम्पन्न भएको ४ हजार ४ सय ८ मत प्राप्त गरेका छन् भने एमालेका गोविन्द लाल माझीको ४ हजार २५ मत छ । उपाध्यक्षमा कांग्रेसकी विमला माझीको ४ हजार ३ सय ५ हुँदा मंगोल नेशनल अर्गनाइजेसनकी धनजरीमायाँ बलको ४७९ मत रहेको छ । उपाध्यक्षमा एमालेकी उम्मेदवार संगिता माझीले उम्मेदवारी फिर्ता लिएकी थिइन् ।

प्रकाशित : जेष्ठ ३, २०७९ २१:३९
पूरा पढ्नुहोस्
प्रतिक्रिया
पठाउनुहोस्
×