भेरी नगरपालिका प्रमुखमा एमालेका घर्ती दोहोरिए, उपप्रमुखमा कांग्रेसकी जैसी विजयी- स्थानीय तह निर्वाचन २०७९ - कान्तिपुर समाचार

भेरी नगरपालिका प्रमुखमा एमालेका घर्ती दोहोरिए, उपप्रमुखमा कांग्रेसकी जैसी विजयी

हरिहरसिंह राठौर

जाजरकोट — भेरी नगरपालिका प्रमुखमा सत्ता गठबन्धनलाई पराजित गर्दै नेकपा एमालेका चन्द्रप्रकाश घर्ती निर्वाचित भएका छन् । सत्ता गठबन्धनका साझा उम्मेदवार नेकपा ( माओवादी केन्द्र) का गगनबहादुर खड्कालाई ८ सय ७९ मतले पराजित गर्दै घर्ती नगर प्रमुखमा विजयी भएका हुन् ।

घर्तीले ४ हजार ८ सय ४२ मत प्राप्त गरेका छन् । उनका प्रतिद्वन्द्वी माओवादी केन्द्रका गगनबहादुर खड्काले ३ हजार ९ सय ६३ मत प्राप्त गरेका छन् ।

एकीकृत समाजवादीका कमानबहादुर खड्काले ३ हजार ५ सय ५९ मत ल्याए । यस्तै उपप्रमुखमा गठबन्धनकी साझा उम्मेदवार कांग्रेसकी सीता जैसी निर्वाचित भएकी छन् ।

जैसीले ५ हजार ९ सय ८५ मत प्राप्त गरेकी छन् । उनकी प्रतिस्पर्धी नेकपा एमालेकी सावित्री चन्दले ५ हजार १ सय ७२ मत प्राप्त गरेकी छन् । नगर प्रमुखमा निर्वाचित घर्ती २०७४ सालको स्थानीय तहको निर्वाचनमा समेत अत्यधिक मतका साथ विजयी भएका थिए ।

गठबन्धनको निर्णयअनुसार भेरी नगरपालिकालाई नेकपा समाजवादीलाई दिइएको भए पनि माओवादीको अडानका कारण गठबन्धन भत्किएको थियो । उक्त गठबन्धन टुटेपछि माओवादी केन्द्र र नेपाली कांग्रेसबीच चुनावी गठबन्धन भएको थियो भने एकीकृत समाजवादी र नेकपा एमाले एक्लाएक्लै प्रतिस्पर्धा गरिरहेका थिए ।

जिल्लाका ७ स्थानीय तहमध्ये अब वारेकोट गाउँपालिकाको मात्रै मतपरिणाम आउन बाँकी छ ।

प्रकाशित : जेष्ठ ३, २०७९ १९:०२
प्रतिक्रिया
पठाउनुहोस्

पुतलीबजारको मेयरमा कांग्रेसका रेग्मी विजयी

प्रतीक्षा काफ्ले

स्याङ्जा — पुतलीबजार नगरपालिकाको मेयरमा नेपाली कांग्रेसका तुलसीराम रेग्मी विजयी भएका छन् । एमालेकी सीमा क्षेत्रीलाई २ हजार ४ सय ४ मतान्तरले हराउँदै रेग्मी मेयरमा निर्वाचित भएका हुन् । रेग्मीले १२ हजार ४ सय ९४ मत ल्याउँदा उनका निकटतम प्रतिस्पर्धी क्षेत्रीले १० हजार ९० मत प्राप्त गरिन् ।

पुतलीबजारको उपमेयरमा कांग्रेसकै देवी अर्याल निर्वाचित भइन् । निवर्तमान उपमेयर समेत रहेका एमालेका महेश पुरीलाई उनले ९ सय ४७ मतले पछाडि पारिन् । अर्यालले ११ हजार ७ सय ४८ मत ल्याउँदा पुरीले १० हजार ७ सय ६१ मत प्राप्त गरे ।

नगरपालिकामा कांग्रेसलाई माओवादी केन्द्रले साथ दिएको थियो । अघिल्लो निर्वाचनमा प्रमुख र उपप्रमुख दुवै पदमा एमाले विजयी भएको थियो ।

यस्तै, पुतलीबजारका १४ वटा वडामा पनि कांग्रेसको बहुमत रहेको छ । पुतलीबजार १ मा कांग्रेसका उत्तम श्रेष्ठ विजयी भएका छन् भने २ मा एमालेका भीमबहादुर गुरुङ, ३ मा कांग्रेसका राजेन्द्रप्रसाद श्रेष्ठ, ४ मा कांग्रेसका शिव थापा, ५ मा कांग्रेसका अर्जुनकुमार कार्की, ६ मा एमालेका खेमबहादुर गुरुङ, ७ मा कांग्रेसका कृष्णबहादुर आले, ८ मा कांग्रेसका रमबहादुर सेन, ९ मा एमालेका दुतप्रसाद गुरुङ, १० मा कांग्रेसका अग्निप्रसाद पौडेल, ११ मा कांग्रेसका मनोज पौडेल, १२ मा एमालेका गन्जसिंह गुरुङ, १३ मा एमालेका जुद्धबहादुर थापा मगर र १४ मा कांग्रेसका जितेन्द्रप्रकाश मल्ल निर्वाचित भएको निर्वाचन सचिवालयले जनाएको छ ।

प्रकाशित : जेष्ठ ३, २०७९ १८:५७
पूरा पढ्नुहोस्
प्रतिक्रिया
पठाउनुहोस्
×