बारपाक सुलिकोटको माइकोट माविमा मतदान रोकियो
गोरखा — गोरखाको बारपाक सुलिकोट गाउँपालिका–६ स्थित माइकोट मावि कोटथोक ‘क’ मतदानकेन्द्रमा मतदान एक घण्टादेखि रोकिएको छ ।
उक्त केन्द्रमा खटिएका कर्मचारी सञ्जीव थापा नजिकैको चन्द्रकला माविको मतदान केन्द्र मतदान गर्न गएको विषयमा विवाद चर्किएपछि मतदान रोकिएको हो । कांग्रेस प्रतिनिधिले कर्मचारी अन्यत्र मतदान गर्न गएको विषयमा विरोध जनाएका छन् ।
सर्वदलीय बैठक बसेर मतदान प्रक्रिया सुरुका लागि पहल गर्दा पनि सहमति जुट्न नसकेको उक्त केन्द्रमा खटिएका मतदान अधिकृत ईश्वर कुमालले बताए । ‘उहाँहरूले सुरुमा कर्मचारीलाई कारबाहीको माग राख्नुभयो, हामीले कर्मचारीलाई पनि निर्वाचन अधिकारीको कार्यालयमा पठाइसक्यौँ,’ उनले भने,‘सर्वदलीय बैठक बसौँ, निर्वाचन सुरु गरौँ भनेको त्यसो हुन सकेको छैन ।’
प्रकाशित : वैशाख ३०, २०७९ १५:२३प्रतिक्रिया