बारपाक सुलिकोटको माइकोट माविमा मतदान रोकियो- स्थानीय तह निर्वाचन २०७९ - कान्तिपुर समाचार
कान्तिपुर वेबसाईट
AdvertisementAdvertisement

बारपाक सुलिकोटको माइकोट माविमा मतदान रोकियो

हरिराम उप्रेती

गोरखा — गोरखाको बारपाक सुलिकोट गाउँपालिका–६ स्थित माइकोट मावि कोटथोक ‘क’ मतदानकेन्द्रमा मतदान एक घण्टादेखि रोकिएको छ ।

उक्त केन्द्रमा खटिएका कर्मचारी सञ्जीव थापा नजिकैको चन्द्रकला माविको मतदान केन्द्र मतदान गर्न गएको विषयमा विवाद चर्किएपछि मतदान रोकिएको हो । कांग्रेस प्रतिनिधिले कर्मचारी अन्यत्र मतदान गर्न गएको विषयमा विरोध जनाएका छन् ।

सर्वदलीय बैठक बसेर मतदान प्रक्रिया सुरुका लागि पहल गर्दा पनि सहमति जुट्न नसकेको उक्त केन्द्रमा खटिएका मतदान अधिकृत ईश्वर कुमालले बताए । ‘उहाँहरूले सुरुमा कर्मचारीलाई कारबाहीको माग राख्नुभयो, हामीले कर्मचारीलाई पनि निर्वाचन अधिकारीको कार्यालयमा पठाइसक्यौँ,’ उनले भने,‘सर्वदलीय बैठक बसौँ, निर्वाचन सुरु गरौँ भनेको त्यसो हुन सकेको छैन ।’

प्रकाशित : वैशाख ३०, २०७९ १५:२३
प्रतिक्रिया
पठाउनुहोस्

गोरखामा ५० प्रतिशत मत खस्यो

चुमनुव्रीका चार केन्द्रमा मतदान अन्तिम चरणमा
हरिराम उप्रेती

गोरखा — शुक्रबार भइरहेको स्थानीय तह निर्वाचनमा दुई बजेसम्म गोरखामा ५० प्रतिशत मत खसेको मुख्य निर्वाचन अधिकृतको कार्यालयले जनाएको छ ।

उत्तरी गोरखा अन्तरगत धार्चे र चुमनुव्री गाउँपालिकामा ६० प्रतिशत मतदान भएको मुख्य निर्वाचन निर्वाचन अधिकृत दिनवन्धु बरालले बताए । ‘जिल्लाभर समग्रमा ५० प्रतिशतभन्दा मत खसेको छ,’ उनले भने ।

११ स्थानीय तह रहेको गोरखामा ३ सय ११ मतदान केन्द्र छन् । उत्तरी गोरखाअन्तर्गत कम मतदाता रहेको केन्द्रमा मतदान अन्तिम चरणमा पुगेको छ । ८२ मतदाता रहेको नामरुङ गुम्बा मतदान केन्द्रमा ७२ खसेको छ । ‘केही मतदता अझै आउँदै हुनुहुन्छ,’ मतदान अधिकृत डिलप्रसाद गुरुङले भने,‘अधिकाशंले बिहानै हालेर गइसक्नुभयो, अब १० जनाको बाँकी छ, कुरेर बसेका छौँ ।’

त्यस्तै चुमनुव्री गाँपालिका–४ को हिमचुली आधारभुत विद्यालय छाकमा ५८ मत खसेको छ । उक्त केन्द्रमा १०५ मतदाता रहेको मतदान केन्द्रमा खटिएका कर्मचारी केशवराज गुरुङले बताए । ‘५० प्रतिशत मत खसिसक्यो, अहिले भीडभाड घटेको छ,’ उनले भने,‘हामी बेलुकी पाँच बजेसम्म बस्छौँ ।’

चुमनुव्री गाउँपालिका क्राकको क्राक गुम्बा मतदान केन्द्रमा पनि ६८ मत खसेको छ । उक्त केन्द्रमा ९९ मतदाता छन् । कम मतदाता रहेको मतदान केन्द्रको मतदान अन्तिम चरणमा पुगे पनि कर्मचारीले भने साँझ पाँच बजेसम्म बस्ने गुरुङले बताए ।

प्रकाशित : वैशाख ३०, २०७९ १५:१७
पूरा पढ्नुहोस्
प्रतिक्रिया
पठाउनुहोस्
×