सिन्धुपाल्चोक — स्थानीय तहको चुनाव नजिकिँदै गर्दा राजनीतिक दलहरूले प्रचारप्रसारमा बालबालिकालाई प्रयोग गरिरहेका छन् । सिन्धुपाल्चोकमा प्रमुख राजनीतिक दल एमाले, कांग्रेस र माओवादीले चुनावी प्रचारप्रसारमा बालबालिकाको हातमा झण्डा र लाउडस्पिकर बोकाएका छन् ।

प्रचारप्रसारका क्रममा प्रयोग भएका गाडीमा समेत नाराबाजीमा उनीहरूलाई प्रयोग गरिएको पाइएको छ । विद्यालय बन्द भएको बेला पारेर दलहरूले बालबालिकालाई प्रयोग गरेका हुन् ।

बलेफी गाउँपालिका जुरेक्षेत्रमा नेकपा एमालेले घरदैलो अभियानमा आएका एक १४ वर्षीय किशोरले रमाइलोका लागि प्रचारप्रसारमा आएको बताए । ‘स्कुल बन्द छ, गाउँभरका सबै मान्छे घुम्न आए, त्यही भएर रमाइलो गर्न साथीसँग आएका हौँ, यस्तो गर्नु हुँदैन भन्ने थाहा भएन, अरुले जस्तै झण्डा बोकियो, टिसर्ट लगायौँ,’ उनले भने ।

उनीसहित चुनावी सवारीको लर्कोसहितको र्‍यालीमा दर्जनौँ बालबालिकालाई झण्डा बोकाएर सवारीमा हालेर मुख्य बजार घुमाइएको थियो । आइतबार बलेफी गाउँपालिकाको धुस्कोटमा बालबालिकालाई रुख चिह्न अंकित टोपी, टिसर्ट लगाउन दिएर घरदैलो अभियानमा प्रयोग गरेको छ । ‘हामी त गीतमा नाच्न आएको, नयाँ कपडा पाइयो, झण्डा हेर्नुस् त, पार्टीको झण्डा बोक्न र टिसर्ट लगाउन हुन्न र ?,’ १३ वर्षीया एक किशोरीले बताइन् ।