जुम्ला — जुम्लाको सिँजा गाउँपालिकामा नेकपा माओवादी केन्द्रका उम्मेदवारले घोषणापत्र सार्वजनिक गर्दै  सि“जा संग्राहलय स्थापनादेखि रोजगारीको सुनिश्चिततासम्मलाई जोड दिएका छन् ।

माओवादीले सिँजा सभ्यतालाई संरक्षण गर्नका विश्व सम्पदा सूचीमा लिखित दस्ताबेज प्रस्तुत गर्नेसमेत उल्लेख गरेको छ । 

गाउँपालिका अध्यक्षका उम्मेदवार पूर्णप्रसाद धितालले सिँजा सभ्यताको पहिचान दिलाउन र सभ्यताभित्र भएका हरेक क्रियाकलापको संरक्षण गर्न योजना बनाउने प्रतिबद्धता जाहेर गरेका हुन । उनले घोषणापत्र सार्वजनिक गर्दै भने, ‘सिँजा आफैमा एक शक्तिशाली राज्य हो । तर पछिल्लो समयमा केन्द्रिकृत सत्ताका कारण सधैं ओझेलमा परिरह्यो । अब स्थानीय सरकारले सिँजाको पहिचान दिने खालका नीति कार्यक्रम तर्जुमा गर्नेछ । जसका कारण नेकपा माओवादीको उम्मेदवारी हो । ’

माओवादीले प्रत्येक वडा कार्यालयका केन्द्रहरूमा १० घर नयाँ सहरको स्थापना गर्ने बताएको छ ।  उपभोक्ता समितिको मनपरीका कारण अनियमितता मौलाएकोले अब श्रम संगठन बनाउने गरी घोषणा पत्र बनाएको छ । 

श्रमिकका खातामा पारिश्रमिक पठाउने व्यवस्था गर्ने, युवालाई रोजगारीमा प्रथामिकता दिने, नतिजाको आधारमा शिक्षक प्रोत्साहन तथा पुरस्कृत कार्यक्रम ल्याउने, भ्रमणको व्यवस्था गर्ने माओवादीको घोषणापत्रमा उल्लेख छ ।

सबै विद्यालयमा इन्टरनेट जडान, पक्की तथा बालमैत्री विद्यालय भवन निर्माणदेखि आधारभूत व्यवस्थापनमा जोड दिइने अध्यक्षका उम्मेदवार धितालले जानकारी दिए ।  सिँजाका अति विपन्न नागरिकका लागि आवासको व्यवस्था गर्ने,सिञ्जा गाउँपालिकालाई सूचनामैत्री गाउँपालिकाको रूपमा विकास गर्ने समेत घोषणापत्रमा उल्लेख गरिएको छ ।

कृषिमा ‘एक गाउँ एक कृषि’ उत्पादन र सहकारी उत्पादन तथा रैथाने कृषि वस्तुको बजारीकरणमा जोड दिने घोषणापत्रमा समेटिएको धितालले जानकारी दिए । त्यस्तै हरेक घरको एक जनालाई रोजगारमा जोड्ने नीति अबलम्बन गर्ने माओवादीले जनाएको छ ।