'पुरुषभन्दा महिला पछि किन पर्ने भनेर उम्मेदवारी दाबी गरेँ, योगदानको कदर गर्दै पार्टीले अवसर दिएको छ, नमुना सुनकोसी बनाउने अठोटकासाथ मतदाताबीच एजेन्डा लिएर पुगिरहेको छु ।'
सिन्धुपाल्चोक — जिल्लामा दलहरुले सोमबार आ–आफ्ना उम्मेदवारी दर्ता गरे । सुरुदेखि महिलालाई उपमेयर, वडासदस्य पदबाहेक अन्य पदमा उम्मेदवार नबनाएको भन्दै कांग्रेसबीच धेरै उथलपुथल मच्चियो ।
महिलासहित मेयर/अध्यक्षमा नाम सिफारिस गरेकाे नेकपा एमालेले एक गाउँपालिबाहेक अन्तिममा सबै पुराना अनुहार उभ्याए । दाबेदारीपछि माओवादी केन्द्रले सुनकोसी गाउँपालिकाको प्रमुख पदको उम्मेदवार कृष्णकुमारी कुवँरलाई उभ्यायो ।
फलस्वरूप उनी जिल्लामै दलको तर्फबाट चुनाव लड्ने अध्यक्ष पदकी एक्ली उम्मेदवार बनेकी छन् । जनयुद्धमा लामो समय होमिएकी पूर्वलडाकु कुँवर सामाजिक सेवा, राजनीतिमा सक्रिय थिइन् ।
'पुरुषभन्दा महिला पछि किन पर्ने भनेर उम्मेदवारी दाबी गरेँ, योगदानको कदर गर्दै पार्टीले अवसर दिएको छ, नमुना सुनकोसी बनाउने अठोटकासाथ मतदाताबीच एजेन्डा लिएर पुगिरहेको छु,' कुवँरले भनिन् । माओवादी केन्द्रबाट कुवँरसहित उपाध्यक्ष दुर्गा थापा, वडाअध्यक्ष वडा न.१ मा श्री कृष्ण खत्री, २ मा रामशरण बुढाथोकी, ३ मा सुनेश थापामगर, ४ ज्ञान बहादुर रुम्बा, ६ मा मिमबहादुर याेन्जन र ७ मा भाइराम दाहाल उम्मेदवार छन् ।
अहिले व्यवसाय गर्दै जीविकोपार्जन गरिरहेकी कुँवरले आफू विजयी भए सुनकोसीलाई समृद्ध र उत्कृष्ट बनाउने कार्ययोजना बनाएको उल्लेख गरिन् ।दलबाहिर अध्यक्षमा स्वतन्त्रबाट उम्मेदवारी दिनेमा पाँचपोखरी थाङ्पाल गाउँपालिका भोताङकी सगरमाथा आरोही माया गुरुङ छन् ।
यसअघि माओवादी केन्द्रले चौतारा साँगाचोकगढी नगरको मेयरमा जानुका पराजुली र एमालेले बाह्रबिसे नगरको मेयरमा कल्याणी घिसिङलाई सिफारिस गरेको थियो । एमालेले अन्य स्थानीय तहमा धेरै महिलाको नाम माथिल्लो तहमा सिफारिस गरेको थियोे । तर पछि बलियो उम्मेदवार बनाउने होडमा पछाडि हटाइएको देखिएको जानकारहरू बताउँछन् ।
