जनकपुरको मेयरमा लालकिशोर साह सत्ता गठबन्धनका उम्मेदवार- स्थानीय तह निर्वाचन २०७९ - कान्तिपुर समाचार
कान्तिपुर वेबसाईट
AdvertisementAdvertisement

जनकपुरको मेयरमा लालकिशोर साह सत्ता गठबन्धनका उम्मेदवार

अजित तिवारी

जनकपुर — जनता समाजवादी पार्टी(जसपा) ले लालकिशोर साहलाई जनकपुर उपमहानगरपालिकाको मेयरको उम्मेदवार बनाएको छ । दुई दिनदेखि जनकपुरमा बसेको जसपाको बैठकले आइतबार जनकपुर उपमहानगरपालिकामा मेयरको उम्मेदवार साहलाई बनाउने निर्णय गरेको जसपाका युवा नेता जीतेन्द्र यादवले जानकारी दिए । 

साह, जनकपुर उपमहानगरपालिकाका निर्वतमान मेयरसमेत हुन् । उनले शुक्रबार मात्रै पदबाट राजीनामा गरेका थिए । साहलाई जसपाका नेतृ रेणुकुमारी यादवले प्रमुख पदको टिकट वितरण गरेकी छन् ।

साह यसअघिको निर्वाचनमा महन्थ ठाकुरको तत्कालीन दल राष्ट्रिय जनता पार्टी(राजपा)बाट विजयी भएका थिए । जनकपुर उपमहानगरपालिकामा भने गठबन्धनबाट उपप्रमुखमा कांग्रेसका उम्मदेवार हुनेछन् । कांग्रेसको बैठक जारी नै छ ।

जनकपुर उपमहानगरपालिकाका लागि यसअघि, लोकतान्त्रिक समाजवादी पार्टी(लोसपा)ले प्रमुखमा मनोज चौधरी र उपप्रमुखमा रीता मिश्रलाई टिकट दिइसकेको छ । लोसपाका उपप्रमुख मिश्र जनकपुर उपमहानगरपालिकामा वर्तमान उपप्रमुख हुन् ।

जनकपुर उपमहानगरपालिकाका लागि एमालेले भने उम्मेदवार टुंग्याउन बाँकी छ । त्यस्तै मेयरमा बलराम महतो र कांग्रेस छाडेका मनोज साहले स्वतन्त्र उम्मेदवारी दिने घोषणा गरेका छन् ।

प्रकाशित : वैशाख ११, २०७९ १२:०७
प्रतिक्रिया
पठाउनुहोस्

नयाँघरेको ‘याकजी’ विमोचन

कान्तिपुर संवाददाता

काठमाडौँ — निबन्धकार तथा नियात्राकार युवराज नयाँघरेको ‘याकजी’ निबन्ध संग्रह विमोचन भएको छ । प्राज्ञ तथा प्रसिद्ध नाटककार अशेष मल्लले विमोचन गरेको उक्त नियात्राका कृतिमा तल्लो र माथिल्लो डोल्पाको भूगोल, संस्कृति, जनजीवन र विकटताको वर्णन छ ।

विमोचनपछि नाटककार मल्लले भने‚ ‘डोल्पाली समाजको असाध्यै सूक्ष्म वर्णन गरिएको यो कृति कला र शिल्पको हिसाबले महत्त्वपूर्ण छ । यो कृति यात्रा मात्रै नभएर सामाजिक रुपमा गहिरो अध्ययन गरिएको विशेष ग्रन्थ हो ।’

कार्यक्रममा समालोचक महेश पौडेलले भने‚ ‘याकजी उपल्लो डोल्पाको समग्र अध्ययन र साहित्यिक स्वाद दिनका लागि सक्षम भएको छ । विवरणभन्दा अनुभूतिले भरिभराउ यो कृति यात्रा लेखनको एक मानक ग्रन्थ बन्न पुगेको छ । पुस्तकमा नयाँघरेशैली मजाले भेट्न सकिन्छ ।’

नियात्रा समाज नेपालका अध्यक्ष तथा नियात्राकार प्रतीक ढकालले याकजी नेपाली यात्रा साहित्यको एक अमूल्य कृतिका रुपमा आएको बताए । ‘कला, शिल्प र शैलीको एक विशेष र चमत्कारिक अनुहार हामी यहाँ भेट्न सक्छौं । नयाँघरेको मौलिक भाषिक प्रयोग र ठेट नेपालीपनलाई यहाँ पनि आत्मसात् गरिएको अनुभव गर्न सकिन्छ । डोल्पाली समाजलाई अत्यन्तै सूक्ष्म र विशेष कलाकारिता प्रस्तुत गरी लेख्नमा नयाँघरे सफल छन्‚’ उनले भने ।

याकजीका लेखक युवराज नयाँघरेले आफ्नो लेखकीय अनुभव बताउँदै कर्णालीको विकट क्षेत्रको यात्राबाट आफूले जीवनकै गहिरो दर्शन प्राप्त गरेको बताए । उनले भने‚ ‘डोल्पा नेपालको एउटा विशेष प्रतिबिम्ब हो । विकटताभित्र रहेको सरलता र शान्तिको एक विशेष अनुभूतिका लागि हामीले यी भूभागहरू घुम्नुपर्छ । यो यात्राबाट मैले समाज र सरकारलाई हेर्ने एउटा फरक भावना हुर्काएको छु । हरेक व्यक्तिले समय, समाज र संस्कृतिको समग्र अवस्था अध्ययनका लागि डोल्पाजस्ता विकट र कष्टकर भूभाग एक पटक भ्रमण गर्नु पर्छ ।’

नियात्राकार नयाँघरेको यो १८औं कृति हो ।

प्रकाशित : वैशाख ११, २०७९ १२:०५
पूरा पढ्नुहोस्
प्रतिक्रिया
पठाउनुहोस्
×