मकवानपुर, सिन्धुली, काभ्रे — स्थानीय तह निर्वाचनको मिति नजिकिए पनि मकवानपुरमा चुनावी चहलपहल भने सुरु भएको छैन । सत्तारूढ र प्रतिपक्षी दलहरूबीच गठबन्धनका कारण उम्मेदवार टुंगो नलाग्दा वैशाख ३० मा हुने निर्वाचनको माहोल अझै सुरु नभएको हो ।

सत्तारूढ दल कांग्रेसको नेतृत्वमा रहेको माओवादी केन्द्र, नेकपा (एकीकृत समाजवादी), जनमोर्चा र जसपा सम्मिलित सत्ता गठबन्धनले अझैसम्म उम्मेदवारको टुंगो लगाउन सकेको छैन । प्रतिपक्षी दल एमाले र राप्रपा नेपालबीच गठबन्धन भए पनि आगामी कार्यदिशाबारे दुवै दल निचोडमा पुग्न सकेका छैनन् । उम्मेदवारी दर्ता गर्न अब एक साता मात्रै छ ।

एमालेले अधिकांश वडामा उम्मेदवार तय गरे पनि राप्रपा नेपालसँगको नयाँ समीकरणसँगै चुनावी कार्यक्रम अगाडि बढाउन सकेको छैन । मकवानपुर राप्रपा नेपालका अध्यक्ष कमल थापाको गृहजिल्ला हो । जसका कारण एमालेले आगामी कार्यदिशा तय गर्न सकेको छैन । सत्तारूढ दलबीच पनि पटक–पटक बैठक भए पनि अन्तिम निर्णयका लागि केन्द्रकै निर्देशन पर्खिरहेका छन् ।

मकवानपुरमा हेटौंडा उपमहानगरसहित १ नगर र ८ गाउँपालिका छन् । उपमहानगरमा उम्मेदवार सत्ता र प्रतिपक्षी दुवैले केन्द्रबाटै टुंग्याउने निर्णय गरेका कारण पनि चुनावी चहलपहलका लागि केही समय अझै कुर्नुपर्ने देखिन्छ । अघिल्लो निर्वाचनमा एमाले ६ स्थानीय तहमा विजयी भएको थियो । कांग्रेस र माओवादीले २/२ स्थानीय तहको नेतृत्व हत्याएका थिए । एमालेले पार्टी विभाजनको असर नपरेको दाबी गरे पनि एकीकृत समाजवादीको वडा तहैसम्म संरचना निर्माण भएको छ । एमाले विभाजन भएसँगै कैलाश र इन्द्रसरोवर गाउँपालिकाका फ्रमुखहरू क्रमशः टंक मोत्तान र जीवन लामा अहिले एकीकृत समाजवादीतर्फ खुलेका छन् ।

कांग्रेस मकवानपुर सभापति बुद्ध लामाले केन्द्रको निर्देशनअनुसार जिल्ला, पालिका र वडा तहमै गठबन्धनको संयन्त्र तयार गरिएको र सोहीअनुसार उम्मेदवार छनोट गरिने बताए । राप्रपा नेपालका प्रतिनिधिसँग छलफल भइरहेकाले केही दिनभित्रै उम्मेदवार टुंगो लाग्ने एमाले मकवानपुर अध्यक्ष एकालाल श्रेष्ठले बताए । दलहरूले संघीय

संरचना निर्माण गरे पनि निर्वाचनमा टिकट वितरणमा भने केन्द्र नै हावी हुने देखिएपछि जिल्लाका आकांक्षी नेताहरू हाल काठमाडौंमै डेरा जमाएर बसिरहेका छन् । कांग्रेस नेताहरू समूह नै बनाएर दैनिक प्रधानमन्त्री तथा सभापति शेरबहादुर देउवालाई भेटिरहेका छन् । एमाले नेताहरू पनि विशेष गरी हेटौंडाको उम्मेदवार बन्न दौडधुप गरिरहेका छन् ।

टिकटका लागि शक्तिकेन्द्र धाउँदै

सिन्धुलीका आकांक्षीहरू टिकट लिन शक्तिकेन्द्र धाउन थालेका छन् । काभ्रेमा आकांक्षीको संख्या बढी भएपछि निर्णयका लागि प्रदेश र केन्द्रीय कमिटीमा सिफारिससहित नाम पठाइएको छ ।

दलहरूले बनाएको मापदण्डअनुसार टिकटका लागि उम्मेदवारका आकांक्षीहरू जिल्ला, प्रदेश र संघ तथा शक्तिकेन्द्र धाउन थालेका हुन् । स्थानीय तह र जिल्लामा टुंगो लाग्न नसकेका नाम प्रदेश र संघमा पठाइएको सिन्धुलीका माओवादी केन्द्र जिल्ला समन्वय समितिका संयोजक रामकुमार पौडेलले जनाए । ‘कतिपय पालिकाबाट उम्मेदवारको नाम आउने क्रम जारी छ,’ उनले भने । उनी मरिण गाउँपालिका अध्यक्षका आकांक्षी हुन् ।

कांग्रेसको तीनपाटन गाउँपालिकामा हालका अध्यक्ष कर्णबहादुर थापालाई पुनः पालिकास्तरबाट अध्यक्षका लागि सर्वसम्मत एकल उम्मेदवार छनोट गरेको छ । एमालेसँग १९ मतको झिनो अन्तरले विजयी भएको कांग्रेस यो पटक फराकिलो अन्तर बनाउन चाहन्छ । गत निर्वाचनमा अन्तिम समयमा आएर टिकट पाएकाले जित निकाल्न हम्मेहम्मे परेको थियो । कांग्रेस संघीय निर्वाचन क्षेत्र नं. १ का सभापतिसमेत रहेका अध्यक्ष थापामगरले भने, ‘यो पटक त पहिलादेखिकै तयारी छ, फराकिलो मतअन्तरले जित्छौं । त्यसमाथि गठबन्धन जोडिँदा त निकै अन्तर हुन्छ ।’

एमालेले गोलन्जोर गाउँपालिकामा शंकर बराल र मरिण गाउँपालिकामा गोविन्दलाल माझीलाई अध्यक्ष पदका लागि सर्वसम्मत उम्मेदवार चयन गरेको छ । यी दुवै पालिकामा २०७४ को निर्वाचनमा एमाले दोस्रो भएको थियो । कांग्रेस र माओवादीले जित निकालेका यी पालिकामा एमालेले यो पटक स्थानीय सरकार बनाउन जित निकाल्ने रणनीति बनाएको छ । गत स्थानीय चुनावमा दोस्रो भएको एमालेले दुवै पालिकामा जित निकाल्ने प्रचार तथा प्रकाशन विभाग प्रमुख सञ्जय दाहाल बताउँछन् । भन्छन्, ‘एकढिक्का भएर निर्वाचनमा गई जित निकाल्नुपर्ने भएकाले सर्वसम्मत उम्मेदवार चयन भएको हो ।’