बिर्तामोड — जिल्लामा क्रियाशील राजनीतिक दलहरुले झापामा स्थानीय तहको चुनाव विवादरहित बनाउने प्रतिबद्धता व्यक्त गरेका छन् । उनीहरुले आ–आफ्ना पार्टी गतिविधिलाई शान्तिपूर्ण र मर्यादित बनाउदै वैशाख ३० को चुनावलाई द्वन्द्वरहित बनाउने बताएका हुन् । 

नेकपा एमालेका जिल्ला अध्यक्ष दीपक कार्कीले आगामी चुनाव सफल हुनु संविधानको सफल कार्यान्वयन भएकाले चुनाव विवादरहित बनाउनुको विकल्प नभएको बताए । उनले लोकतन्त्र र गणतन्त्र आम जनताको लागि राम्रो शासन प्रणाली हो भन्ने सन्देश दिनका लागि पनि स्थानीय तहको निर्वाचन सफलतापूर्वक सम्पन्न गर्न जरुरी रहेको बताए । 

कांग्रेस जिल्ला सभापति देउकुमार थेबेले लोकतान्त्रिक प्रक्रियाबाट हुने चुनावलाई सफल बनाउनु नै लोकतान्त्रिक पार्टीहरुको प्रमुख जिम्मेवारी भएको बताए । उनले निर्वाचन आचार संहिताको पूर्ण पालना गर्नु नै चुनावलाई द्वन्द्वरहित बनाउनु भएकाले आफूहरु त्यसतर्फ गम्भीर रहेको बताए । नेकपा माओवादी केन्द्रका जिल्ला संयोजक राजु आचार्यले जिल्लामा विवादरहित चुनाव गराउन सबै पार्टीका गतिविधि सकारात्मक हुनुपर्नेमा जोड दिए ।  

उनले आचारसंहिता पालनामा पार्टीहरु गम्भीर हुनुपर्नेमा जोड दिए । चुनावी प्रतिस्पर्धा भएपनि चुनावी प्रक्रिया र चुनावमा जिल्लाबासीको सहभागीता बढाउन पनि चुनावी वातावरण सुरक्षित बनाउनुपर्नेमा जोड दिए । मंगलबार बिहान संवाद समूहले बिर्तामोडमा गरेको छलफलमा उनीहरुले चुनावमा बालबालिकाको प्रयोग नगर्ने तथा एक अर्को दलको अस्तित्व स्वीकार गरी स्वास्थ्य चुनावी प्रतिस्पर्धा गर्ने बताएका छन् ।