काठमाडौँ — कर्णाली दुर्गम कि सुगम ? विकासका सम्भावना र चुनौती समेटिएको पुस्तक ‘कर्नालीको मर्म’ पुस्तक प्रकाशनमा आएको छ । डा. दीपेन्द्र रोकायाको पुस्तकबारे मंगलबार परिचर्चा गरिएको हो । 

नेपाल विकास अनुसन्धान प्रतिष्ठानका अध्यक्ष नवराज खतिवडा, राधिका बुढथापा खत्री र राजेन्द्र महर्जनले पुस्तकमाथि समीक्षा गरे । नवराजले पुस्तकको भाषा, शैलीदेखि विषयवस्तुमाथि मिहीन ढंगले टिप्पणी गरेका थिए । 

कर्णालीको भौगोलिक विकाससँगै धार्मिक महत्त्व पुस्तकमा रोचक ढंगले उठाइएको नवराजले बताए । राधिकाले पुस्तकमा सामाजिक, सांस्कृतिक, भौगोलिक र इतिहास समेटिए पनि कर्णालीका महिलाको विषय गौण उठान गरिएकामा गुनासो गरिन् । कर्णालीलाई सधैं गरिब र बिचराको दृष्टिकोणले हेर्न नजर परिवर्तन गर्न जरुरी रहेको राधिकाको सुझाव छ । त्यस्तै, लेखक राजेन्द्रले पुस्तकको तथ्य, तथ्यांक र विषय प्रस्तुतिमा पुस्ट्याइँको कमी रहेको बताए ।