विराटनगर — पार्टीभित्र खुलेर प्रश्न गर्ने नेताका रूपमा चिनिएका गणेश कार्की मोरङ–३ बाट प्रतिनिधिसभा सदस्यमा निर्वाचित भएका छन् । कांग्रेसका सुनिल शर्मालाई पराजित गर्दै संसदीय यात्रा तय गरेका हुन् । उनले २६ हजार ९ सय २४ मत पाए । प्रतिस्पर्धी शर्माले २४ हजार ३ सय ५४ मत पाए । श्रम संस्कृति पार्टीका अमिर मगर १६ हजार ५ सय ९ मतसहित तेस्रो स्थानमा रहँदा नेकपा एमालेका इरनकुमार राई ७ हजार ७ सय ५२ मतसहित चौथो स्थानमा सीमित भए ।

राष्ट्रिय स्वतन्त्र पार्टी (रास्वपा) का संस्थापक केन्द्रीय सदस्यसमेत रहेका ४० वर्षीय कार्की पार्टीभित्र वैचारिक बहस गर्ने नेताका रूपमा परिचित छन् । उनले पार्टी सभापति रवि लामिछानेसहित नेतृत्व तहलाई पटक–पटक प्रश्न गर्दै आएका छन् । नेतृत्वलाई जवाफदेही बनाउनुपर्ने धारणा राख्दै उनले पार्टीभित्र फरक मत राख्ने नेताको छवि बनाएका छन् । यही कारण उनी रास्वपा भित्र ‘विद्रोही’ स्वभावका नेताका रूपमा पनि चिनिन्छन् ।

मोरङको पथरीशनिश्चरेका बासिन्दा कार्की पछिल्लो समय काठमाडौंमा बसोबास गर्दै आएका छन् । फिल्म लेखकसमेत रहेका उनले राजनीतिक बहस र वैचारिक लेखनमार्फत पनि आफ्नो अलग पहिचान बनाएका छन् । निर्वाचनअघि रिलिज भएको सिनेमा ‘झरिपछिको इन्द्रेणी’का लेखक उनी नै हुन् ।