जुम्ला — मंसिर ४ गते हुने प्रतिनिधिसभा र प्रदेशसभा निर्वाचनको सरगर्मी बढेको छ । उम्मेदवारहरू मतदाता रिझाउन घरदैलोमा व्यस्त छन् । प्रदेशसभा सदस्यका लागि जुम्ला १ (२) मा त्रिपक्षीय प्रतिस्पर्धा रोचक हुने देखिएको छ । जहाँ सत्ता गठबन्धनबाट एकीकृत समाजवादीका पदम रोकाया, एमालेका टेकराज पछाई र कांग्रेसबाट विद्रोह गरेर स्वतन्त्र उम्मेदवारी दिएका धनबहादुर बस्नेत चुनावी मैदानमा छन् । 

रोकाया अहिले कर्णाली प्रदेशका भौतिक पूर्वाधार तथा सहरी विकासमन्त्रीसमेत हुन् । रोकायाले पहिलो कार्यकालमा अधुरा रहेका योजना पूरा गर्ने अवसर दिनुपर्ने भन्दै मतदाता भेटघाट गरिहेका छन् । २०७४ सालको निर्वाचनमा कांग्रेसका भीमनिधि हमाललाई पराजित गरेर प्रदेशसभा सदस्यमा निर्वाचित भएका रोकाया संसद्को विधायन समिति र सार्वजनिक लेखासमितिको सभापतिसमेत भइसकेका छन् । उनले कांग्रेस र माओवादीको मतबाट आफू विजयी हुने दाबी गरे । 

तर राजनीतिक विश्लेषकहरू भने यो पटकको निर्वाचन मन्त्री रोकायाले सोचेजस्तो नहुने बताउँछन् । उनलाई एकीकृत समाजवादीभित्रकै असन्तुष्ट पक्षले हराउनका लागि कसरत गर्ने अवस्था रहेको स्थानीय अगुवा कमल न्यौपानेले बताए । उनीमाथि प्रदेश सांसद हुँदा कार्यकर्ताको माग सम्बोधन गर्नर् नसकेको, जनताको हितभन्दा पनि नेतृत्वको वरिपरि घुमेको, जनताको विकासभन्दा पनि आफ्नो व्यक्तिगत विकासमा लागेको र पहुँचका आधारमा विकास बजेट विनियोजन गरेको आरोप छ । 

एमालेका उम्मेदवार पछाई पनि कमजोर उम्मेदवार होइनन् । लामो समय काठमाडौंमा रहेर विद्यार्थी राजनीति गरेका उनी योग्यता, क्षमता, र इमानदारितामा जिल्लामै कहलिएका नेता हुन् । निर्वाचन क्षेत्रको समृद्धिका लागि आफूलाई जिताउनुपर्ने उनको अपिल छ । एमालेका शीर्ष नेताहरूसँग राम्रो सम्बन्ध भएका उनले मतदाताले जिताएको खण्डमा कुनै पनि मत खेर नजानदिने बताइरहेका छन् । ‘एमाले विभाजन भएको केही समयसम्म हामीमा सानोतिनो पीडा थियो, अहिले हामीसँग आन्तरिक विवाद केही छैनन्,’ उनले भने, ‘हाम्रा भोट त सुरक्षित छन् नै गठबन्धनका असन्तुष्ट मतदाताको मत पनि तान्ने कसरतमा हामी छौं ।’