म्याग्दी — कालीगण्डकी करिडोरअन्तर्गत मालढुङ्गा–बेनी–जोमसोम–कोरोला सडक आयोजनाले बेनी–लेतेसम्मको ३८ किलोमिटर सडक खण्डमा झरेका ९ वटा ‘जोखिमयुक्त’ पहिरोमध्ये ४ वटालाई ‘अति जोखिमयुक्त’ घोषणा गरेको छ । 

आयोजनाका अनुसार बेनी–लेते ३८ किलोमिटर खण्डमा ३५ वटा सानाठूला पहिरा छन । तीमध्ये वैसरी पहिरो, सिरुवारी पहिरो, गुइठेपहिरो र खामभित्ता पहिरो ‘अति जोखिमपूर्ण’ पहिरा हुन । त्यसैगरी गलेश्वर पहिरो, तातोपानी पहिरो, लाटाखोला पहिरो, रुप्सेछहरा र काप्रेभीर जोखिमपूर्ण पहिरा हुन । 

‘बेनी–जोमसोम–कोरोला सडकको म्याग्दी खण्डमा पर्ने ३८ किमी सडक खण्डमा पर्ने पहिरामध्ये ९ वटा पहिरोमा मनसुन सिजनमा यात्रा जोखिमपूर्ण छ । अझ चार वटा त अति खतरापूर्ण पहिरा हुन’ मालढुङ्गा–बेनी–जोमसोम–कोरोला सडक आयोजना इन्जिनियर विष्णु चापागाईंले भने, ‘यी स्थानमा पानी पर्नेबित्तिकै पहिरो खस्ने भएकोले मनसुन अवधिभरका लागि एक्स्काभेटर र लोडर स्ट्यान्डबाई राखेका छौं । यो सडकमा यात्रा गर्दा अलि सचेत हुनु पर्ने हुन्छ ।’

मनसुन सुरु भएपछि बेनी–लेते खण्डका यी पहिरोहरूले दिनमा कहीँ न कहीँ यातायात अवरुद्ध हुन्छन् । पहिरोग्रस्त भिरमाथिबाट पानी पर्दा निरन्तर लेदो र ढुङ्गा खस्ने भएकोले पैदल तथा सवारी साधनका यात्रु जोखिममा छन् । 

अन्नपूर्ण र धौलागिरी हिमालको बीचबाट बग्ने कालीगण्डकी नदी कटानले संसारकै गहिरो ‘अन्धगल्छी’ चट्टानी पहिरोको उच्च जोखिम क्षेत्र हो । र यही अन्धगल्छीबाट कालीगण्डकी नदी किनारै किनार राष्ट्रिय गौरवको कालीगण्डकी करिडोरअन्तर्गत बेनी–जोमसोम–कोरला सडक सडक विस्तार कार्यक्रम चालु छ । यो क्षेत्र कालीगण्डकी नदी तटीय बस्तीका लागि सँधैको त्रास पनि हो ।