पोखरा — विभिन्न अपांगता भएका व्यक्तिलाई राजनीतिमा सहभागिता र मतदानलगायत निर्वाचन प्रणालीमा पहुँचयुक्त बनाउनुपर्नेमा सरोकारवालाले जोड दिएका छन् । उनीहरूले अपांगता भएकालाई अहिले उम्मेदवार हुनदेखि मतदानमा समेत वञ्चित हुनुपर्ने अवस्था विद्यमान रहेको बताए । मतदाता शिक्षादेखि निर्वाचनका सबै सामग्री र मतदानस्थलसमेत अपांगमैत्री हुनुपर्ने उनीहरूको भनाइ थियो । 

यसअघिका निर्वाचनमा पहुँचयुक्त मतदान केन्द्र नहुँदा अपांगता भएका व्यक्तिले मताधिकार प्रयोग गर्नबाट वञ्चित भएको भन्दै अब त्यस्तो हुन नहुने बताए । अपांगता भएकाको संस्था स्वावलम्बन जीवन पद्धति केन्द्र पोखराले शुक्रबार आयोजना गरेको अपांगता भएका व्यक्तिको राजनीतिक सहभागिता र पहुँचयुक्त निर्वाचन प्रणाली विषयक कार्यक्रमका सहभागीले यस्तो बताएका हुन् ।

‘संवैधानिक व्यवस्था र कानुनी प्रावधान भए पनि कार्यान्वयन नहुँदा राजनीतिमा अपांगको सहभागिता र निर्वाचन प्रक्रियामा सहजै पहुँचको अवस्था छैन’ केन्द्रका अध्यक्ष हेमबहादुर गुरुङले भने, ‘निर्वाचन आयोगले पनि यसतर्फ अलि बढी चासो दिनुपर्‍यो ।’

कार्यक्रमका सहभागीले मतदानस्थलमा हेल्थ डेस्क राख्न पनि अनुरोध गरे । साथै एकाघरको मात्र नभई इच्छाइएको व्यक्तिबाट मतदान गर्न पाउने अधिकारको सुनिश्चितताको माग पनि उनीहरूको थियो । सूचना पहुँचमा पनि अभिवृद्धि गर्नुपर्नेमा जोड दिए । समग्रमा सहजै गएर छोटो समयमै मतदान गरी फर्कने वातावरण बनाउनेतर्फ सरोकारवालाको ध्यानाकर्षण गराएका थिए ।