लमजुङ — कोरोना भाइरसविरुद्धको खोप लगाउने क्रममा भीड व्यवस्थापन गर्न लमजुङमा प्रहरी परिचालन गर्नुपरेको छ । बेंसीसहर–८ स्थित जिल्ला अस्पताल लमजुङको प्रांगणमा मंगलबार भेरोसेल खोप लगाउन ठेलमठेल भएपछि जिल्ला प्रहरी प्रमुख कृष्णबहादुर कार्की आफैं टोलीसहित खटिएका थिए । सशस्त्र प्रहरी इन्स्पेक्टर रामबहादुर खत्रीको कमान्डमा अर्को एक टोली र नगर प्रहरीले पनि त्यसमा सघाएका थिए ।

बेंसीसहरका राजु अर्यालले भने खोप केन्द्र व्यवस्थित नहुँदा खोप लगाउन आउनेबीच नै झगडा परेको र प्रहरीले हस्तक्षेप गरी भीड नियन्त्रणमा लिनुपरेको बताए । ‘मान्छेलाई कोरोनाको डरभन्दा पनि खोप पाउनुपर्छ, त्यो पनि अहिले नै पाउनुपर्छ भन्ने मान्यता देखियो,’ उनले भने ।

अस्पताल प्रमुख हेमन्त श्रेष्ठले बिहान १० बजेदेखि खोप दिने समय तोकेकोमा बिहान साढे ७ बजेदेखि नै लाभग्राही लाइनमा उभिएपछि समस्या भएको बताए । ‘बिहानै आउने अनि हामीले खोप पाएनौं भन्दै कराउने,’ उनले भने, ‘खोप लगाएर संक्रमण रोकिएलाभन्दा भीडभाडले झन् जोखिम बढाउने चिन्ता थपियो ।’

उनका अनुसार मध्याह्नमा करिब ४ सयको संख्यामा केन्द्रमा लाभग्राहीको उपस्थिति थियो । बेंसीसहर नगरपालिकाका स्वास्थ्य शाखा प्रमुख मनोजसिंह बोहराले व्यवस्थापनमा केही कमजोरी हुँदा भीडभाड बढेको स्विकारे । ‘हामीले म्यानेज गरेका थियौं । भीडभाड हुन्छ भनेर टोकन प्रणाली पनि लागू गरेका थियौं । तर सोचेभन्दा बढी भीड भएपछि टोकन प्रणाली पनि कता पुग्यो–पुग्यो,’ उनले भने ।

स्वास्थ्य कार्यालय प्रमुख अमर दवाडीले असार ३०–३१ पहिलो मात्रा लगाएका ५५ वर्षमाथि, सवारी चालक–सहचालक, शिक्षकलाई दोस्रो मात्रा खोप दिइएको हो । खोप लगाउन २ दिनको समय तोकिए पनि एकै दिन र सबैजसो एकै समयमा आउँदा व्यवस्थापन अस्तव्यस्त बनेको उनको भनाइ छ । ‘सबैलाई सुरुमै चाहिएको छ । त्यो पनि खोप केन्द्रमा पुग्नेबित्तिकै चाहिएको छ । त्यसकारण पनि भीड भएको हो,’ उनले भने । जिल्लाभर भेरोसेल पहिलो मात्रा लगाउनेको संख्या १४ हजार रहेको उनले बताए ।