गोरखा — गत शनिबार सहिद लखन गाउँपालिका–८ छापथोक हटिया गाउँका १८ जनाको एन्टिजेन परीक्षण गर्दा १५ जनाको रिपोर्ट पोजिटिभ आयो । असार ३१ मा पनि उक्त गाउँका २५ जनाको एन्टिजेन परीक्षणमा २३ को रिपोर्ट पोजिटिभ आएको थियो ।

शनिबार ५५ जनाको पीसीआर परीक्षणका लागि स्वाब संकलन गरिएको छ । छापथोकमा ४० जनाभन्दा बढीमा रुघाखोकीजस्ता लक्षण देखिएको  गाउँ स्वास्थ्य शाखा प्रमुख वीरेन्द्र श्रेष्ठले बताए । ‘केही दिनअघि २–४ जनालाई रुघाखोकी देखिएको रहेछ, परीक्षण भएको थिएन,’ उनले भने, ‘असार १५ यता गाउँमा मेलापातको चाप छ । समूहमा काम गर्दा एकबाट अर्कोमा सर्दै गयो । फेरि चाडपर्व सुरु भयो, जमघट र पाहुना लाग्ने क्रमसँगै जोखिम बढेको हो ।’ 

कोरोना संक्रमणको दर घटेको भन्दै जिल्लाभर निषेधाज्ञा खुकुलो बनाइएको छ । सार्वजनिक यातायात, सरकारी कार्यालय, बैंक तथा वित्तीय संस्था पनि खुलेका छन् । भीडभाड हुने ठाउँमा मास्कको प्रयोग भए पनि भौतिक दूरीलगायत अन्य स्वास्थ्य सुरक्षा मापदण्ड पालना भएको छैन । आर्थिक वर्षको अन्त्य भएकाले भीडभाड बढ्दा मध्यअसारयता सरकारी तथा बैंकका कर्मचारीसमेत संक्रमित बनेका छन् । पछिल्लो पटक धार्चे गाउँपालिकाका ७ कर्मचारीमा संक्रमण पाइएको छ । अजिरकोटको भच्चेकमा ८ जना बैंकर पनि संक्रमित भएका छन् । ‘अन्तिम भुक्तानी लिने बेला बैंक बन्द गरौं भन्न पनि मिलेन,’ अजिरकोटका स्वास्थ्य शाखा प्रमुख सुरेश दवाडीले भने, ‘त्यो बेला चाप बैंकमा भइदियो, फेरि निषेधाज्ञा खुकुलो भएपछि गाडी चल्न थाले, आवतजावत बढेपछि जोखिम त्यसै बढ्यो ।’