तनहुँ — दस महिनाको बच्चा काँखीमा च्यापेर गत जेठ १२ गते भारतको मुम्बाईबाट ३ दिनको बसयात्रा गरी नेपाल भित्रिएकी सुजाता सुनार अझै घर जान पाएकी छैनन् । व्यास नगरपालिका–१ स्थित आदिकवि भानुभक्त क्याम्पसको क्वारेन्टिनमा १८ दिनदेखि बसिरहेकी उनी कोरोना परीक्षणको नतिजा बेलैमा नआउँदा जान नपाएकी हुन् । 

नेपाल–भारत सीमाक्षेत्रबाट उद्धार गरी स्थानीय तहले निर्माण गरेको क्वारेन्टिनमा ल्याइएकालाई १४ दिन क्वारेन्टिन अनिवार्य गरिए पनि १८ दिनसम्म बस्नु पर्दा उनीहरुलाई आँगनमा आइपुगेर घरभित्र छिर्न नपाएजस्तो भएको छ । 

‘१४ दिन क्वारेन्टिनमा राखेर स्वास्थ्य परीक्षण गरी घर पठाउँछौं भन्थे १८ दिन पुग्दासम्म जान पाइएको छैन,’ सुनारले भनिन्, ‘स्वाब संकलन गरेको ५/६ दिनसम्म पनि किन रिपोर्ट आएन भन्दा पालो आएको छैन, धैर्यता गरी बस्नुहोस् भन्छन् ।’

क्वारेन्टिनमा बस्दा सबैभन्दा बढी बच्चाको स्वास्थ्यमा समस्या देखिँदा अत्यार लागेको उनी बताउँछिन् । ‘बच्चा सानो छ, समय समयमा स्वास्थ्यमा के कस्तो समस्या देखिन्छ थाहा हुँदैन,’ उनले भनिन्, ‘२/३ दिन अगाडि पनि बिरामी भएको थियो । यहींबाटै सरहरुले एम्बुलेन्सको व्यवस्था गरि पोखरामा स्वास्थ्य जाँच गरी आएको हो । अहिले केही बिसेक भएको छ । अब जतिसक्दो चाँडै रिपोर्ट आए घर फर्किन पाए हुन्थ्यो ।’

समयमै पीसीआर परीक्षणको रिपोर्ट नआउँदा उनीजस्तै क्वारेन्टिनमा बसेका अन्यलाई पनि धेरै समस्या परेको छ । क्वारेन्टिनमा महिला पुरुष दुवै बसेको र आवश्यक मात्रमा शौचालय/बाथरुमको व्यवस्थापन नहुँदा पनि समस्या परेको उनीहरु बताउँछन् । 

क्वारेन्टिनमा बसेको २२ दिन भएको बताउने ऋषिङ गाउँपालिकाका अमर नेपाली पनि लामो समयसम्म घर जान नपाउँदा आत्तिएको बताउँछन् । पहिलो रिपोर्ट नेगेटिभ आएता पनि जिल्लाको पहिलो संक्रमितसँगै एउटै कोठामा बसेकाले उनको पुनः नमुना संकलन गरी परीक्षणका लागि पठाइएको छ ।

‘पहिलो रिपोर्ट नेगेभिट आएको हो र अहिले पनि नेगेटिभ नै आउँछ भन्नेमा म ढुक्क छु,’ उनले भने, ‘तर, रिपोर्ट समयमा नआइदिँदा घर जान पाइएको छैन ।’ 

पहिलो संक्रमितसँगै बसेका ७ जनाको रिपोर्ट नेगेटिभ आएता पनि उनीहरुको पुनः परीक्षणका लागि स्वाब संकलन गरी पठाइएको जिल्ला स्वास्थ्य कार्यालयका प्रमुख शंकरबाबु अधिकारी बताउँछन् । उनले भने, ‘क्वारेन्टिनमा बसेको १४ दिन पूरा भएपछि स्वाब संकलन गरी पठाएको रिपोर्ट चाँडो नआउँदा क्वारेन्टिनको बसाई लम्बिन पुगेको छ ।’

कोरोना भाइरसको नियन्त्रणका लागि गरिएको लकडाउन समयअवधिमा जिल्ला प्रवेश गर्ने ७३३ जनालाई स्थानीय तहले निर्माण गरिएको क्वारेन्टिनमा राखिएको छ । जिल्लाभित्र ८२७ वेड क्षमताको क्वारेन्टिन निर्माण भएको जिल्ला स्वास्थ्य कार्यालयले जनाएको छ ।

क्वारेन्टिनमा राखिएका मध्ये १ हजार २ जनाको थ्रोट स्वाब संकलन गरी कोरोना भाइरस परीक्षणका लागि पोखरा पठाइएको कार्यलयका प्रमुख अधिकारीले बताए । कोभिड–१९ परीक्षणका लागि पठाइएको नमुना मध्ये ४२२ नेगेटिभ, ४ पोजेटिभ र ५७६ रिपोर्ट आउन बाँकी छ’, उनले भने, ‘स्वाब संकलन गरी पठाइएको एक हप्तासम्म पनि रिपोर्ट आउँदैन ।’ त्यस्तै, चैत १ गते यता भारत लगायत अन्य देशबाट २ हजार ३९ जना जिल्ला प्रवेश गरेका जिल्ला स्वास्थ्य कार्यालयले जनाएको छ ।

समयमा रिपोर्ट नआउँदा क्वारेन्टिनमा बस्नेहरु आत्तिएको उनी बताउँछन् । उनले भने, ‘पोखरामा म्यानपावर र परीक्षण मेसिनको कमीले गर्दा ढिलाई भएको देखिन्छ । यसको लागि तनहुँबाटै २ जना टेक्निसियन पोखरा पठाइएका छौं ।’